VLV Citrusdal

06/06/2026

25/05/2026

Op Woensdag, 20 Mei 2026, is Citrusdal VLV se herfsvergadering deur die dames van Openbare Sake op die plaas Karnemelksvlei naby Citrusdal aangebied.
Die gasspreker was Nita Brand, ’n prokureur van Worcester, wat die dames toegespreek het oor boedelbeplanning en die belangrikheid daarvan om alle nodige dokumente en inligting netjies in ’n lêer bymekaar te hou. Dit maak dit vir die familie baie makliker wanneer ’n boedel by die Meester van die Hof aangemeld moet word.

Sy het gesê: “Ware sorg eindig nie by die lewe nie — dit begin met beplanning.” Dit was werklik ’n interessante en waardevolle praatjie.

Marianne van der Merwe het die dames meer vertel van die voordele van sitrusvrugte. Verskillende soorte sitrusvrugte wat in die Vallei voorkom, is uitgestal, en sitrusvrugte is ook as bestanddeel in al die eetgoed gebruik.

Lizette van der Merwe se treffende openingswoorde, die herfsblare op die vloer en die pragtige herfsbome op die plaas het alles saam bygedra tot die besondere herfsatmosfeer van die oggend.

Die groep gestremdes, die Sterretjies, wat gereeld vergader, het oulike handwerk-items met ’n sitrustema gemaak.

Citrusdal VLV vier vanjaar in Mei sy 95ste bestaansjaar. Om dié besondere mylpaal te gedenk, het Sannie Laing, die oudste lid van die tak, ’n kers aangesteek.

09/05/2026

Op Woensdag, 22 April 2026, het Citrusdal se Leefstyl-dames ’n interessante oggend by Carina Brink se huis aangebied.

Elna Grobbelaar het meer vertel oor klerekasbeplanning, terwyl Carina vertel het wat in gedagte gehou moet word wanneer jy binnehuisversiering doen.

Dit was Wêreldboekedag en Susan Mostert het gesels oor die boek, Ida’s Line, wat die skryfster, Barbara Townsend, twee dae tevore by die dorpsbiblioteek kom bespreek het.

Daar is afskeid geneem van ‘n getroue VLV-lid, Marietjie Mostert, wat binnekort na Upington verhuis.

01/04/2026

Op Woensdag, 18 Maart 2026, het Citrusdal se Kuns- en Handvlyt-dames ’n Franse kunsoggend aangebied. Sagte Franse musiek het die perfekte atmosfeer geskep vir ’n oggend vol van kreatiwiteit.

Anita Cosnett het die dames gewys hoe om op klippe te verf, terwyl Corné in Lizette se afwesigheid as voorsitter waargeneem het. Sy het ook ’n gepaste stuk oor klippe, op Facebook gedeel deur Ilne Fourie, voorgelees.

Carina het praktiese wenke vir die huis gedeel.

Dit was ’n heerlike en gesellige oggend vol inspirasie en kuier—saam met fyn eetgoedjies met Franse name.

03/03/2026

Op Woensdag, 19 Februarie 2026, het die VLV (Opvoeding en Kultuur) 'n praatjie oor onderwys in die Kleinsaaltjie by Citrusdal Kerksaal gereël.

Zentie Groenewald van Noordhoek Primêr het die dames kom toespreek oor onderwys en die probleme wat sy daagliks by hulle skool ondervind.

Haar oupa, Jan Karolis, was vanaf 1958 die skoolhoof by Noordhoek Primêr en is deur haar ma opgevolg. Sy het dus in 'n opvoedershuis grootgeword. Sy het haar B Ed-graad behaal en is vanaf 2014 die graad een-onderwyseres by dieselfde skool.

Sy glo die kind moet in sy of haar totaliteit gevorm word en waardes moet reeds tuis aangeleer word. Elke huis en gemeenskap het sy eie kultuur. Kultuur is hoe hulle elke dag optree en moet reeds in die ouerhuis vasgelê word.

Reëls en dissipline hoort by opvoeding, en die aanleer van waardes is nie die onderwysers se werk nie, maar die ouers s'n.

Dit bly belangrik om elke skooldag met Godsdiens te begin. Om skoliere uit verskillende huise respek aan te leer, bly 'n uitdaging. Gelukkig het sy van die begin af baie ondersteuning van haar ouer kollegas gekry.

Stedelike skole het meer uitdagings met erger boeliegedrag. Kinders moet opgevoed word om hulle eendag in die grootmenswêreld te kan handhaaf.

Sy probeer probeer om 'n lees- en leerkultuur by haar leerlinge te kweek. Elke leerling moet op sy of haar eie vlak hanteer word. Al kan van die kinders nie baie doen nie, kan elke kind iets doen. Daar is sielkundiges van die WKOD wat kan help planne maak om elkeen se potensiaal te ontdek en te ontwikkel.

