12/08/2026
МАЛ ЭМНЭЛГИЙН ҮЙЛЧИЛГЭЭНИЙ НЭГДСЭН ЖИШИГ ТАРИФ БОЛОВСРУУЛЖ, МӨРДҮҮЛЭХ ТУХАЙ
Мал эмнэлгийн ерөнхий газрын удирдлага,
холбогдох албан хаагчдад
Монголын үндэсний Мал эмнэлгийн холбооноос мал эмнэлгийн тусламж, үйлчилгээний чанар, хүртээмж, тогтвортой байдлыг хангах, малын эмч, мал эмнэлгийн үйлчилгээний нэгжийн хөдөлмөрийн бодит өртөг, үнэлэмжийг зөв тогтоох, салбарын эдийн засгийн тогтвортой байдлыг дэмжих зорилгоор мал эмнэлгийн үйлчилгээний нэгдсэн жишиг тарифыг боловсруулж, үе шаттайгаар мөрдүүлэх шаардлагатай гэж үзэж байна.
Өнөөгийн нөхцөлд мал эмнэлгийн үйлчилгээний үнэ, тариф нь нутаг дэвсгэр, үйлчилгээ үзүүлэгч байгууллага, үйлчилгээний төрөл болон холбогдох зардлаас шалтгаалан харилцан адилгүй байгаа нь нэг талаас малын эмч, үйлчилгээний байгууллагын бодит зардлыг нөхөх боломжийг хязгаарлаж, нөгөө талаас малчин, иргэн, аж ахуйн нэгжид үйлчилгээний үнэ, чанарын талаар ойлгомжгүй байдал үүсгэж байна.
Иймд мал эмнэлгийн үйлчилгээний бодит өртөг, хөдөлмөрийн үнэлэмж, газар зүйн онцлог, зах зээлийн нөхцөлд тулгуурласан нэгдсэн аргачлал, жишиг тарифын тогтолцоог бий болгох нь зүйтэй гэж үзэж байна.
1. Хамтарсан ажлын хэсэг байгуулах тухай
Дээрх асуудлыг мэргэжлийн түвшинд судлан боловсруулж, хэрэгжүүлэх зорилгоор Мал эмнэлгийн ерөнхий газар, Монголын Үндэсний Мал Эмнэлгийн Холбоо, аймаг, нийслэлийн Мал эмнэлгийн байгууллага, салбар зөвлөл болон хувийн хэвшлийн мал эмнэлгийн үйлчилгээний нэгжүүдийн төлөөллийг оролцуулсан хамтарсан ажлын хэсэг байгуулах саналтай байна.
Ажлын хэсэг дараах үндсэн асуудлыг хэлэлцэн боловсруулна. Үүнд:
1. Мал эмнэлгийн тусламж, үйлчилгээний төрөл, ангиллыг шинэчлэн тодорхойлох;
2. Үйлчилгээ тус бүрийн хөдөлмөр, тээвэр, шатахуун, материал, эм, эмнэлгийн хэрэгсэл болон бусад шууд болон шууд бус зардлыг тооцох;
3. Малын эмчийн мэргэжлийн хөдөлмөрийн үнэлэмж, цагийн болон үйлчилгээний өртгийг тооцох аргачлал боловсруулах;
4. Хот, хөдөөгийн байршил, үйлчилгээний цэг хүртэлх зай, замын нөхцөл, малын төрөл, тоо хэмжээ, үйлчилгээний цар хүрээ, улирлын онцлогийг тарифын тооцоонд тусгах;
5. Төрөөс санхүүжүүлэх мал эмнэлгийн үйлчилгээ болон малчин, иргэн, аж ахуйн нэгж өөрөө хариуцах үйлчилгээний төрөл, санхүүжилтийн заагийг тодорхой болгох;
6. Яаралтай дуудлага, шөнийн болон амралтын өдөр, алслагдсан бүсэд үзүүлэх үйлчилгээний нэмэгдэл зардлыг тооцох зохицуулалт боловсруулах;
7. Мал эмнэлгийн лабораторийн шинжилгээ, оношилгоо, эмчилгээ, мэс ажилбар, урьдчилан сэргийлэх болон зөвлөх үйлчилгээний жишиг тарифыг ангилан тогтоох;
8. Инфляц, шатахуун, эм, эмнэлгийн хэрэгслийн үнэ болон бусад зах зээлийн өөрчлөлттэй уялдуулан тарифыг тогтмол шинэчлэх механизм бий болгох;
9. Батлагдсан жишиг тарифыг Мал эмнэлгийн нэгдсэн систем (МЭНС)-д байршуулж, үйлчилгээний бүртгэл, төлбөр тооцоо, тайлагнал болон хяналтын системтэй уялдуулах;
10. Мал эмнэлгийн үйлчилгээний чанар, тариф, төлбөрийн талаарх мэдээллийг малчин, иргэн, аж ахуйн нэгжид ил тод, ойлгомжтой хүргэх зохицуулалт боловсруулах.
2. Тариф боловсруулах аргачлал
Жишиг тарифыг зөвхөн зах зээлийн үнээр тогтоох бус, үйлчилгээний бодит өртөг + мэргэжлийн хөдөлмөрийн үнэлэмж + үйл ажиллагааны зардал + газар зүйн болон эрсдэлийн хүчин зүйл гэсэн зарчимд тулгуурлан боловсруулах нь зүйтэй.
Ингэснээр мал эмнэлгийн үйлчилгээний үнэ тариф нь малын эмч, үйлчилгээний байгууллагын тогтвортой үйл ажиллагааг хангахын зэрэгцээ малчин, иргэн, аж ахуйн нэгжид үндэслэлтэй, ил тод, ойлгомжтой байх боломж бүрдэнэ.
3. Хамтарсан уулзалт зохион байгуулах тухай
Дээрх ажлыг эхлүүлэх зорилгоор Мал эмнэлгийн ерөнхий газар болон Монголын Үндэсний Мал Эмнэлгийн Холбооны төлөөлөл оролцсон анхны хамтарсан уулзалтыг зохион байгуулж, дараах асуудлыг хэлэлцэн тохирох саналтай байна. Үүнд:
* Ажлын хэсгийн бүрэлдэхүүн;
* Ажлын хэсгийн ажиллах чиглэл, үүрэг;
* Тариф боловсруулах аргачлал;
* Судалгаа, мэдээлэл цуглуулах нэгдсэн загвар;
* Хэрэгжүүлэх ажлын үе шат, хугацаа;
* Тарифын төслийг боловсруулах, хэлэлцүүлэх, батлуулах үйл явц.
Монголын үндэсний Мал эмнэлгийн холбооны зүгээс энэхүү ажлын хүрээнд шаардлагатай судалгаа, мэдээлэл, мэргэжлийн санал, салбарын төлөөлөл болон хувийн мал эмнэлгийн үйлчилгээний нэгжүүдийн оролцоог бүрэн ханган хамтран ажиллахад бэлэн байна.
Иймд хамтарсан уулзалтыг зохион байгуулах боломжтой огноо, цагийн саналаа бидэнд ирүүлж, мал эмнэлгийн үйлчилгээний нэгдсэн жишиг тариф боловсруулах ажлыг хамтран эхлүүлэхийг хүсье.
МОНГОЛЫН ҮНДЭСНИЙ
МАЛ ЭМНЭЛГИЙН ХОЛБОО