Lagjja Qoraga

09/05/2026

Rrahman Saramati

Prizrenasi nga Kosova që po revolucionarizon informacionin mbi mirëqenien përmes teknologjisë moderne, duke edukuar miliona njerëz në mbarë botën. Pas suksesit të platformës Body Insight Shqip, fs…

31/03/2026

19/03/2026

FURRA JONË!

Prizrenasit e dinë mirë se çfarë do të thotë pitajka e Ramazanit. Nuk është thjesht një pitajk, por një ritual i vogël që e shoqëron iftarin. Disa i preferojnë me qullin tradicional nga gjiza, vezët dhe pak kopër, të tjerë i duan krejt të thjeshta, ndërsa ka edhe nga ata që nuk i rezistojnë variantit me suxhuk. Secili me shijen e vet, dhe furra, si gjithmonë, në shërbim të të gjithëve.

E vërteta është se kërkesat gjatë Ramazanit nuk janë as të pakta e as të lehta. Të gjithë i duan pitajkat… por natyrisht, nja dy minuta para iftarit. Por, përkundër gjithë kësaj, ekipi i furrës ka treguar një nivel të admirueshëm durimi, përkushtimi dhe profesionalizmi,pa e humbur buzëqeshjen dhe cilësinë.

Sot, në ditën e fundit të Ramazani, kur në furrë kanë filluar të përgatiten Simitet e Bajramit dhe aroma e festës ndihet në ajër, është momenti i duhur që si komunitet të ndalemi për një çast dhe të themi një falënderim të sinqertë.

Faleminderit për mundin, për durimin me ne (sidomos me ata që i donin pitajkat në sekondën e fundit), për cilësinë që nuk e keni komprometuar dhe për faktin që e mbani gjallë një traditë.

Me respekt dhe mirënjohje,
nga banorët e Lagjjës Qoraga.

11/03/2026

Vjosa Saramati – një emër nga lagjja jonë që po hap rrugët e historisë në organin ligjdhënës të Kantonit të Bernit!

Në çdo komunitet ka njerëz që nuk ndjekin vetëm rrugët e zakonshme, por edhe ato të guximit dhe ndryshimit. Vjosa Saramati, nga lagjja jonë, është një nga këta njerëz. Ajo kandidon për Grossrat, organin ligjdhënës të Kantonit të Bernit, një pozitë ku vendosen ligjet, politikat dhe vizioni për të ardhmen.

Vjosa përfaqëson brezin e ri të diasporës shqiptare, i cili nuk i frikësohet sfidave dhe futet në arenën politike me kurajo dhe vizion.

Ajo është gruaja shqiptare që thyen barrierat, duke treguar se vendosmëria dhe integriteti janë çelësi i suksesit në politikë, një shembull frymëzues për të gjitha vajzat dhe të rinjtë që ëndërrojnë të bëjnë ndryshimin.

Vjosa tregon fuqinë e komunitetit tonë, duke vërtetuar se shqiptarët nuk janë vetëm pjesë e diasporës, por janë të aftë të kontribuojnë dhe të kenë zë të fortë në institucionet e Zvicrës.

Një votë për Vjosën është një votë për përfaqësim të denjë, për forcimin e komunitetit tonë dhe për të ardhmen e shqiptarëve në diasporë. Ky kandidim nuk është vetëm një sfidë personale, por edhe një moment historik për komunitetin tonë, që dëshmon se shqiptarët janë të aftë të marrin vendime, të kontribuojnë dhe të ndikojnë fuqishëm, kudo që jetojnë.

18/02/2026

Mrekullia e heshtur në zemër të Prizrenit

Nga jashtë të mahnit me madhështi, nga brenda të pushton me pikturat e saj me motive florale. Por madhështia e saj nuk qëndron vetëm në artin e gdhendur mbi gurë. Ajo që e bën këtë xhami të papërsëritshme është historia e saj e mbijetesës, një histori ku qyteti dhe koha u bënë roje të saj, kur pushteti dhe gjykatat kërkonin ta fshijnë nga kujtesa.
Pushteti serbomadh shpiku një legjendë, se gjoja gurët e saj ishin marrë nga manastiri i Car Dushanit.

