Penpunt Skryfdinge

06/10/2026

https://penpunt.wordpress.com/2026/10/06/wat-die-witbors-wou-se/

Daar is talle geheime wat ontrafel moet word wanneer 'n ontstellende ontdekking gemaak word op die dorpserf

12/09/2026

Daar is ’n hele rits baie geldige redes waarom ek gesukkel het om my tande te kry in Jo & Sue, en daarna aanvanklik gespook het om ’n duik te begin maak in 635 bladsye. Chanette Paul se vermoë boeiend te skryf is allermins een van daardie redes. Dink eerder: fisio-assistent speel, voltydse versorger, onderbreekte slaap, en algemene onvermoë om te konsentreer. Die Calitz-slette met hulle kru taalgebruik was ook nie ’n goeie aanmoediging nie onder sulke omstandighede nie.

Enkele dae gelede was daar egter ’n deurbraak en daarná was daar nie keer aan nie. Vier uiteenlopende vroue, twee met losse sedes, ’n matriarg wat die spulletjie aanmekaar moet hou, die jongste so lelieblank (letterlik) dat sy ten prooi val van ’n gevaarlike sekte. Dan is daar die manne wat elkeen op sy beurt ’n belangrike rol te spele het in die storielyn.

Casper Calitz, die familiehoof, is vir jare vervreemd van sy nasate, maar laat sy boedel na aan die vier vroue. Dit klink op die oog af na uitkoms vir Jo, wat in groot finansiële verknorsing is, en vir Nan, wat gevra is om voortydig met pensioen te gaan. Totdat hulle Maanschijnbaai toe gaan en die erfposie gade slaan. “’n Kasarm. Uitgestrek. Grotesk. Verwaarloos. En verskriklik turkoois. Dis nou behalwe vir die pers en pienk en lemmetjiegroen deure en vensterrame.” (p.51)

Voeg daarby ’n pienk Cadillac, Hiërofant, Casper se winkel wat kristalle verkoop, ’n uitgebreide boekery en ’n drie-jaar klousule in die testament, en die intrige is groot. Selfs die eksentrieke Gaudi-boustyl word bygesleep om nog verdere kleur te gee. Daar is soveel elemente aan die verhaal, onder andere liefde, erfskandes, bedrog, geweld, en godsdienstige verleiding.

Die Maanschijnbaai-tweeluik is vyftien jaar gelede geskryf en nou hersien. Die nuwe buiteblaaie is besonder treffend en ’n waardevolle toevoeging tot my groeiende versameling van Chanette Paul se boeke. Die nuwe uitgawes is uitgegee deur Lapa Uitgewers en is in gedrukte, sowel as e-boekformaat beskikbaar.

22/08/2026

Wat ’n opwindende skooluitstappie moes wees vir Chloe, Mbali en Dante, ontaard in ’n lewensbedreigende nagmerrie. Hulle is saam met twee onderwysers op pad na ’n wetenskap-ekspo in KwaZulu-Natal. Reeds onderweg ry hulle onder swaar donderweer en reën, en uiteindelik moet die hele ekspo verdaag. Deelnemers word aangeraai om so vinnig moontlik uit die gebied te kom.
Net na die storm is letterlik en figuurlik ’n meesleurende verhaal wat afspeel oor vyf dae. Hulle skoolbussie word deur vloedwater van ’n brug afgespoel. Wat volg is ’n intense verhaal van die stryd om oorlewing, van honger en dors, van lewensverlies, ernstige beserings. Die uitdagende omstandighede bring interessante karaktertrekke van die kinders na vore, eienskappe wat skrywer, An-Mari Do Carmo, vernuftig inspan om diepte aan die verhaal te gee.
Die traumatiese effek van ’n natuurramp word goed oorgedra deur middel van ’n storie waarby tieners kan aanklank vind. Tieners, seuns sowel as dogters, behoort hierdie storie te geniet. Dit beklemtoon die veelsydigheid waarmee An-Mari Do Carmo vir haarself ’n nis uitkerf in die tienerboekmark.
Lapa Uitgewers het ook ’n e-boek beskikbaar gemaak, en natuurlik is die gedrukte weergawe vrylik beskikbaar in die boekemark.

