SHMLM Kongresi i Manastirit- Pozharan

18/03/2026

17/03/2026

Donacion për Shkollën “Kongresi i Manastirit”

Me kënaqësi të veçantë njoftojmë se shkolla jonë ka pranuar një donacion të vlefshëm nga Dr. Adnan Neziri, Kryetar i Këshillit Drejtues të shkollës sonë.

Ky donacion përfshin një mikroskop në vlerë prej 400 euro, i cili do të shërbejë si një mjet i rëndësishëm didaktik për zhvillimin e mësimit praktik në lëndët shkencore, duke ndihmuar nxënësit tanë të thellojnë njohuritë dhe të rrisin interesimin për shkencën.

Shprehim mirënjohjen tonë të sinqertë për këtë kontribut të çmuar, i cili dëshmon përkushtimin dhe mbështetjen e vazhdueshme ndaj arsimit dhe avancimit të kushteve në shkollën tonë.

Faleminderit Dr. Adnan Neziri për mbështetjen dhe besimin!

16/03/2026

Sot, në kuadër të projektit PVH (Promovimi i Vlerave Humane) të organizuar nga Kryqi i Kuq i Kosovës, nxënësit e ShMLM "Kongresi i Manastirit" realizuan një aktivitet sensibilizues në bashkëpunim me nxënësit e SHFMU "Halil Alidema", në kuadër të projektit “Mjedisi dhe Riciklimi i Mbeturinave”.
Gjatë këtij aktiviteti, tre nxënës nga shkolla jonë realizuan tre piktura me tematikë mjedisore, përmes të cilave përcollën mesazhe për mbrojtjen dhe promovimin e mjedisit. Këto piktura u dërguan tek shkolla “Halil Alidema” si simbol bashkëpunimi dhe ndërgjegjësimi për ruajtjen e natyrës.
Në të njëjtën frymë, edhe nxënësit e kësaj shkolle realizuan tre piktura me mesazhe ekologjike, të cilat i sollën në shkollën tonë. Ky shkëmbim simbolik i pikturave tregon rëndësinë e bashkëpunimit ndërmjet nxënësve dhe shkollave në promovimin e vlerave humane dhe ndërgjegjësimin për mbrojtjen e mjedisit.
Aktivitete të tilla dëshmojnë se arti është një mjet i fuqishëm për të sensibilizuar të rinjtë dhe për të përcjellë mesazhe të rëndësishme për një mjedis më të pastër dhe më të shëndetshëm për të gjithë.

12/03/2026

Grupi i projektit “Mjedisi dhe Riciklimi i Mbeturinave”, në kuadër të projektit për promovimin e vlerave humane dhe ndërgjegjësimit mjedisor, ka realizuar disa aktivitete me qëllim përmirësimin e mjedisit dhe zhvillimin e kulturës ekologjike në komunitetin shkollor.

Një nga iniciativat synon krijimin e një tradite të re në Shkollën Fillore “Halil Alidema”, ku çdo nxënës që regjistrohet për herë të parë në klasën e parë do të sjellë një fidan ose bimë, duke kontribuar në gjelbërimin e hapësirave të shkollës. Si shembull, nxënësit e grupit të projektit do të dhurojnë 6 bimë për ambientet e shkollës, me synimin që kjo nismë të vazhdojë çdo vit.

Gjithashtu, në oborrin e ShMLM “Kongresi i Manastirit” është vendosur një kompostore për grumbullimin e mbetjeve organike. Përmes kompostimit, mbeturinat natyrore si gjethet dhe bari do të shndërrohen në pleh organik për mirëmbajtjen e hapësirave të gjelbra të shkollës.

Këto aktivitete synojnë të rrisin ndërgjegjësimin e nxënësve për mbrojtjen e mjedisit dhe rëndësinë e kujdesit ndaj natyrës.
Faleminderojm Z. Haxhi Qerimi drejtorin e Eco Higjena Vitii cili dhurojë kompostoren si donacion për shkollën në kuadër të projektit të PVH

05/03/2026

Në kuadër të projektit “Promovimi i Vlerave Humane (PVH)”, që po realizohet në bashkëpunim me Kryqi i Kuq i Kosovës, nxënësit e shkollës sonë ShMLM “Kongresi i Manastirit” po zhvillojnë aktivitete të ndryshme në fusha të rëndësishme shoqërore dhe mjedisore.
Në këtë kuadër, dy grupe të nxënësve, që po punojnë në projektet “Kundër Dhunës” dhe “Projekti Ndërkulturor për Promovimin e Bashkëjetesës dhe Tolerancës”, zhvilluan një takim me Komandantin e Policisë, Agim Demeri. Gjatë këtij takimi u diskutua rreth rëndësisë së bashkëpunimit ndërinstitucional për parandalimin e dhunës dhe promovimin e vlerave të tolerancës dhe mirëkuptimit në komunitet. Komandanti Demeri shprehu gatishmërinë për të mbështetur iniciativat e nxënësve dhe për të bashkëpunuar në realizimin me sukses të aktiviteteve të projektit.

