ETEA

12/06/2026

🎥 Drejtori ekzekutiv i ETEA-s, Agon A. Ahmeti do të jetë i ftuar në “Përballje Podcast”, të dielën në RTV Dukagjini, në ora 21:00, si dhe në Telegrafi.com.

🎙️ Agon Ahmeti, drejtor ekzekutiv i ETEA-s në “Përballje Podcast”

Një studim i realizuar në Kosovë për përdorimin e Inteligjencës Artificiale në shkollat publike të Kosovës tregon se AI tashmë është bërë pjesë e përditshme e procesit.

Cilat platforma po përdorin nxënësit në Kosovë dhe për çfarë? Cilat janë përfitimet dhe cilat rreziqet nga përdorimi i inteligjencës artificiale në arsim?
Për çfarë po e përdorin nxënësit ChatGPT-in? Sa të përgatitura janë shkollat, drejtoritë komunale të arsimit dhe Ministria e Arsimit për këtë realitet të ri?

📺 “Përballje Podcast”, të dielën në RTV Dukagjini në ora 21:00 dhe në Telegrafi.com.

11/06/2026

📊 U zhvillua simpoziumi shkencor "Inteligjenca Artificiale në Arsim: Gjetjet preliminare dhe perspektivat për integrim në procesin mësimor" (takim i mbyllur me akterë relevantë)

ETEA dhe Fakulteti i Edukimit / Faculty of Education- UP prezantuan rezultatet preliminare të studimit më të madh të realizuar deri më tani në Kosovë mbi përdorimin e inteligjencës artificiale (AI) në arsimin parauniversitar të Kosovës.

Simpoziumi u hap nga Agon A. Ahmeti, drejtor ekzekutiv i organizatës ETEA, dhe Perparim Kryeziu, zëvendësministër i Ministria e Arsimit dhe Shkencës, të cilët theksuan rëndësinë e adresimit institucional të ndikimit që inteligjenca artificiale tashmë po ka në procesin mësimor.

Simpoziumi mblodhi përfaqësues të Ministrisë së Arsimit, Drejtorive Komunale të Arsimit, shkollave pjesëmarrëse në studim, organizatave vendore dhe ndërkombëtare, ekspertë të fushës, si dhe përfaqësues të sektorit të teknologjisë informative.

📈 Gjetjet preliminare të studimit u prezantuan nga bashkëautorët Prof. Ass. Dr. Krenare Pireva Nuqi dhe Agon A. Ahmeti, ndërsa procesi i analizës statistikore dhe interpretimit të të dhënave u mbështet nga A***n Musliu, Ardrita Humolli dhe Zjarr Bujari.

🔍 Disa nga gjetjet preliminare tregojnë se:

▪️ Inteligjenca artificiale tashmë është bërë pjesë e përditshme e procesit të të nxënit për pothuajse të gjithë nxënësit e Kosovës;
▪️ ChatGPT është platforma më e përdorur për qëllime mësimore;
▪️ Nxënësit raportojnë se AI i ndihmon të kryejnë detyrat më shpejt, të kuptojnë konceptet më lehtë dhe të përgatiten për teste e projekte;
▪️ Shumica e nxënësve vlerësojnë se AI kontribuon pozitivisht në zhvillimin e kompetencave të përcaktuara në Kornizën Kurrikulare të Kosovës;
▪️ Gjetjet tregojnë nevojën për adresimin e sfidave që lidhen me integritetin akademik, përfshirë përdorimin e AI gjatë detyrave, projekteve dhe formave të tjera të vlerësimit
▪️ Në të njëjtën kohë, mungesa e udhëzimeve të qarta institucionale dhe e rregullave për përdorimin e AI mbetet një nga sfidat kryesore të identifikuara.

Gjatë diskutimit, pjesëmarrësit ndanë përvoja, shqetësime dhe rekomandime konkrete për mënyrën se si sistemi arsimor duhet t’i përgjigjet zhvillimeve të shpejta teknologjike.

Pavarësisht perspektivave të ndryshme, të gjithë pjesëmarrësit u pajtuan se përdorimi i inteligjencës artificiale në arsim përbën një çështje urgjente që kërkon adresim institucional.

