VLV Citrusdal

27/08/2026

’n Interessante en leersame oggend by Aan d’Oewer

Op Woensdagoggend, 12 Augustus 2026, het Citrusdal se VLV-dames en ’n paar gaste by Aan d’Oewer byeengekom vir ’n interessante vergadering wat deur die Gesondheidsgroep gereël is.

Gerrit Marais, wat reeds dertig jaar by Citrusdal Rollermeule werksaam is, het die dames meer vertel van die Rollermeule, die verskillende soorte graan en die verskillende stadiums van die maalproses. Hy het ook verduidelik wat die proteïeninhoud van meel beteken, hoeveel vog toelaatbaar is en nog heelwat interessante feite oor meel en die maalproses gedeel. Hierdie Rollermeule haal nie die “blom” uit die meel om koekmeelblom te vervaardig nie. Daarom is die witbroodmeelblom wat hier vervaardig word, geskik vir ’n groter verskeidenheid gebak as net brood.

Irene Jones, eienares van die bakkery, "The Valley Artisanal Bakery", wat op die perseel geleë is, en haar helper, Kundai, het meer vertel van die “sourdough”-suurdeegplantjie - hoe dit bewaar en gevoer moet word, asook van die knieproses en ander belangrike stappe. Kundai het daarna gewys hoe om focaccia-brood van die begin af, ook met dié suurdeegplantjie, te maak en te versier.

Die VLV en Mooi(er) Citrusdal het vertel van hul nuwe projek - waarvan die wins tot voordeel van die gemeenskap aangewend gaan word. Hulle gaan die bekende “groen boekie”, Ons Kerk in die Bo-Olifantsrivier, wat tydens die halfeeufeesviering in 1966 gedruk is, weer die lig laat sien. Só kan die geskiedenis en erfenis van ons dorp bewaar word en voortleef.

Daarna het die dames heerlik saamgekuier en gesmul aan die bakkery se heerlike gebak.

Voorwaar ’n aangename én leersame oggend!

23/06/2026

Op Woensdag, 10 Junie 2026, het Citrusdal VLV se gesondheidsvergadering in 'n warm en gesellige atmosfeer plaasgevind.

Carin-Mari Pienaar het die dames toegespreek oor gesondheid en gesonde eetgewoontes. Haar tema was: "Ons eet nie net om langer te leef nie; ons eet om beter te leef." Sy het waardevolle wenke gedeel oor hoe die regte voedselkeuses ons lewenskwaliteit kan verbeter.

Marianne van der Merwe het die vele voordele beklemtoon van stories lees vir ons kinders en kleinkinders. Sy het daarop gewys hoe dit nie net taalontwikkeling bevorder nie, maar ook kosbare herinneringe en sterker familiebande skep.

Susan Mostert het die voedingswaarde en gesondheidsvoordele van eiervrugte bespreek en ook van haar eie vars eiervrugte vir die marktafel gebring.

Die koue winteroggend is verder opgevrolik met heerlike warm sop en 'n warm kombersie vir elke dame — iets wat die oggend nog aangenamer gemaak het.

'n Gesellige kuier, interessante onderwerpe en goeie geselskap het weer eens bewys dat 'n VLV-byeenkoms veel meer is as net 'n vergadering. Baie dankie aan almal wat 'n heerlike oggend gereël het.

06/06/2026

25/05/2026

Op Woensdag, 20 Mei 2026, is Citrusdal VLV se herfsvergadering deur die dames van Openbare Sake op die plaas Karnemelksvlei naby Citrusdal aangebied.
Die gasspreker was Nita Brand, ’n prokureur van Worcester, wat die dames toegespreek het oor boedelbeplanning en die belangrikheid daarvan om alle nodige dokumente en inligting netjies in ’n lêer bymekaar te hou. Dit maak dit vir die familie baie makliker wanneer ’n boedel by die Meester van die Hof aangemeld moet word.

Sy het gesê: “Ware sorg eindig nie by die lewe nie — dit begin met beplanning.” Dit was werklik ’n interessante en waardevolle praatjie.

Marianne van der Merwe het die dames meer vertel van die voordele van sitrusvrugte. Verskillende soorte sitrusvrugte wat in die Vallei voorkom, is uitgestal, en sitrusvrugte is ook as bestanddeel in al die eetgoed gebruik.

Lizette van der Merwe se treffende openingswoorde, die herfsblare op die vloer en die pragtige herfsbome op die plaas het alles saam bygedra tot die besondere herfsatmosfeer van die oggend.

Die groep gestremdes, die Sterretjies, wat gereeld vergader, het oulike handwerk-items met ’n sitrustema gemaak.

Citrusdal VLV vier vanjaar in Mei sy 95ste bestaansjaar. Om dié besondere mylpaal te gedenk, het Sannie Laing, die oudste lid van die tak, ’n kers aangesteek.

09/05/2026

Op Woensdag, 22 April 2026, het Citrusdal se Leefstyl-dames ’n interessante oggend by Carina Brink se huis aangebied.

Elna Grobbelaar het meer vertel oor klerekasbeplanning, terwyl Carina vertel het wat in gedagte gehou moet word wanneer jy binnehuisversiering doen.

Dit was Wêreldboekedag en Susan Mostert het gesels oor die boek, Ida’s Line, wat die skryfster, Barbara Townsend, twee dae tevore by die dorpsbiblioteek kom bespreek het.

Daar is afskeid geneem van ‘n getroue VLV-lid, Marietjie Mostert, wat binnekort na Upington verhuis.