OJQ - Green Leaders Besila

30/07/2026

🌱 U mbajt sesioni trajnues në kuadër të projektit "Fshati Im"!

Në kuadër të projektit "Fshati Im", të mbështetur nga projekti rajonal Farm to Fork Academy, i financuar nga Bashkimi Evropian dhe i implementuar nga Rrjeti Shqiptar për Zhvillim Rural në partneritet me Rrjetin e Organizatave për Zhvillim Rural të Kosovës (RROZHRK), u organizua me sukses sesioni trajnues me aktivistë të shoqatave dhe përfaqësues të komuniteteve rurale.

Sesioni trajnues fokusua në promovimin e bujqësisë së qëndrueshme, duke trajtuar tema të rëndësishme si:
🌾 teknikat e qëndrueshme të prodhimit bujqësor;
♻️ kompostimi dhe përdorimi i plehrave natyrore;
💧 metodat efikase të ujitjes;
🌿 menaxhimi i qëndrueshëm i burimeve natyrore;
🦋 ruajtja e biodiversitetit dhe mbrojtja e mjedisit.

Përmes diskutimeve interaktive dhe shkëmbimit të përvojave, pjesëmarrësit u njohën me praktika inovative që mund të kontribuojnë në rritjen e produktivitetit bujqësor, duke ruajtur njëkohësisht mjedisin dhe burimet natyrore për brezat e ardhshëm.

Angazhimet e Shoqatës permes ketij projekti solid, synojnë forcimin e kapaciteteve të fermerëve dhe aktorëve lokalë për të promovuar një bujqësi më të gjelbër, më të qëndrueshme dhe në përputhje me parimet evropiane të zhvillimit rural.

06/07/2026

Reagim i OJQ Green Leaders Besila (GLB)

OJQ Green Leaders Besila shpreh shqetësimin e thellë për situatën e krijuar në sektorin e qumështit në Kosovë, e cila po prek drejtpërdrejt fermerët, familjet e tyre dhe gjithë zinxhirin e prodhimit vendor.

Fermeri është shtylla e sigurisë ushqimore dhe e zhvillimit rural. Ai punon çdo ditë të vitit për të siguruar produkte për tregun tonë. Prandaj, është e papranueshme që puna, mundi dhe investimi i tij të rrezikohen nga pasiguria në treg.

Ne kërkojmë nga institucionet përgjegjëse që të veprojnë me shpejtësi, transparencë dhe profesionalizëm, duke publikuar faktet dhe duke garantuar zbatimin e ligjit për të gjithë, pa dallime.

Njëkohësisht, mbështesim çdo masë që mbron shëndetin e konsumatorit. Çdo subjekt që nuk respekton standardet ligjore duhet të mbajë përgjegjësi. Mbrojtja e konsumatorit dhe mbrojtja e fermerit të ndershëm janë dy qëllime që duhet të ecin së bashku.

I bëjmë thirrje institucioneve, përpunuesve të qumështit, fermerëve dhe të gjithë akterëve të sektorit që të gjejnë zgjidhje të shpejtë për tejkalimin e kësaj krize. Kosova ka nevojë për një sektor të qumështit të fortë, të drejtë dhe transparent, ku prodhuesi vendor të respektohet, konsumatori të mbrohet dhe besimi në produktet vendore të forcohet.

Green Leaders Besila (GLB) do të vazhdojë të mbështesë zhvillimin rural, bujqësinë e qëndrueshme dhe të drejtat e fermerëve, duke kërkuar gjithmonë përgjegjësi, transparencë dhe drejtësi për të gjithë.

01/07/2026

🕊️ Një nder për Green Leaders Besila dhe për komunitetin tonë

Me ndjenjë të thellë mirënjohjeje ju njoftojmë se Drejtoresha Ekzekutive e OJQ Green Leaders Besila, znj. Besnike Aliaj, është nderuar me titullin prestigjioz “Ambasadore e Paqes” nga Federata e Paqes Universale (Universal Peace Federation – UPF).