Ndërkohë, grupi tjetër i nxënësve, që po punon në projektin “Mjedisi dhe Riciklimi i Mbeturinave”, realizoi një takim me drejtorin e ndërmarrjes Eko Higjiena, Haxhi Qerimi. Gjatë këtij takimi u diskutua për mundësitë e bashkëpunimit në realizimin e një pjese të rëndësishme të projektit, që lidhet me biodegradimin e materieve organike dhe krijimin e kompostit (plehut të gjelbër). Drejtori Qerimi mori përsipër sigurimin e një kompostoreje, e cila do të shërbejë si mjet praktik për nxënësit në procesin e të mësuarit rreth riciklimit dhe menaxhimit të qëndrueshëm të mbeturinave organike.
Këto takime dëshmojnë angazhimin dhe përkushtimin e nxënësve tanë për të kontribuar në ndërtimin e një shoqërie më të sigurt, më tolerante dhe më të përgjegjshme ndaj mjedisit, duke forcuar njëkohësisht bashkëpunimin me institucionet lokale dhe komunitetin.

04/03/2026

Bashkpunimi me Kryqin e Kuq të Kosovës në kuadër të projektit “Promovimi i Vlerave Humane”

Sot patëm një takim me grupin tonë dhe me drejtoreshën e shkollës fillore “Halil Alidema”, znj. Drita Pira, e cila tregoi gatishmërinë e saj për bashkëpunim me shkollën tonë rreth projektit që po realizohet në partneritet me Kryqin e Kuq të Kosovës.

Drejtoresha e shkollës fillore “Halil Alidema”, znj. Drita Pira, shprehu mbështetje të plotë për këtë iniciativë dhe vlerësoi rëndësinë e përfshirjes së nxënësve në aktivitete që promovojnë vlera humane, përgjegjësi qytetare dhe kujdes ndaj mjedisit.

Gjatë takimit shpalosëm idenë, qëllimet dhe rëndësinë e projektit, i cili synon të rrisë vetëdijen e nxënësve për mbrojtjen e mjedisit, rëndësinë e riciklimit dhe kujdesin ndaj hapësirave tona të përbashkëta. Diskutuam për aktivitetet që do të realizohen në shkollën fillore, duke theksuar se ky projekt nuk ka të bëjë vetëm me pastrimin e ambientit, por me ndërtimin e një kulture të përgjegjësisë, solidaritetit dhe angazhimit qytetar tek të rinjtë – vlera që përputhen plotësisht me misionin human të Kryqit të Kuq.

Jemi shumë mirënjohës për mbështetjen dhe gatishmërinë e drejtoreshës znj. Drita Pira për ta përkrahur këtë iniciativë dhe për mundësinë që na u dha për ta prezantuar projektin tonë. Besojmë se përmes këtij bashkëpunimi do të kontribuojmë në krijimin e një ambienti më të pastër, më të shëndetshëm dhe më të ndërgjegjshëm për të gjithë.

Së bashku për një mjedis më të gjelbër dhe një të ardhme më të mirë! 🌿

03/03/2026

Promovimi i Vlerave Humane – Projekt me Bazë në Komunitet me karakter humanitar.
Nxënësit e shkollës sonë, nën udhëheqjen e profesorëve të projektit, po realizojnë iniciativën "Promovimi i Vlerave Humane" në kuadër të Kryqit të Kuq të Kosovës.
Si pjesë e projektit, grupi vizitoi Qendrën e Mjekësisë Familjare në Pozheran, ku do të zhvillojë aktivitete humanitare dhe edukative për komunitetin. Ky projekt synon të forcojë solidaritetin, bashkëpunimin dhe përgjegjësinë sociale tek nxënësit, si dhe të kontribuojë pozitivisht në jetën e qytetarëve të zonës.

02/03/2026

Sot patëm kënaqësinë të mirëpresim në shkollën tonë Drejtoreshën e QKMF-së, znj. Vjollca Kadolli bashkê me doktoreshen Arta në një takim të rëndësishëm me nxënësit dhe profesorẽt udhëheqës të projektit.

