08/06/2026
Die krag van Solidariteit
Waar kom Solidariteit se krag vandaan? Ek bedoel nie uit ’n geestelike oogpunt nie, want ons krag kom van ons Skepper.
Ek praat van ons ander bron van krag, gewone mense wat hard werk.
Solidariteit se voete staan stewig in die gemeenskap en ons werk vanuit die gemeenskap. Ons gemeenskap bestaan grootliks uit mense wat werk.
Ons put ons inspirasie uit mense wat in moeilike omstandighede steeds vorentoe beur en daar is vir mekaar.
Ek d**k aan Steve Scott uit die mynbedryf wat sy lewe vir medewerkers gegee het en vir 17 jaar president van Solidariteit was.
Ek d**k aan ons huidige president, Blackie Swarts, uit ’n staalfabriek, wat lede verteenwoordig soos enige regsgeleerde dit kan doen.
Ek d**k aan ons vise-president, Henk Kruger van Kathu, wat vir ’n mynboumaatskappy werk en voltyds sy tyd aan ander wy.
Ek d**k aan oom Giel Odendaal, reeds 50 jaar lid van Solidariteit, wat afgetrede lede op ons hoofraad verteenwoordig.
Ek d**k aan Deon de Vries, ’n gemeenskapsman in murg en been, wat tot onlangs by Sasol gewerk het en sedert 1985 lid van die Solidariteit-hoofraad is.
Ek d**k aan elke lid van ons hoofraad wat onbaatsugtig in diens van ‘n groter saak en ons lede is.
Ons hoofraad bestaan verder uit verteenwoordigers van die metaal- en ingenieursbedryf, Eskom, die mynbedryf, die chemiese bedryf, asook die finansiële, onderwys-, gesondheids- en regsektore.
Ons hoofraadslede vergader elke maand en gee aan ons mandate. Ons nasionale raad vergader jaarliks om verslae te ontvang en mosies en finansiële state goed te keur.
Elke bedryf het ’n bedryfsraad, en beroepsnetwerke het adviesrade.
Ons het honderde verteenwoordigers en adviesraadslede. Elke vyf jaar is daar ’n verkiesing vir al Solidariteit se verkose strukture.
Só word dit, wat ons lede beleef en wil hê, deurgegee aan ons voltydse amptenare. Ons is bloot in diens hiervan.
Dit is by hulle wat ons hoor wat die gevolge is wanneer produkte nie, weens gebrekkige spoorinfrastruktuur, na hawens vervoer kan word nie.
Dit is hulle wat kan vertel wat met smelters gebeur wanneer daar kragprobleme en wegholkragpryse is. Dit is hulle wat die prys sal betaal wanneer die Amerikaners se AGOA-wet sneuwel as gevolg van die regering se roekelose buitelandse beleid.
Dit is hulle wat korttyd werk wanneer daar ’n tekort aan skroot is. Dit is hulle wat met ’n permanente swaard van afleggings oor die kop leef.
Dit is hulle wat die druk in die onderwys ervaar wanneer die staat verder sentraliseer. Dit is hulle wat skielik met raseise in die regsektor gekonfronteer word.
Dit is hulle wat jaar ná jaar in rasverslae as oorverteenwoordig aangedui word. So kan ek aangaan.
Hulle is hoogs ingelig, want hulle staan op die voorfront van die werkstryd.
Dit is ook hulle wat besluit het dat Solidariteit moet bou. Dit is op hulle vergaderings waar besluit is dat Solidariteit-lede R10 per maand tot ’n boufonds moet bydra.
Dit is hulle wat goedgekeur het dat ons Helpende Hand, Sol-Tech, Akademia, Bo-Karoo Opleiding en vele meer moet begin.
Hulle is die hedendaagse helde van ons tyd.
Dit staan in skrille kontras met die enkele kommentators wat die krag van hierdie gewone mense onderskat omdat hulle dit nie verstaan nie.
Die enkelinge skep 'n strooipopwêreld waarin hulle Solidariteit kritiseer, terwyl die werklike Solidariteit by hulle verbygaan.
Solidariteit was nog altyd gewone mense wat in moeilike omstandighede planne maak vir die toekoms.
Mense wat nie wag vir beter tye nie, maar dit self help skep.
Dit is Solidariteit se krag.
