19/02/2026
Die Groblersdal-saak is wéér uitgestel, hierdie keer na 12–14 Mei, aangesien die staatsaanklaer siek is. Hoewel ons begrip en simpatie het vir die omstandighede, bly dit teleurstellend dat die verrigtinge nie soos beplan kon voortgaan nie.
Ons advokate en prokureurs het formeel beswaar aangeteken teen die herhaaldelike uitstel van die saak. Hierdie aangeleentheid duur reeds langer as twee jaar voort, en die voortdurende vertraging plaas ’n beduidende finansiële én emosionele las op ons. Dit gaan nie slegs oor die oplopende koste van regsverteenwoordiging nie, maar ook oor die persoonlike tol wat so ’n uitgerekte proses op ons en ons gesinne eis.
Nieteenstaande hierdie uitdagings bly ons standvastig in ons vertroue dat geregtigheid uiteindelik sal geskied. Ons glo dat wanneer al die feite behoorlik en objektief oorweeg word, ons onskuld duidelik sal blyk. Ons sal nie swig voor ’n burokratiese aanslag wat daarop gemik is om ons te benadeel of te vernietig nie. Met vasberadenheid en waardigheid sal ons hierdie proses tot die einde deursien.
Ons is opreg dankbaar vir die ondersteuning, gebede en bemoediging wat ons voortdurend ontvang. Dit versterk ons en gee ons die moed om aan te hou.
Ons sal u op hoogte hou van enige verdere verwikkelinge rakende die saak.