Gjatë këtij takimi prezantuam projektin që planifikojmë ta realizojmë në ambulantë, duke paraqitur qartë qëllimet, aktivitetet e planifikuara dhe ndikimin që pritet të ketë në rritjen e vetëdijesimit dhe përmirësimin e shërbimeve për komunitetin. Diskutimi ishte shumë konstruktiv dhe u vlerësua angazhimi i nxënësve në këtë iniciativë.

Falënderojmë znj. Kadolli për vizitën, përkrahjen dhe gatishmërinë për bashkëpunim. Mbështetja e saj është një hap i rëndësishëm drejt realizimit me sukses të këtij projekti.

Vazhdojmë me përkushtim dhe seriozitet për ta çuar përpara këtë iniciativë në shërbim të komunitetit tonë.

25/02/2026

21/02/2026

KUALIFIKIM NË FINALE!

Me krenari ju njoftojmë se ShMLM “Kongresi i Manastirit” – Pozheran është kualifikuar në finale në kuadër të programit “Media Literacy – Ambassadors Practical Challenge”, projekt i mbështetur nga Bashkimi Evropian.

Ekipi ynë dëshmoi përgatitje serioze, mendim kritik dhe bashkëpunim të shkëlqyer gjatë të gjitha sfidave. Ky sukses është rezultat i punës së palodhur të nxënësve tanë dhe përkushtimit profesional të mentorëve të tyre.

Finalja është një arritje e madhe për shkollën tonë dhe një dëshmi se të rinjtë tanë janë të gatshëm të përfaqësojnë me dinjitet Vitinê në nivel vendi.

16/02/2026

Në kuadër të shënimit të Ditës së Pavarësisë së Republikës së Kosovës, komuniteti i shkollës sonë bëri homazhe pranë lapidarit të dëshmorit Mejdi Korrani, duke nderuar me respekt dhe mirënjohje sakrificën e tij për lirinë e atdheut.

Në këtë ceremoni përkujtimore morën pjesë ish-luftëtarë, ish-profesorë, veteranë të luftës, përfaqësues të Policisë së Kosovës, prindër, administratori i fshatit Ilir Zuka, drejtoresha e Arsimit Arta Ajeti, drejtori Naim Pira, stafi i shkollës si dhe drejtori. Me vendosje kurorash lulesh dhe një minutë heshtje u përkujtua sakrifica e dëshmorëve dhe rruga e mundimshme drejt lirisë.

Pas homazheve, aktiviteti vazhdoi me një program artistik dhe përkujtimor në ambientet e shkollës. Fjalën kryesore në këtë aktivitet e mbajtën veteranët e luftës, të cilët ndanë kujtime dhe mesazhe për brezin e ri mbi rëndësinë e sakrificës, unitetit dhe ruajtjes së identitetit kombëtar. Për t’i përshëndetur dhe vlerësuar të gjithë të pranishmit u përkujdes stafi i shkollës në krye me drejtorin.

Në veçanti, programin e pasuroi ish-ushtari i UÇK-së, Nuhi Halabaku, i cili përshëndeti stafin e shkollës dhe përcolli mesazhin kryesor: të ruajmë dhe të kultivojmë vlerat tona historike e kombëtare, ashtu siç ishte lufta për liri dhe përkushtimi për ruajtjen e shkollës si vatër e dijes dhe e identitetit tonë.

Ky organizim dëshmoi edhe një herë se shkolla jonë mbetet e përkushtuar në edukimin e brezave me frymë atdhedashurie, respekti dhe përgjegjësie ndaj historisë sonë kombëtare. Lavdi të përjetshme dëshmorëve dhe urime Dita e Pavarësisë!

15/02/2026

NJOFTIM

Të nderuar nxënës, prindër dhe staf i Shkollës së Mesme të Lartë Mikse “Kongresi i Manastirit” – Pozheran,

Ju njoftojmë se nesër, më 16 Shkurt, në ambientet e shkollës sonë do të organizohet manifestimi me rastin e Ditës së Pavarësisë së Kosovës.

Ora 12:00 – Vendosja e një buqete lulesh te Kompleksi “Korri”.
Ora 12:30 – Fillon manifestimi solemn në hapësirat e shkollës.

Ftohen të gjithë nxënësit dhe stafi i mesimdhenesve, prinderit, ish mesimdhenesit të marrin pjesë ne festimin e dites se Pavaresisë.

Pjesëmarrja juaj e bën këtë ditë më dinjitoze dhe më kuptimplotë.

Me respekt,
Drejtoria
ShMLM “Kongresi i Manastirit” – Pozheran