31/10/2026
Die hamer lê nou self in stukke
“Hoe gebreek, hoe in stukke lê die hamer nou waaronder die hele aarde moes ly!” Jer. 50:23). “Jy was my hamer, Babel, my oorlogswapen”(Jer. 51:20).
Vanaf Jer. 46 kry ons ’n hele aantal oordeelsaankondigings: Oor Egipte (Jer. 46:2), oor die Filistyne (Jer. 47), oor Moab (Jer. 48), oor die Ammoniete (Jer. 49), oor Edom (Jer. 49:7vv), oor Damaskus (Jer. 49:23vv.) oor Kedar en Gasor (:28vv), oor Elam (:34vv.). Hulle was almal vyande van God se volk.
En dan kom die oordeelsaankondiging oor Babel (Jer. 50 en 51). Die HERE het hom soos ’n hamer gebruik, ’n oorlogswapen om ander volke en veral sy eie volk, Juda, stukkend te slaan. Nebukadnesar van Babel het Jerusalem verwoes, die tempel afgebreek, die huise afgebrand en die inwoners as ballinge weggevoer na Babel.
Maar nou is dit sy beurt, die oordeel gaan hom tref. “Betaal hom terug vir wat hy gedoen het, doen aan hom soos hy aan ander gedoen het, want hy was hooghartig teen die HERE” (Jer. 50:29).
“Skiet hom... Laat die krygsgeskreeu van alle kante af teen hom klink! Hy gee oor, sy torings val, sy mure word afgebreek! Dit is die HERE wat Hom op Babel wreek...” (Jer. 50:14,15).
“Die stad sal nooit weer bewoon word nie, niemand sal ooit weer daar bly nie. Soos God vir S***m en Gomorra en hulle buurdorpe verwoes het, sê die HERE, so sal niemand in Babel woon nie; geen mens sal daar wil bly nie” (Jer. 50:39,40).
Die hamer wat die hele wêreld stukkend geslaan het, lê nou self in stukke gebreek.
Dis ’n verskriklike les wat ons hier leer. Geen regering, volk of nasie kan ander verwoes sonder om nie self verwoes te word nie. Die geskiedenis is vol voorbeelde. Dink aan die magtige Romeinse Ryk, wat die wêreld oorheers het. Dink aan die gevreesde Kommunistiese regering van Rusland. Dink aan Nazi-Duitsland onder Hi**er.
Dink ook aan ons eie regerings, van vroeër en van nou. As die A.N.C. hulle aanmatig om te sê hulle sal regeer “tot met die wederkoms”, dan sal daar ’n massa-bekering moet plaasvind. Hulle sal met berou en belydenis en met ootmoed voor die HERE moet kom buig.
Elke leier en werker op elke terrein, van die munisipale amptenaar tot by die Staatspresident en die tradisionele leiers... elkeen sal volgens Bybelse standaarde moet optree.
Elke “hamer” wat onskuldige mense, en reg en geregtigheid, stukkend slaan, sal self stukkend gebreek word.
Maar ook jy as individu is ’n hamer. Met ’n hamer kan jy skoene versool, ’n dak opsit, duikklop doen, maar jy kan ook ruite uitslaan en ’n muur daarmee stukkend slaan en afbreek. Watter soort hamer gaan jy vandag wees? Hoe gaan jy jou hamer gebruik? Om mee te bou of te breek?
