22/04/2026
Pioniers vir Christus hou op die naweek van 17-19 April olv. Yvette Greeff, Dr. Hester en Stephanus Jansen van Rensburg, deel van Heal the Land Ministries, weer ‘n kamp te Goedgeloof plaas van oom Pieta en tannie Marie by Bloedrivierpoort.
Hierdie keer het ons gegaan met ‘n mandaat om ‘n kruis te plant.
Die kruis is nie net bloot ‘n simbool dat ons glo nie maar dra ‘n boodskap.
‘n Boodskap wat oor die hele kontrei verklaar dat ons Koning Jesus nie net die Koning van ons Harte is nie maar van ons land.
Ons het die kruis self by die berg opgedra en besef dat ons almal Barabasse is vir wie Jesus kom instaan het.
Dit was kosbaar!
Die hele naweek was kosbaar!
Die kruisplant dra ewigheidswaarde en sal vir generasies nog oorvertel word.
Ons het heerlik gelag en is werklik - al was die optog en om alles aan Jesus oor te gee nie maklik nie - na groen weivelde gelei en na waters waar rus is want ons het die Saterdagaand ‘n besonderse tyd meegemaak waar ons die teenwoordigheid van die Heilige Gees so tasbaar kon beleef.
Soos die dissipels van ouds in die bokamer gewag het op die Heilige Gees het ons gewag en is waarlik bekragtig.
Baie jong mense het met vrae die naweek ingegaan en weggeloop met antwoorde op juis daardie vrae!
Ons verklaar JESUS oor Goedgeloof, Bloedrivierpoort, die boere en al die plase se inwoners, Bloedrivier, Utrecht, Vryheid - Zululand en natuurlik ook ons mooie Suid Afrika!
Ons bid soos in die Onse Vader en vertrou dat Sy Koninkryk hier op aarde sal kom net soos in die hemel!!
Ons eer ons Almagtige Skepper vir jong harte wat die lewe gekies het en wat vry is en wat opstaan en daadwerklik soek en honger is vir die Waarheid - Jesus!
Wie die Seun vry maak is waarlik vry!
Die visie vir PvC word vervat in Jesaja 6:8 - Hier is ek Here, stuur my!
Hierdie jongmense is aan die brand om ‘n verskil te maak in die wêreld.
Voorwaar PIONIERS vir Christus!
