VLV Helderberg

13/08/2026

Na ‘n lang VLV vakansie was dit lekker om weer al die VLV vriendinne op Woensdag, 12 Augustus te sien en ook om Durbanville se Voorsitter, Etresia van der Ryst en Ondervoorsitter, Issie Jackson by Helderbergtak te ontvang.

Issie is die Sirkelsaamroeper: Kunste en Handvlyt (Sirkel Tygerberg) en sy het volgende jaar se skilderkunskompetisie item, naamlik skraapkuns, kom demonstreer. Terwyl Issie die 5 kunselemente verduidelik het, het lede op die “tafeldoeke” gekrabbel.

Etresia was ook aan die werk gesteek en het toesig gehou oor die nominasieproses vir volgende maand se bestuursverkiesing.

Natuurlik was “Ons krag lê in Spanwerk” ook nie afgeskeep nie en moes lede ‘n legkaart voltooi. Een stuk van die legkaart was egter weg en lede moes die weggelate gedeelte self inteken. Baie pret al lyk almal so ernstig op die foto’s.

Issie en Etresia baie dankie dat julle by ons kom kuier het en onthou - julle ken nou die pad Helderberg toe. Kom kuier gerus weer.

08/08/2026

13/06/2026

Lede van VLV Helderberg en vriendinne het Internasionale Brei in die Openbaardag by die koffiewinkel, Jack en Jules in 'The Sanctuary', 'n plaaslike winkelsentrum, gevier.

Ons het lekker gekuier en breiwenke gedeel.

11/06/2026

VLV Helderberg het die jaar afgeskop met ‘n klein spannetjie met groot planne.

Deur goeie kommunikasie en deursigtigheid het ons die uitdagings wat oor ons pad gekom het oorkom. Ons het as ‘n span doelwitte gestel, as ‘n span planne gemaak, as ‘n span besluite geneem, as ‘n span dit uitgevoer en as ‘n span sukses behaal.

En ons sou dit alles dieselfde gedoen het ongeag VLVK se tema van die jaar.

Vir ‘n bietjie pret is hierdie span in drie kleiner spanne verdeel en het ons in ‘n koeksister kompetisie teen mekaar meegeding. Tussen al die pret deur het sommiges darem ook iets nuuts geleer.

Elke span het ook op die dag waarop hulle gebak het uitdagings gehad. Een span het ‘n kragonderbreking gehad, ‘n ander span het motor probleme gehad en ‘n maagvirus het nog ‘n span besoek. As ons egter gesê het ons doen ‘n ding, doen ons dit en niks kry ons onder nie.

Die koeksisters is by die Junie-vergadering beoordeel. Die wenners was die Koeksister Queens. In die tweede plek was span Maseratie (die vorm van sommige koeksisters was die inspirasie vir die span se naam) en in die derde plek was die Stroopsoet Susters.

Ons sien uit na nog baie pret!

06/06/2026

Sirkel Tygerberg, baie dankie vir 'n heerlike aand - goeie kos en goeie geselskap. VLV Helderberg het baie pret gehad.

15/05/2026

Op Woensdag, 13 Mei 2026 het die storm bedaar en kon ons 'n slag uit die huis kom en saam met VLV vriendinne gaan kuier.

Dr Heinie Brand kom gesels by ons Opvoeding en Kultuurvergadering oor Samewerking.

"Samewerking gaan daaroor dat mense saamwerk om 'n gemeenskaplike doel te bereik, deur hul verskillende vaardighede, idees en energie te kombineer."

Dr Heinie se wens vir VLV Helderberg is:

"Mag u met die parate waaksaamheid van 'n kryger,.. waghou oor al die veranderlikes en kragte.. wat sigbaar mag word.. sonder om die geleentheid te verloor.. terwyl u kragtig bydra tot die dinamika van u organisasie"

06/05/2026

Ons het die voorrreg gehad om by Stand Brandweer te gaan kuier en hulle bietjie te bederf met lekker warm pannekoeke.

Wanneer 'n mens daar is besef jy net weereens watter ongelooflike taak hulle verrig om moeilike situasies uitmuntend te hanteer.

Ten spyte van die moeilike werk bly hulle altyd positief en vol humor, en het hulle ons met hartlike gasvryheid verwelkom.
Dit was voorwaar 'n baie aangename besoek en ons hoop om hulle meer in die toekoms te betrek.