Diamant Vroue

22/07/2026

Op 25 Mei 2026 was Bettie Rall, sielkundige, aan die woord. Sy het ons kom herinner dat ons geestesgesondheid baie belangrik is en dat ons dit nie moet afskeep nie.

Die mees algemene uitdagings is angs, depressie, eensaamheid en "burnout".

Ons geloof en geestesgesondheid is inmekaar verweef. Die Bybel leer ons baie van emosies en swaarkry, maar dat daar hoop is vir ons in Christus.

Daar was nie net gesit en luister nie. Geen tyd om aan die slaap te raak nie, want daar was opgestaan en asemhaling geoefen.

Jy is wat jy d**k. Onthou wat God van jou sê.

22/07/2026

Maandagaand 18 Mei 2026 het die Diamante baie Kreatief geskitter onder die skitterende leiding van ons eie Kuns Juffrou, Lee-Ann Groenewald. Dit was 'n gemengde media kunsprojek. Daar is blare geverf. Lappe is geknip en geplak, Doilies het stensils geword. Die eindproduk het ons almal verstom gelaat. Eenvoudige tegnieke het ons almal soos gevorderde kunstenaars laat voel.

01/07/2026

Op Maandagaand 20 Apr 2026 gaan ons voort met ons Dissipelvrou reis. Hoe lyk dissipelskap in die gemeente?
Lydia, die purperverkoper in Hand 16 leer ons hoe om ander gelowiges te dien deur huisvesting en kos te verskaf. Sy het ook haar huis beskikbaar gestel as ʼn bymekaarkom plek. Daar is vele ander maniere om mekaar te dien.
Ons spog met ons Dissipelvrou T-hemde.
Sien mekaar by die volgende bestemming.

29/06/2026

Op Sondag 22 Maart het die Diamante geskitter tussen al die poedingbakke. Die opskep het lank voor kerk begin. ʼn Volle 227 bakkies poeding is verkoop. Daar is mos niks lekkerder as poeding op enige dag van die week nie.

29/06/2026

Maandagaand 16 Maart begin ons reis as Dissipelvroue.
Die reis help ons om:
Te verstaan wat dissipelskap beteken
Te groei in ons verhouding met God
Te ontdek hoe ons ons geloof kan uitleef by die huis, kerk en die wêreld asook in ons geestelike sfeer.

Maria van Betanië leer ons om by Jesus se voete te sit en te luister.

Julle moet in My bly en Ek in julle.
Joh 15:4-7

Dit begin alles in jou hart en nie in jou aktiwiteite nie.

Om te groei in iets, moet jy elke dag tyd daaraan spandeer. As Sonja elke dag gaan oefen om gholf te speel, sal sy ook ʼn professionele speler soos Luzelle kan word. Net so moet ons elke dag tyd spandeer met God.

19/04/2026

14/04/2026

Saterdagoggend 14 Mrt 2026 het ʼn paar van ons Diamant dames sommer vroeg-vroeg al geskitter. Sommige van ons het nog geslaap terwyl hulle al oppad was na die Helderberg Natuurreservaat in Somerset-Wes.

Daar is verskillende roetes om jouself te verloor in die natuur en sommer ʼn bietjie vars lug en oefening in te kry. Dis ʼn geval van ʼn paar vlieë met een klap slaan... iets waarvoor daar nie altyd tyd is nie.

ʼn Stap is ook nie afgehandel sonder ʼn paar peuselhappies na die tyd nie. Vir party was dit ontbyt. Vir ander was dit sommer net ʼn lekker bederf. Sommige het die rus geniet saam met die etery, want die spiere en die gewrigte wil eintlik maar naweek hou...

14/04/2026

Kosbare Diamant-vrou!
Ons kuier weer lekker saam op Maandag, 20 April wanneer ons ‘n bietjie prakties raak rondom die Woord. Ons wil baie graag met jou gesels en nooi jou ook om gerus jou bybel saam te bring. Sien jou Maandagaand!