21/08/2026

Die finaliste vir die ATKV 2026 Woordveertjies is bekendgemaak:

Die wenners sal vanaf 16-18 September op die ATKV se Facebook-blad bekendgemaak word.

Finaliste (alfabeties gelys volgens van) in die volgende kategorieë, sluit in:
ATKV-Prosaprys
Patmos – Willem Anker (Queillerie)
Op pad na ’n klooster in die sneeu – Johannes de Villiers (Human & Rousseau)
Twyfelbos – François Loots (Human & Rousseau)

Prys vir Liefdesroman
Die man van elders – Helene de K**k (Human & Rousseau)
Sterre is vir altyd – Sophia Kapp (Boekdiva Uitgewers)
Déjà vu – Chanette Paul (LAPA Uitgewers)

Prys vir Poësie
Vloei/stof – Gilbert Gibson (Protea Boekhuis)
Kategismus – Daniel Hugo (Turksvy Publikasies)
Waterman – Herman Wasserman (Queillerie)

Prys vir Romanses
In ’n sprokie verweef – Rina Cilliers (Romanza)
’n Man met ’n plan – Elize Davies (Romanza)
Passie in Parys – Tosca de Villiers (Romanza)

Prys vir Spanningslektuur
Roulette – Sidney Gilroy (Human & Rousseau)
Skorpio – Deon Meyer (Human & Rousseau)
Die drie weduwees – Irma Venter (Tafelberg)

Prys vir Dramateks
Jantjiebêrend en dassiepis – Marquen Carstens
Grenslig – Sue Diepeveen en Johan van der Merwe
Deur die donker uur – Nicola Hanekom

Prys vir Niefiksie
Landuit – Zirk van den Berg (Tafelberg)
Die uitvaart – Carla van der Spuy (Protea Boekhuis)
My jaar van vrees en vryheid – Marita van der Vyver (Tafelberg)

Van harte geluk aan die genomineerdes

18/08/2026

Die titel van Elsa Winckler se nuwe roman, ’n Ierse knoop, vat die essensie van die storielyn baie goed vas. Neem vier Ierse broers, voeg daarby vier aantreklike, intelligente vriendinne, en jy het die resep vir ’n stewige romantiese knoop. Volgens tradisie het ’n Ierse knoop (Celtic cross) oneindige lyne wat vervleg sodat die onderskeid vervaag, inderdaad wat gebeur wanneer die O’Connor broers vinnig elkeen sy gunsteling vind onder die vier dames wat hulle voorgenome ontwikkeling in Fynbosbaai teëstaan.
“Ierse stories het selde ’n happy ending.” (p.153) Al die broers deel Liam se fatalistiese siening oor verhoudings, voortspruitend uit die voorbeeld van hulle ouers se huwelik. Dit spreek dus vanself dat daar oorgenoeg konflik gaan wees namate die vier verhoudings sukkel om op dreef te kom. Voeg verder daarby, afdreiging, perlemoenstropery en onopgeloste verdwynings.
Ek het die boek begin lees met die verwagting dat één van die broers ’n volatiele verhouding gaan aanknoop met één van die vriendinne, wat ’n reeks sou impliseer. Die skrywer het egter verras deur vier komplekse verhoudings te skep in een boek. Dit het uiteraard uitdagings gestel met agt hoofkarakters wat om die beurt fokaliseer. ’n Paar foute het ongelukkig deurgeglip, maar aanhangers sal steeds lekker kan lees en tevrede wees met die tradisionele gelukkige einde.
’n Ierse knoop is uitgegee deur Lapa, ’n afdeling van Penguin Random House SA. Die roman is ook in e-boekformaat beskikbaar

13/08/2026

Grensloos, die nuwe spanningsverhaal deur Wilna Adriaanse, het weereens bevestig dat ek met vrymoedigheid ’n boek van hierdie skrywer kan optel sonder om vooraf te weet waaroor die storielyn handel. Telkens slaag sy daarin om te boei, jou te laat naels kou en aan die lees te hou, al is dit reeds vlak voor middernag.