Ky vlerësim është një dëshmi e punës, përkushtimit dhe angazhimit të vazhdueshëm në promovimin e paqes, humanizmit, kulturës, fuqizimit të grave, mbrojtjes së mjedisit, zhvillimit rural dhe bashkëpunimit ndërmjet komuniteteve.

Shprehim mirënjohje të veçantë për znj. Bujana Malaj, e cila vlerësoi kontributin e znj. Besnike Aliaj dhe e rekomandoi për këtë nder të lartë. Falënderojmë gjithashtu z. Defrim Methasani, Kryetar i Federatës së Paqes Universale në Shqipëri, z. Gani Rroshi, President Ballkanik i Federatës, si dhe gjithë stafin e tyre për mikpritjen, respektin dhe organizimin e një ceremonie dinjitoze.

Mirënjohje të sinqertë edhe për familjarët, miqtë, poetët, intelektualët dhe të gjithë ata që ishin pranë në këtë ditë të veçantë, duke e bërë këtë moment edhe më domethënës.

Për Green Leaders Besila, ky vlerësim është një motivim për të vazhduar misionin tonë në shërbim të shoqërisë, duke promovuar paqen, dialogun, zhvillimin e qëndrueshëm, mbrojtjen e mjedisit dhe fuqizimin e komuniteteve.

Ne do të vazhdojmë të punojmë me përkushtim, duke përfaqësuar me dinjitet Prizrenin, Kosovën dhe vlerat më të mira shqiptare në çdo aktivitet kombëtar dhe ndërkombëtar.

Faleminderit të gjithëve për mbështetjen dhe besimin!

🕊️ Green Leaders Besila
Për paqe, zhvillim të qëndrueshëm dhe një të ardhme më të mirë për të gjithë.

29/06/2026

🌿 Green Leaders Besila (GLB)

Green Leaders Besila (GLB) është një organizatë joqeveritare nga Prizreni, e themeluar me vizionin për të ndërtuar një shoqëri më të gjelbër, më të drejtë dhe më gjithëpërfshirëse.

Ne besojmë se ndryshimi i vërtetë fillon nga komuniteti. Përmes projekteve, edukimit, partneriteteve dhe veprimit qytetar, punojmë çdo ditë për të krijuar mundësi të reja për gratë, të rinjtë dhe komunitetet lokale, duke promovuar zhvillimin e qëndrueshëm dhe ruajtjen e vlerave tona kombëtare.

Fushat tona të veprimit:

🌱 Mbrojtja e mjedisit dhe zhvillimi i qëndrueshëm
👩‍🎓 Përkrahja dhe fuqizimi i rinisë
🤝 Fuqizimi ekonomik dhe zhvillimi i komunitetit
🧵 Artizanati dhe punëdoret tradicionale
🏛️ Ruajtja dhe promovimi i trashëgimisë kulturore
🌾 Agroturizmi dhe zhvillimi rural

Ne ndërtojmë ura bashkëpunimi ndërmjet qytetarëve, institucioneve, shkollave, bizneseve dhe organizatave vendore e ndërkombëtare, duke krijuar projekte që sjellin ndikim të qëndrueshëm në shoqëri.

Misioni ynë është të frymëzojmë qytetarë aktivë, të mbrojmë mjedisin, të promovojmë kulturën dhe traditën shqiptare, si dhe të krijojmë mundësi të barabarta për zhvillim ekonomik, social dhe profesional.

Vizioni ynë është një Kosovë ku natyra, kultura, rinia dhe komuniteti ecin së bashku drejt një të ardhmeje të gjelbër, të barabartë dhe të qëndrueshme.

🌿 Green Leaders Besila

Së bashku, ndërtojmë një të ardhme më të gjelbër, më të drejtë dhe më të zhvilluar për të gjithë.

18/06/2026

Një tjetër përsonalitet nga qyteti ynë i Prizrenit është edhe Besnike (Bafti) Aliaj, një ndërmarrëse, agronome dhe poete e suksesshme nga Prizreni Kosova, e njohur kryesisht për kontributin e saj në fushën e agrobiznesit, florikulturës dhe artit.

