06/06/2026
Burim Kolgeci në shërbim të shëndetit dhe humanizmit 🩺
Me respekt dhe krenari ndajmë disa fjalë për bashkëfshatarin tonë, Burim Hetem Kolgeci, një infermier i përkushtuar dhe shumë i respektuar në fshatin tonë, që vjen nga një familje e respektuar dhe e njohur për vlerat e saj në Vraniq.
Rrugëtimi i tij në shërbim të shëndetësisë fillon që nga përfundimi i Shkollës së Mesme të Mjekësisë në Prizren (1994–1998). Gjatë periudhës së luftës, ai dha kontributin e tij në Ushtrin Çlirimtare të Kosovës duke u kujdesur për të plagosurit dhe të sëmurët civilë në Vraniq dhe Buzhal. Pas luftës, në vitin 1999, filloi punën në ambulantën e Bukosh*t, ndërsa më pas vazhdoi angazhimin e tij në QKMF-Suharekë, ku shërben edhe sot si infermier në urgjencë.
Përvoja, profesionalizmi dhe përkushtimi ndaj pacientëve e kanë bërë Burimin një emër të respektuar në profesionin e tij. Ai njihet si një infermier shumë i respektuar nga pacientët, falë sjelljes së tij të mirë, komunikimit të ngrohtë dhe kujdesit të veçantë që tregon ndaj çdo rasti. Nga viti 2014 deri në vitin 2018 ai ka ushtruar edhe detyrën e kryeinfermierit në QKMF-Suharekë, duke dëshmuar aftësi të larta profesionale dhe organizative.
Përveç angazhimit në institucionet shëndetësore, Burimi ka qenë gjithmonë pranë njerëzve të komunitetit tonë, duke ofruar ndihmë dhe mbështetje sa herë që është kërkuar prej tij.
Një vlerë e veçantë që Burimi e ka shprehur edhe ndaj Shoqatës Vraniqi është gatishmëria e tij për të ndihmuar bashkëfshatarët në nevojë. Ai ka bërë të ditur se, sa herë që Shoqata identifikon familje apo individë që kanë nevojë për shërbime infermierore dhe nuk kanë mundësi financiare, do të ofrojë pa pagesë shërbime si infuzione, injeksione, përpunim plagësh dhe ndihmë të tjera infermierore.
Po ashtu, sa herë që Shoqata Vraniqi ka nevojë për mbështetje apo ndihmë në raste të ndryshme, Burimi së bashku me stafin e tij është gjithmonë i gatshëm dhe prezent, duke treguar përkushtim të vazhdueshëm dhe solidaritet ndaj komunitetit.
Shoqata Vraniqi ndihet krenare për njerëz si Burim Kolgeci, të cilët me punën, përkushtimin dhe sjelljen e tyre fisnike e nderojnë fshatin tonë dhe përfaqësojnë vlerat më të mira të komunitetit tonë.
Respekt dhe mirënjohje për kontributin e tij ndër vite në shërbim të shëndetit dhe mirëqenies së qytetarëve.