Një trill i vjetër që u bë armë për ta shkatërruar. Në vitin 1922 nisën ta rrënojnë, duke e copëtuar hajatin. Por atëherë ndodhi ajo që e shpëtoi, populli doli në rrugë, protestoi, ngriti zërin mbi pushtetin. Dhe dora që donte ta shkatërronte u ndal. Jo nga mëshira, por nga frika, sepse qyteti nuk lejonte të prekej shpirti i tij.

Sërish, më 1940, kërkesa për shkatërrim u rikthye. Këtë herë edhe gjyqi i Qarkut e shpalli xhaminë “pronë të Kishës”, duke e vulosur padrejtësinë mbi një legjendë të fabrikuar. Por koha e ndali rrënimin.
Shkatërrimi i Mbretërisë Jugosllave në 1941.

Pastaj erdhën vitet e vështira të heshtjes. Xhamia qëndroi, por e mbyllur, e harruar. U deshën dekada që të merrte frymë përsëri. U konservua më 1952, u hap si muze më 1968, dhe më në fund iu kthye Bashkësisë Islame më 1969. Por vetëm më 2007 ajo u rikthye në zemrën e besimtarëve, ndërsa me ndihmën e TIKA-s më 2013–2015, ajo dhe oborri i saj u rregullua, duke e bërë jo vetëm një vend lutjeje, por edhe një atraksion për turistët nga mbarë bota.

Xhamia e Sinan Pashës nuk është vetëm e myslimanëve, as vetëm e prizrenasve. Është e të gjithëve që dinë të duan historinë, të vlerësojnë trashëgiminë dhe të kuptojnë se bukuria e vërtetë lind kur e vërteta triumfon mbi dhunën.
Ajo është vetë Prizreni, e plagosur por e bukur, e rrezikuar por e gjallë, e sulmuar por krenare.
Blerim Q.Saramati

16/02/2026

Zëri i Qoragës sonë

Profili “Lagjja Qoraga” në Facebook menaxhohet me qëllimin e vetëm që të jetë në shërbim të komunitetit tonë. Publikimet janë plotësisht pa pagesë, natyrisht solidariteti nuk tarifohet.

Në këtë profil mund të publikohen:

-Njoftime mortore
-Njoftime festive
-Shpallje për blerje, sh*tje apo dhënie me qira
-Promovime të bizneseve lokale dhe shërbimeve
-Aktivitete kulturore, sportive apo humanitare
-Thirrje për ndihmë dhe iniciativa solidariteti
-Njoftime për humbje/gjetje dokumentesh apo sendesh
-Informata me interes të përgjithshëm për lagjen
-Njoftime dhe informata për fushata zgjedhore

Qëllimi është i qartë, komunikim i hapur, korrekt dhe në dobi të të gjithëve.
Për çdo njoftim apo informacion që dëshironi ta publikoni, ju lutem më shkruani pa hezitim në inbox. Profili është i hapur për secilin, me respekt dhe përgjegjësi.
Me respekt,
Blerim Q. Saramati

31/01/2026

Erbaini dhe Hamsini

Sot është 31 janar. Sipas kalendarit popullor, 40 ditët më të vështira të dimrit, të njohura si “Erbain”, nga arabishtja “40”, kanë përfunduar. Nga sot, më 31 janar, fillon periudha e “Hamsinit”.

Pleqtë tanë e ndanin dimrin në dy cikle kryesore. Erbaini mbulonte periudhën nga 22 dhjetori deri më 30 janar dhe konsiderohej si pjesa më e ashpër e dimrit. Hamsini, që në arabisht do të thotë “50”, zgjat për 50 ditë. Edhe pse kjo periudhë nuk është aq e ashpër sa Erbaini, ftohti do të vazhdojë, por në fund të saj vjen lajmi i mirë, pranvera po afron.

Luleborët në fotografi janë fotografuar në njërën nga shtëpitë e vjetra të Lagjes Qoraga.