Besnikja u lind më 19 gusht 1988 në Prizren, Kosovë.Ka përfunduar studimet e nivelit fakultet në fushën e Administrim Biznesit - Agrobiznes dhe më pas ka kryer studimet Master (Msc.) në Administrim Biznesi në Universitetin "Ukshin Hoti" në Prizren.Që nga viti 2010, synimi i saj ishte të bëhej një ndërmarrëse e pavarur në bujqësi.

Ajo ia doli të krijojë një profil të fortë profesional përmes punës së palodhur:Ka një përvojë të gjatë në agrobiznese prodhuese dhe importuese, e specializuar në florikulturë (rritjen e luleve) dhe fidane të arrave.

Njihet si agronome dhe këshilltare e suksesshme në fushën e bujqësisë dhe dizajnimin/dekorimin me lule të gjalla në Kosovë dhe Shqipëri. Për angazhimet e saja është vlerësuar si një histori suksesi nga organizata si Kosova Women for Women (KW4W), duke qenë edhe përfituese e granteve start-up për fuqizimin e grave në ekonomi.

Ka shkruar artikuj të ndryshëm mbi ekonominë dhe bujqësinë, si dhe ka përgatitur librin "Tregu dhe Marketingu i Luleve".

Përveç shkencës dhe biznesit, Besnike Aliaj është aktive edhe në botën e artit:Shkruan poezi të cilat janë botuar në revista dhe portale kulturore (si në platformën e shoqatës "Migjeni" ose "Qendra Press").Tematikat e poezive të saj prekin shpesh forcën e nënës, shpresën, ringritjen dhe sfidat e jetës (p.sh. poezitë "Lulja që nuk dorëzohet" dhe "E fortë pa zë").

Një pasion tjetër që e ka në brenda shpirtit te saj luftarak është edhe aktrimi. Ajo ka luajtur në serialin dramatik shqiptar " Përtej Varfërisë" i prodhuar nga Puls Media Production i cili është publikuar në kanalin youtube..

Znj. Besnike i dëshirojmë suksese në jetēn e saj profesionale e përsonale.

Respekt!

11/06/2026

Green Leaders Besila në “Ditët e Lidhjes” 2026

Më 10 qershor 2026, përfaqësues të OJQ-së Green Leaders Besila (GLB) morën pjesë në manifestimin kulturor dhe letrar “Ditët e Lidhjes”, organizuar nga Shoqata për Kulturë dhe Art “Fidani” në Prizren.

Ky aktivitet i kushtohej kujtimit dhe nderimit të vlerave historike, kulturore dhe kombëtare të Lidhjes Shqiptare të Prizrenit, duke mbledhur krijues, veprimtarë dhe dashamirës të kulturës nga treva të ndryshme shqiptare.

Jemi krenarë që në kuadër të këtij manifestimi morën pjesë edhe anëtaret e OJQ-së sonë, Hatixhe Çollaku dhe Medina Ramaj Leka, të cilat recituan poezitë e tyre, duke dhënë një kontribut të çmuar në pasurimin e programit artistik dhe letrar.

Një moment i veçantë ishte ndarja e Mirënjohjes së Edicionit të 33-të për SHPK “Besila”, si vlerësim për kontributin dhe mbështetjen e vazhdueshme në aktivitetet kulturore dhe për dhurimin e luleve pranë lapidarit të krerëve të Lidhjes së Prizrenit, në shenjë respekti për trashëgiminë tonë kombëtare.

Falënderojmë kryetarin e Shoqatës “Fidani”, z. Berat Batiu, si dhe të gjithë organizatorët për mikpritjen dhe vlerësimin e dhënë.

Green Leaders Besila do të vazhdojë të mbështesë aktivitetet që promovojnë kulturën, artin, letërsinë dhe vlerat kombëtare, duke i konsideruar ato pjesë të rëndësishme të zhvillimit dhe identitetit të komunitetit tonë.

🇦🇱📚🌹

27/05/2026