“Mense gaan tekere oor slaggate en die water en elektrisiteit, maar op ’n manier kan jy met dit alles ’n plan maak. As kinders gebreek word, is daar nie genoeg gom of sellotape in die wêreld om hulle weer aanmekaar te plak nie.” (p.59) Hierdie uitspraak is gemaak in die leefwêreld van Max Krige, waar hy telkens met sulke situasies gekonfronteer word, terwyl sy eie kinderjare ook letsels gelaat het. Sabine Maartens, werksaam in die Okavango-delta, is ook die produk van gebreekte kinderjare.

Uit die aard van die sentrale tema, speel die verhaal af oor ’n kort tydperk. Die skrywer het wel met geduld die voorgeskiedenis stuk-stuk meegedeel, klein leidrade gelaat oor dit wat aanleiding gegee het tot die gyselaarsdrama aan die een kant, en die dikwels vreemde besluite en onverskrokke optrede van Sabine. Daar is geen sentimentele liefdebetuigings nie, maar daar is tog ’n lieflike verhaal tussen die lyne te bespeur, ook van lojaliteit, dapperheid en vriendskap.

Max Krige was enige tyd net so interessant en kompleks soos Sabine. Sy besondere vermoë om lyftaal te interpreteer, maak van hom ’n formidabele teenstaander in spannende situasies. Die Afrika spreekwoorde wat aan die begin van elke hoofstuk aangehaal word, is in die kol en komplimenteer die storielyn.

Grensloos is uitgegee deur Tafelberg, ’n gewilde druknaam van Jonathan Ball Uitgewers en is wyd beskikbaar in goeie boekwinkels en aanlyn.

31/07/2026

Soos dikwels die geval is met ’n Irma Joubert roman, lyk dit intimiderend, maar as jy begin lees verdwyn bladsye en hoofstukke werklik vinnig – tyd ook! Voor ek my oë kon uitvee, was dit knap na middernag en die laaste woorde gelees. Hierdie is een van die skrywers wat telkens verras met ’n vars aanslag, al is daar al baie geskryf oor oorloë en oorlewing.

Ek word maklik kriewelrig wanneer ’n karakter se ouderdom en sy of haar woorde en gedagtegang mekaar weerspreek. In Rebekka van Kameeldoornplaas kry Irma Joubert dit meesterlik reg om ’n bywonerkind presies só te laat klink wanneer sy vrees dat sy haarself gaan “te plettervrek” val, of moeite het om te praat asof met ’n warm patat in die mond. “‘Sorry Mêm ... Ma’am. It woun’t hêppen ... happen again.’ Dekselse patat.”(p.46) Baie vermaaklik ook was die ongeletterde Piet wat praat “sonder leestekens”.

Rebekka word as elfjarige deur haar pa verkoop en weggeneem Engeland toe om as kinderoppasser van twee kinders te werk, dit terwyl sy self maar ’n kind is. Die hartseer wat sy daar beleef, word treffend weergegee: “Die alleenwees elke aand word ’n swart monster met kloue wat om haar keel vasgryp en die huil uit haar oë wurg tot die kussing nat is.” (p.53)

Dit word ’n interessante reis saam met hierdie jong karakter wat merkwaardige deursettingsvermoë toon, deur die oorlog en later ook die vernietigende Spaanse griep. Die newekarakters is ewe goed ontwikkel. Die wending wat die verhaal na die einde se kant toe aangeneem het, het my grootliks verras en laat beslis die deur oop vir ’n opvolg.

Rebekka van Kameeldoornplaas is ’n publikasie van Lapa, ’n afdeling van Penguin Random House SA.