Die personeel van die skool probeer eers help waar hulle kan, en soek daarna hulp van buite. Personeel se toegewydheid en ingesteldheid moet reg wees. Daar is kinders wat akademies sukkel, maar byvoorbeeld 'n natuurlike aanleg vir atletiek het. Elkeen moet ontwikkel op sy eie vlak.

Onderwys bly steeds vir haar 'n vervullende werk.

GEMMER
Marianne van der Merwe het meer vertel van die voordele van die veelsydige gemmerwortel.

Gemmer kan gebruik word vir gemmertee, in gebak, vir bredies, gemmerstroop om oor roomys te gooi, vir inlê , marinade, naarheid, spysvertering en winderigheid.

Gemmer is ook goed vir gewrigte, bloedsirkulasie, as lugverfrisser saam met suurlemoen.

Gemmer en asyn is goed vir reuke, skoonmaak en om insekte weg te hou.

Gemmer is ook goed vir ontspanning, bv vir 'n voetbad. Saam met olie en sout kan dit ook as 'n lyfskrop gebruik word.

Daar word beplan om in Junie of Julie 'n groot pot sop vir 'n instansie te maak waarvoor elkeen selfgekweekte groente uit haar eie tuin moet bring.

Vrydag, 27 Maart, is dit nasionale melktertdag, en moet elkeen probeer om vir iemand 'n stukkie melktert, gekoop of selfgebak, te gee.

Daar was ook 'n uitstalling van indringerplante, bv Patterson curse wat pragtige blomme het, maar uitgeroei moet word.

Om aan te pas by die jaartema, nl. van tuin tot tafel, is daar gemmerbier, heerlike gemmerbrood en wortelkoek as verversings voorgesit.

08/02/2026

Op Woensdag, 21 Januarie 2026, het Citrusdal-VLV die jaar se bedrywighede op Karnemelksvlei by die voorsitter, Lizette van der Merwe, se huis afgeskop.

Sy het 'n oggendboodskap van NG Welgelegen voorgelees. Daarna het almal heerlik saamgekuier en heerlike vrugteslaai en joghurt is voorgesit —asook varsgebakte plaatkoekies met gouestroop en kaas.

𝗢𝗚𝗚𝗘𝗡𝗗𝗕𝗢𝗢𝗗𝗦𝗞𝗔𝗣: Maandag 5 Januarie 2026
’𝗻 𝗚𝗲𝗯𝗲𝗱 𝘃𝗶𝗿 𝗿𝗶𝗴𝘁𝗶𝗻𝗴
Spreuke 3: 5Vertrou volkome op die Here en moenie op jou eie insigte staatmaak nie. 6Ken Hom in alles wat jy doen en Hy sal jou die regte pad laat loop.
“Here, wys my die pad — selfs wanneer ek nie die kaart verstaan nie.”

Die nuwe jaar staan nog skoon en oop, maar dis ’n misleidende stilte. Want saam met die kalenderblaai kom die vrae: Wat nou? Watter pad? Wat los ek, wat hou ek vas? Spreuke 3 sê nie vir ons om slim te beplan en dán vir God te vra om dit te seën nie. Nee. Dit draai die volgorde om. Vertrou op die Here met jou hele hart. Nie halfpad nie. Nie net Sondae nie. Hele hart. Al die onsekerheid ingesluit.
Ons is nie die kaptein van die skip nie. God is. En dis goeie nuus. Want ons insig is beperk, ons perspektief kort, ons emosies soms luidrugtig en onbetroubaar. Die teks sê: Moenie op jou eie insig steun nie. Dis nie ’n belediging nie — dis ’n verligting. Jy hoef nie alles uit te "figure" nie. Jy hoef net te erken.

God belowe nie ’n volledige kaart nie; Hy belowe rigting. Hy sal jou paaie gelyk maak. Nie noodwendig maklik nie. Maar reg. Dis onderskeiding bo spoed. Dis luister voor hardloop. Dis vra voordat jy besluit. Dis om jou werk, jou bediening, jou gesin doelbewus onder God se heerskappy te plaas — nie as ’n bykomstigheid nie, maar as fondament.

So bid ons vandag nie: “Here, gee my al die antwoorde,” nie. Ons bid: “Here, lei my stap vir stap.” Want geloof is nie om alles te sien nie. Geloof is om te loop, al sien jy net genoeg lig vir die volgende tree.

En dis genoeg. Vir vandag.
GEBED: Hemelse Vader bepaal asb vandag my tree. Amen
Hettie Wessels

28/11/2025

Op Woensdag, 19 November 2025, was dit die jaarafsluiting van Citrusdal VLV by Kardouw in die Bo-rivier. Dit was ’n gesellige oggend in die vreedsame natuur. Almal het heerlik saamgekuier, lekker geëet en kersgeskenkies uitgeruil.