In Orania word dit snerpend koud en bloedig warm en sommer skielik kom jy agter dat man en muis niks het om aan te trek nie. Kimberley en Bloemfontein is baie ver en 30 minute van Orania het Hopetown maar net ’n pieperige kettingwinkeltjie. Noodsaaklike klere wat jou kind pas, skop jy nie sommer agter elke bos uit nie. Dit is ver en hoendertande-skaars.
Vanjaar sit ek hier in dieselfde bootjie met ’n kind wat uit alles gegroei het. Ek het hoog en laag gesoek maar kon regtig niks kry wat haar pas nie. My ma se wyse woorde het toe ingeskop. “Naaldwerk! Enige vrou kan!”
As ek so my ma se sê-goed in my gedagtes hoor, dan voel ek sommer nader aan haar. Ek kan my goed verbeel dat sy oorkant my sit en verduidelik waar en hoe Dawid die wortels gegrawe het. Een van die vele dinge wat sy my geleer het, is dat enige een naaldwerk kan doen. Ag, ek het soveel keer in moedeloosheid gehuil as sy my alles oor en oor laat los torring het. Sy het net aangehou om te sê dat die eerste ding wat alle meisies kan leer is naaldwerk. Selfs al d**k jy nie so nie, álmal kan naaldwerk leer.
Om vandag naaldwerk te kan doen is nie so algemeen nie. Daar is twee groepe vroue. Die een klomp het ’n hele spul letsels van hul ongeduldige ma’s en kwaai juffrouens wat hulle geleer het. Hulle was seker so moedeloos dat hulle tot vandag toe weier om ’n steek te werk. Die ander groep vroue kan doodeenvoudig nie naaldwerk doen nie. Hulle is nooit op skool geleer nie. Hulle het ook nie ma’s gehad wat hulle gedwing het nie. Klere was op ’n stadium goedkoop en maklik verkrygbaar. So is dit die hartseer realiteit dat baie van ons nie naaldwerk kan doen nie.
In Orania het ons met ’n projek begin om elke vrou te help en te leer om weer naaldwerk te doen. Hierdie is nie maar net ’n selfverbeteringskursus nie. Nee, die klere wat ons hier maak, maak ons vir ons eie huis.
As jy selfvertroue kort, kan jy dit hier kom kry - ons begin met makliker dinge. Orania vroue wat nie weet hoe nie, kan kom leer. Ons het ’n begaafde inwoner wat opgewonde is om haar kennis met ons te deel. Dit is ook ’n wonderlike geleentheid om te kom kuier en saam te werk.
Sodat dit regtig vir almal moontlik kan wees om te begin leer, het ons naaldwerkmasjiene, materiaal en garing nodig. Ons benodig spesifiek sweetpakmateriaal of rekstof en naaldwerkmasjiene wat in ’n werkende toestand is. Enige een kan natuurlik ook vir ons ’n geldelike donasie maak, sodat ons voorraad kan aankoop.
Die projek se naam is ‘Stik vir Geluk’! Ons weet sommer dat ons kinders, mans en natuurlik ons vroue self baie van die nuwe klere gaan hou en dat dit ons heelwat vreugde en geluk gaan bring! Ons beoog ook om só goed te vorder dat ons in die toekoms ’n besigheid in Orania sal kan begin. Dit is ’n langtermynvisie om eie produkte met ’n eie unieke etiket te verkoop.
Word só deel van STIK VIR GELUK:
· Skenk ’n masjien wat in ’n werkende toestand is, wat jy nie meer gebruik nie.
· Skenk materiaal en garing wat jy nie meer nodig het nie.
· Maak ’n donasie sodat ons voorraad kan aankoop.
· Kom werk elke week saam! Bring jou eie masjien en materiaal.
· Of kom net soos jy is, en ons sal vir jou lap en masjiene gereed hê.
Kontak vir Karin Bain (082 532 1620) as jy op enige wyse by hierdie projek betrokke wil raak, of indien jy enige navrae het.