28/07/2026

Dit gons op Facebook. Daar is ’n oulike grys gediertetjie opgemerk op verskillende plekke in die land, by canolavelde, by Innibos, by die Centurion Teater. Die knaap het selfs ’n Facebookblad. Ek praat natuurlik van Bobbob, die robo-meerkat van die planeet Ploemplaf.
’n Ruimteskip val in die Kalahari en verloor sy nege ploemplafstene wat nodig is om terug te keer na sy planeet toe. Die eerste wat die robot sien is ’n meerkat, en hy neem summier ’n meerkatvorm aan. So begin die avontuur wat hom deur die nege provinsies gaan neem, en waartydens Bobbob en die aardbewoners baie van mekaar gaan leer.
Saam met twee boesmankinders gaan soek hy na duiwelsklou vir hulle oupa se artritis, of Skuur-Skarnier-Sindroom, soos dit op sy planeet bekend staan. Hy leer onder andere van “asseblief” en “dankie” en wat ‘n belofte beteken. Op hulle beurt hoor die kinders woorde wat ek met moeite sal kan neerskryf, sogenaamde nonsens woorde ,wat uitstekend is vir taalontwikkeling by kinders.
In die tweede boek gaan soek Bobbob die pers steen in Gauteng, en maak kennis met rugby, Gold Reef City en ’n springmielie-masjien. Die fyn humor is dalk meer gerig op volwassenes, oftewel vollengtes, terwyl die halflengtes bepaald die avonture sal geniet.
Hierdie reeks bied ’n geslaagde kombinasie van prenteboek en teks wat trae lesers beslis sal inspireer. Die illustrasies van Bernard de Jager is werklik uitsonderlik. Marion Erskine, met die hulp van Helené de Clercq, wys nou sy slag met kinderboeke, terwyl hy reeds sukses behaal het in ander genres soos radiodrama, jeugverhale en chicklit.
Die spiëlskrifleidraad aan die einde van elke boek, dui die volgende provinsie aan. Ek sien uit daarna om vir Bobbob te volg op sy reis deur die land.
Die Bobbob-reeks word uitgegee deur Tafelberg, ’n druknaam van Jonathan Ball Uitgewers.

28/07/2026

As jy aangeraak was deur Frenette van Wyk se bybelroman, Stryd vir liefde, kan jy by voorbaat merkpenne naderbring as jy die opvolgroman begin lees - en sommer ’n boks snesies ook. Om weer te dans is propvol geestelike waarhede en diepgaande menslike emosies.

In die hart van die verhaal is Jesus, die redder wat vergewe en vrymaak. “Hy het nie net gekom om wonders te doen nie. Die diepste betekenis van sy lewe is sy lyding en dood.” (p.181) Daarteenoor staan die onderskeie rolspelers se onvermoë om Sy volmaakte werk onvoorwaardelik te aanvaar en steeds hulle diepste seer wegsteek - ’n donker geheim wat Zivah saamdra, Miriam se gevoel van minderwaardigheid, Barabbas se obsessie om die Jode van Romeinse onderdrukking te bevry.

Dit is ook ’n tere liefdesverhaal. Hoewel die wyse Ezra vir Zivah rustigheid en liefde aanbied, is dit die ontembare Barabbas wat sy nie kan weerstaan nie. “Asof hulle mekaar se redding, maar ook mekaar se ondergang is.” (p.147)

Wanneer Barabbas uiteindelik vrykom van die wraak en geweld wat hom sy lewe lank gedryf het, kan hy verklaar: “Ek kan Hom ook nie met my verstand uitredeneer nie; Hy is iemand om met jou gees te verstaan.” (p.250) Ek glo elkeen wat bely dat hulle gelowig is, het nodig om hierdie waarheid, wat so treffend in die storielyn bygewerk is, hulle eie te maak.

Om weer te dans is uitgegee deur Luca, die geestelike druknaam van Lapa Uitgewers. Hierdie pragboek is ook beskikbaar in e-formaat wat jy op Amazon.com of die Lapa webwerf kan aanskaf. Die gedrukte boek is aanlyn of in goeie boekwinkels te vind.

28/07/2026

https://penpunt.wordpress.com/2026/07/28/vreemde-vos/

Op die oomblik het ek nie genoeg tyd of breinspasie om gewigtige prosawerke aan te pak nie. Ligter leesstof neem ’n groot deel van my leestyd op. Selfs by spanningsverhale verkies ek ’n goeie knuss…