26/06/2026
Rosyne, ‘n natuurlike peuselhappie met soveel gesondheidsvoordele en definitief iets wat amper elke vrou wat bak en brou in haar huis aanhou. Op Donderdag 18 Junie 2026 kuier Pierré van Heerden van Red Sun Raisins by die dames van VLV Vredendal – Sirkel Namakwaland om hulle meer te leer oor hierdie uitstekende bron van natuurlike energie, vitamiene en minerale. Die dames van Landbou en Tuinbou het die program aangebied. Daar word wêreldwyd tussen 1,2 en 1,3 miljoen ton rosyne per jaar geproduseer. Dit is ‘n goeie bedryf om in te wees aangesien aanbod en aanvraag mekaar basies uitbalanseer. Brittanje gebruik per kapita die meeste rosyntjies per kop. Die Noordelike halfrond produseer ongeveer 80% van die wêreld se rosyne. Die Golden variëteit is skaars en gesog en maak 10% uit van die 80%. Dit is baie uitdagend om te produseer, die druif se suikergehalte moet nie meer as 20 grade balling wees nie en dit moet in die skaduwee droog raak. Iran was die land wat die meeste rosyntjies geproduseer het in 2025. Amerika was altyd die grooste produsent van Thompson rosyne, maar a.g.v. hoë arbeidskostes is meeste wingerde vervang met amandelbome. Indië en China is tans in die voorlyn met produksie. Die produksie van rosyne is baie winsgewend. Suid Afrika werk met ‘n uitvoerproduk en alle rosyntjies word wêreldwyd teen dollar prys verkoop. Rosyne is ‘n voedselproduk en die produsent word as sulks geoudit op dieselfde basis as die van tafeldruiwe. Die gradering van die produk is keurgraad, standaard graad en industriële graad. Die “sell by date “ begin wanneer die puntjie van die rosyn afgekap word waar die stingeltjie aan die korrel vassit. Rosyne kan vir agt tot nege maande vandat dit weg is by die plaas by die verwerkingsaanleg staan vir beroking ens. voordat dit verpak word. Golden elite en Thompson bruin rosyne is algemeen bekend in ons area. Dit word gemaak van wit kultivars. Die korrels verbruin tydens die drogingsproses, die kleur hang alles af van die suikergehalte van die druiwe. Korente word, in die hele Suid Afrika, net in die Olifantrivier area geproduseer. Dis ‘n wispelturige, onvoorspelbare kultivar. Turkye is ons grootste kompetisie wat korente betref. Jumbo rosyne word gesondroog en tafeldruif korrels wat nie geskik is vir uitvoer nie word hiervoor gebruik. Medium rosyne het die grootste geldwaarde aangesien daar baie meer in gebak gebruik word. Die Flame kultivar is die gewildste vir die maak van rosyne aangesien dit maklik is om te produseer. Die eerste rosyn verpakkingsaanleg in die Weskaap word eersdaags opgerig in Vredendal. Die dames is baie opgewonde oor hierdie vooruitsig aangesien die publiek vars rosyne direk by die aanleg van Red Sun Raisins sal kan aankoop.
Tussendeur al die inligting en goeie nuus het die gewone sake darem ook aandag gekry. Helene van Zyl open die vergadering op gepaste wyse met ‘n mooi voorlesing en gebed. Ons tak voel geëerd met die spesiale besoek van ons Sirkelpresident, Mev. Joretha de Waal, dit is altyd lekker as sy saamkuier. Hester du Plessis vertel die dames meer van die Rooi-Ivoorboom en die Wilde Olyfboom wat die twee bome van die jaar is asook van die Swart Swerwer wat die voël van die jaar is. Elmarie Fouché laat die dames raai watter voëlgeluide hulle hoor en die wenner wat die meeste voëls kon uitken was Adéle de Vries. Die verjaardagdames vir die maand is Marda Albertyn en Sarlene Coetzee. Pat de Waal was die gelukkige wenner van die woekermandjie. Die dames het groente geskenk aan Vredendal se sopkombuis en dit is met groot dankbaarheid ontvang. Na afloop van die vergadering bedien die dames van Opvoeding en Kultuur die heerlikste lekkernye en tee. Die volgende vergadering sal gehou word op 16 Julie 2026 en sal aangebied word deur Kunste en Handvlyt. Vir meer besonderhede kan die Voorsitter, Elmarie Fouché gekontak word by 082 799 5929.
VLV Vredendal - Sirkel Namakwaland
Vroue-Landbouvereniging van Kaapland
