Die Voortrekkers Tierkop Kommando

13/04/2026

Tierkop se mense wens vir Stefan en Ruan sterkte toe vir vanaand se Hoofleierswag vraestel.

02/03/2026

𝗝𝗮𝗮𝗿𝘃𝗲𝗿𝗴𝗮𝗱𝗲𝗿𝗶𝗻𝗴, 𝗯𝗿𝗮𝗮𝗶𝘃𝗹𝗲𝗶𝘀𝘃𝘂𝗿𝗲, 𝘀𝗽𝗿𝗶𝗻𝗴𝗸𝗮𝘀𝘁𝗲𝗲𝗹 𝗲𝗻 𝗕𝗶𝗻𝗴𝗼
Vrydagaand het ons jaarvergadering gehou by die spankamers met Tierkop se ouers terwyl die kinders met spanbyeenkoms besig was. Dankie vir elke ouer wat daar was en entoesiasties saam gesels het oor ons program vir die jaar. Saam is planne gemaak en hulp aangebied om ook ons uitdagings aan te spreek. Na afloop van die jaarvergadering was die ouers die toeskouers by hul kinders se vlagstrykingseremonie.

Daarna is die vure aangesteek en het die springkasteel verrys wat vir groot pret en ’n feestelikheid atmosfeer gesorg het. Terwyl die kinders baljaar het offisiere en ouers mekaar leer ken met ’n lekker kenmekaar Bingo aktiwiteit.

Dankie aan almal wat teenwoordig was. Kyk uit vir die volgende gesinsaktiwiteit.

26/02/2026

26/02/2026

𝗘𝗲𝗿𝘀𝘁𝗲 𝗸𝗮𝗺𝗽 𝘃𝗶𝗿 𝗱𝗶𝗲 𝗷𝗮𝗮𝗿

Sommer op 'n Vrydagaand na spanbyeenkoms slaan ons tent op by die spankamers om die aand daar oor te slaap. 'n Klein tentedorpie verrys. Party kinders bring nuwe tente wat nog nie voorheen gebruik is nie en is opgewonde oor die eerste keer se opslaan, ander se tente het nie al die paaltjies of toue nie, maar ons kry genoeg tente staangemaak sodat almal met slaapsakke en kussings kan intrek en nesskrop. Dit was een groot geselligheid en lekkerte.

26/02/2026

𝗔𝗮𝗻𝗱 𝗮𝘃𝗼𝗻𝘁𝘂𝗿𝗲 𝘁𝘆𝗱𝗲𝗻𝘀 𝗼𝗻𝘀 𝘂𝗶𝘁𝗸𝗮𝗺𝗽𝗮𝗮𝗻𝗱

Die 2026 jaartema van Die Voortrekkers is 𝘝𝘰𝘰𝘳𝘵𝘳𝘦𝘬𝘬𝘦𝘳𝘴 𝘪𝘴 𝘭𝘪𝘨𝘥𝘳𝘢𝘦𝘳𝘴 𝘪𝘯 𝘥𝘪𝘦 𝘸𝘦̂𝘳𝘦𝘭𝘥. Terwyl die kleinste Voortrekkers in hul slaapsakke in die saal lê en luister na 'n slaaptydstorie, maak die groter kinders gereed vir 'n aand avontuur. Op verskillende punte wag offisiere vir die kinders om opdragte te kry en raaisels op te los. Die tema van hierdie aktiwiteit is 𝘥𝘪𝘦 𝘰𝘯𝘵𝘸𝘪𝘬𝘬𝘦𝘭𝘪𝘯𝘨 𝘷𝘢𝘯 𝘣𝘦𝘭𝘪𝘨𝘵𝘪𝘯𝘨 𝘥𝘦𝘶𝘳 𝘥𝘪𝘦 𝘦𝘦𝘶𝘦. Terug by die spankamers wag 'n vuurtjie om malvalekkers te braai terwyl nog verder gekuier word voor almal inkruip na 'n beker warm sjokolade.

30/01/2026

Spanwerk maak sterk

Die spanstelsel waarmee Die Voortrekkers werk is ’n groot bate. Nie net gee dit vir die individu ’n plek in ’n kleingroep waar lief en leed gedeel word nie dit ontwikkel ook die vermoë om met ander te kan saamwerk, saam kreatief te wees en saam probleme op te los.
Dis in ’n span waar jy leer hoe om verskillende persoonlikhede te akkommodeer, waar jy empatie leer, mekaar in ag te neem en spanmaats se sterkpunte en talente raaksien en gebruik tot voordeel van die span. Dis dan ook geen wonder dat die vermoë om in ’n span te kan saamwerk so ’n belangrike vaardigheid is eendag wanneer jy in ’n werk staan.
Ons foto’s wys hoe spanwerk in Die Voortrekkers ook groot pret kan raak.

27/01/2026

Terwyl ek blaai deur verlede jaar se afsluitingsfunksie se foto’s kyk ek na die kinders se gesigte terwyl hulle toekennings, kentekens en erkenning kry vir alles wat hulle die jaar geleer en vermag het.
Opnuut besef ek, Die Voortrekkers voeg baie waarde toe tot kinders se lewens. In jou span saam met jou maats voel jy tuis en jou spanoffisier is trots op julle. Elke jaar groei ’n span saam. Voortrekkers delf baie dieper, ons hou nie kinders bloot besig nie.
Kinders word ouer, hulle leer al meer vaardighede aan en hul persoonlikhede ontwikkel en les bes jong leiers ontwikkel wat elke jaar meer gereed raak vir hulle pad na skool eendag.
Voortrekkerwees skep gedeelde ervarings vir kinders, ‘n plek waar hulle veilig kan ontwikkel, hulself kan leer verstaan, tree vir tree uitdagings baasraak en nader aan hul Skepper . Die Voortrekkers is die plek waar jou kind vandag moet wees.

23/01/2026

Trap der Jeugd...

Met die skryf van die jaarverslag van Tierkop se bedryfwighede in 2025 herleef jy weer ’n hele paar hoogtepunte om te bêre in ons kommando se storie vir die kinders en volwassenes om eendag te onthou. Ons het onder andere Afrikaans 100 gevier deur deel te neem aan Die Voortrekkers se Trap der Jeugd projek. Nie net het ons 566km getrap vir Afrikaans nie. Ons het ook daardie dag R4600 ingesamel vir die bedreigde Afrika Brilpikkewyn.

Dankie aan ons groep fietsryers se toewyding. Dit was ’n lekker pret dag.

22/01/2026

Dit is amper weer tyd.
Wanneer jy tradisionele boeresport, meel, water, kinders met baie energie, ouers wat entoesiasties ondersteun van die kantlyn af, koeldranke en stapels hamburgers bymekaar gooi kry jy Tierkop Voortrekkers se jaarlikse Opedag. Moet dan ook nie die spontaniteit van Tierkop se volwassenes buite rekening laat nie.
Ons maak reg om weer so te maak eerskomende Vrydag, 23 Januarie, by ons spankamers in Culemborgstraat. Daar is plek vir man en muis. Bring jou kinders en kom deel in die lekker samesyn en ontspan so op die einde van ’n werksweek.
Die Voortrekkers – die plek waar jou kind ’n tuiste weg van die huis af kan vind.

15/01/2026

🎉 Dis amper tyd! Ons begin hierdie Vrydag weer met Voortrekkers, 17:30, en op die 24ste hou ons ’n Opedag.
Nooi gerus vriende en familie – nuwe lede is baie welkom! 🌿🔥