28/09/2026
💬 Kur qytetarët angazhohen, komuniteti ndryshon.
Në një bisedë për Mitromirë, drejtoresha e IMPAKT, Gentiana Zeqiri, foli për të rinjtë, angazhimin qytetar dhe rëndësinë e krijimit të hapësirave ku secili mund të kontribuojë në ndryshimin e komunitetit.
🎙️ Lexoni intervistën e plotë më poshtë ⬇️
INTERVISTË ME GENTIANA ZEQIRIN
Shoqëria civile, të rinjtë dhe fuqizimi i komunitetit përmes angazhimit qytetar
Në kuadër të intervistave tona me njerëz që kontribuojnë në komunitetin tonë, Mitromirë sjell këtë herë një bisedë me Gentiana Zeqirin, aktiviste të shoqërisë civile dhe drejtoreshë të OJQ-së IMPAKT.
Përmes angazhimit të saj, ajo është fokusuar në çështje që lidhen me fuqizimin e komunitetit, përfshirjen e të rinjve, pjesëmarrjen qytetare dhe krijimin e mundësive për grupe që shpesh kanë më pak hapësirë për t'u dëgjuar.
Në këtë intervistë, Gentiana flet për sfidat me të cilat përballet shoqëria civile në Kosovë, rëndësinë e përfshirjes së të rinjve në vendimmarrje dhe ndryshimet që, sipas saj, mund të ndërtohen përmes angazhimit të përbashkët të qytetarëve dhe komunitetit.
1. Gentiana, si aktiviste e shoqërisë civile dhe drejtoreshë e OJQ-së IMPAKT, cilat mendoni se janë sfidat kryesore me të cilat përballen sot organizatat e shoqërisë civile në Kosovë?
Mendoj se një nga sfidat kryesore të shoqërisë civile në Kosovë është qëndrueshmëria. Gjatë viteve të angazhimit tim në këtë sektor, kam parë nga afër shumë organizata që punojnë me përkushtim të madh, kanë ide të mira dhe sjellin ndryshime konkrete në komunitet, por shpesh e kanë të vështirë ta vazhdojnë këtë punë përtej një projekti.
Financimi afatshkurtër dhe mundësitë e kufizuara për zhvillim institucional mbeten një sfidë për shumë prej tyre.
Njëkohësisht, besoj se është e rëndësishme të forcohen vazhdimisht partneritetet ndërmjet shoqërisë civile, institucioneve, komunitetit dhe sektorit privat. Nga përvoja e di se kur ekziston komunikimi dhe vullneti për bashkëpunim, mund të krijohen iniciativa që kanë ndikim shumë më të madh te qytetarët.
Për mua, puna e një organizate nuk duhet të përfundojë me realizimin e aktiviteteve. Ajo duhet të lërë diçka pas vetes, një të ri që ka fituar më shumë besim, një grua që është fuqizuar, një qytetar që është bërë më aktiv apo një komunitet që ka filluar të kërkojë më shumë nga vetja dhe institucionet.
Në fund të ditës, financimi është i rëndësishëm, por po aq i rëndësishëm është besimi që ndërtohet me komunitetin dhe ndikimi që mbetet edhe pasi projekti përfundon.
2. Sa e rëndësishme është përfshirja e të rinjve në vendimmarrje dhe çfarë duhet të ndryshojë që zëri i tyre të dëgjohet më shumë?
Përfshirja e të rinjve në vendimmarrje nuk duhet të shihet si një privilegj që u jepet atyre, por si një domosdoshmëri për një shoqëri që dëshiron të zhvillohet.
Të rinjtë nuk janë vetëm përfitues të politikave dhe vendimeve që merren; ata duhet të jenë pjesë e procesit përmes të cilit këto vendime hartohen.
Nga përditshmëria ime në punën me të rinjtë, e shoh që ajo që shpesh mungon nuk është vullneti apo ideja, por hapësira dhe besimi për t'i kthyer ato ide në iniciativa konkrete.
Mund t'i ftojmë të rinjtë në një takim, t'u kërkojmë mendimin dhe më pas vendimi të merret pa ta. Për mua, pjesëmarrja e vërtetë fillon atëherë kur mendimi i tyre merret seriozisht dhe kur ata mund të ndikojnë në rezultat.
Pikërisht për këtë arsye, në punën e IMPAKT-it mundohemi që të rinjtë të mos jenë vetëm pjesëmarrës në aktivitete, por të kenë mundësi të zhvillojnë ide, të diskutojnë problemet e komunitetit, të ndërmarrin iniciativa dhe të kuptojnë më mirë se si funksionojnë institucionet dhe proceset e vendimmarrjes.
Ajo që duhet të ndryshojë është edhe mënyra se si i shohim të rinjtë. Nuk duhet t'i shohim vetëm si “të ardhmen”. Ata janë pjesë e së tashmes dhe duhet të kenë hapësirë për të kontribuar sot.
Për këtë nevojiten mekanizma më të rregullt të konsultimit, mbështetje për iniciativat rinore dhe, mbi të gjitha, një kulturë ku zëri i të rinjve shihet si kontribut dhe jo thjesht si formalitet.
3. Duke parë përvojën tuaj në angazhimin qytetar, cili është një ndryshim që do të dëshironit ta shihnit në komunitetin tonë dhe si mund të kontribuojmë të gjithë për ta bërë atë realitet?
Do të doja të shihja një komunitet ku njerëzit të mos ndihen vetëm spektatorë të problemeve që i rrethojnë, por të ndihen pjesë e zgjidhjeve.
Besoj se ndryshimi fillon pikërisht aty: kur kalojmë nga “dikush duhet ta bëjë” te “çfarë mund të bëjmë ne?”
Gjatë angazhimit tim në shoqërinë civile kam parë se në komunitetet tona ka shumë njerëz me potencial, ide dhe vullnet për të kontribuar, por jo gjithmonë kanë hapësirën, informacionin apo mundësinë për ta bërë këtë.
Prandaj, mendoj se duhet të krijojmë më shumë ura mes qytetarëve, të rinjve, grave, organizatave, institucioneve dhe bizneseve lokale.
Për mua, një komunitet i fortë është ai ku një vajzë e re nga një zonë rurale mund ta shohë veten si pjesë të vendimmarrjes; ku një i ri mund ta shndërrojë një ide në një iniciativë konkrete; dhe ku qytetarët ndihen të lirë të kërkojnë llogaridhënie dhe të kontribuojnë në çështjet që i prekin.
Këtë nuk mund ta bëjë vetëm një organizatë dhe as vetëm institucionet. Ndryshimi kërkon kontributin e secilit prej nesh, duke qenë më aktivë në komunitet, duke mbështetur iniciativat e mira, duke kërkuar përgjegjësi dhe duke krijuar mundësi për ata që shpesh mbeten jashtë proceseve.
Besoj shumë te puna që bëhet nga poshtë-lart. Një ndryshim i madh shoqëror shpesh fillon me një grup të vogël njerëzish që vendosin të mos jenë indiferentë.
Dhe pikërisht kjo është ajo që përpiqemi të bëjmë edhe përmes IMPAKT-it: të krijojmë hapësira ku njerëzit jo vetëm të flasin për ndryshimin, por të kenë mundësi ta ndërtojnë atë.
Portali rinor i Mitrovicës — pa politikë, me zërin e të rinjve, komunitetit dhe njerëzve që bëjnë ndryshimin.