Ndër prioritetet kryesore të identifikuara ishin:

▪️ Hartimi i një kornize rregullative dhe etike për përdorimin e inteligjencës artificiale në procesin mësimor;
▪️ Zhvillimi i udhëzimeve të qarta për nxënësit, mësimdhënësit dhe shkollat;
▪️ Investimi në programe të trajnimit dhe ngritjes së kapaciteteve të mësimdhënësve;
▪️ Shfrytëzimi i potencialit të AI për përmirësimin e cilësisë së mësimdhënies dhe të nxënit, duke ruajtur integritetin akademik dhe ndershmërinë në vlerësim.

🙏 Falënderojmë të gjithë pjesëmarrësit për kontributin e tyre të vlefshëm. Gjetjet dhe rekomandimet e dala nga ky proces do të shërbejnë si bazë për finalizimin e studimit dhe formulimin e rekomandimeve për institucionet përgjegjëse.

10/06/2026

📊 Ka përfunduar mbledhja e të dhënave në terren në Komunën e Prishtinës

Në kuadër të studimit mbi përdorimin aktual dhe mundësitë e integrimit të inteligjencës artificiale (AI) në procesin mësimor, të realizuar nga ETEA dhe Fakulteti i Edukimit / Faculty of Education- UP, gjatë muajit maj 2026 është përfunduar me sukses faza e mbledhjes së të dhënave në Kryeqyteti Prishtina.

📍 Duke pasur parasysh numrin e madh të nxënësve dhe shkollave në kryeqytet, në këtë fazë janë përfshirë gjithsej 16 shkolla të niveleve të ndryshme arsimore, prej të cilave 11 shkolla fillore dhe të mesme të ulëta dhe 5 shkolla të mesme të larta.

Ky hulumtim synon të analizojë mënyrën se si nxënësit përdorin aktualisht inteligjencën artificiale (AI) në procesin e të nxënit - nga realizimi i detyrave dhe projekteve, deri te përgatitja për teste - si dhe të identifikojë mundësitë për integrimin e saj të strukturuar dhe të përgjegjshëm në sistemin arsimor të Kosovës.

Falënderojmë të gjitha shkollat pjesëmarrëse për bashkëpunimin dhe mbështetjen gjatë realizimit të këtij procesi hulumtues.

📸 Më poshtë mund të shihni disa momente nga puna në terren.

08/06/2026

🎥 Drejtori i organizatës ETEA, Agon A. Ahmeti, ishte i ftuar në RTV Dukagjini për të diskutuar mbi gjendjen e sigurisë në shkollat e Kosovës. Gjatë intervistës, ai prezantoi disa nga gjetjet kryesore të segmentit të katërt të studimit “Perceptimet dhe përvojat e nxënësve për cilësinë dhe funksionimin e sistemit arsimor në Kosovë”, i cili trajton perceptimet dhe përvojat e nxënësve lidhur me sigurinë në shkollë.

▶️ Ndiqni intervistën e plotë në linkun vijues: https://www.youtube.com/watch?v=SAfBrnTRvlE

03/06/2026

🎥 Lajmet Qendrore të RTK-së i kushtuan vëmendje publikimit të gjetjeve mbi sigurinë në shkolla, të prezantuara nga ETEA në kuadër të aktivitetit "Përtej festës: Flasim për sigurinë e fëmijëve në shkolla", të organizuar me rastin e 1 Qershorit – Ditës Ndërkombëtare të Fëmijëve.

▶️ Ndiqni storien e plotë në linkun më poshtë: https://www.youtube.com/watch?v=hlc24glUuwg

02/06/2026

Nxënësit në Prishtinë e kanë vlerësuar sigurinë në shkollat e tyre me notën mesatare 3.64, ndërsa mbrojtjen e të drejtave të fëmijëve me 3.65, sipas një studimi të organizatës joqeveritare ETEA.

Vetëm 35% e 1 mijë e 543 nxënësve të anketuar i kanë dhënë notën maksimale 5 sigurisë në shkolla.

Të dhënat u prezantuan më 01.06.2026, në Ditën Ndërkombëtare të Fëmijëve, në kuadër të studimit “Përceptimet dhe përvojat e nxënësve për cilësinë dhe funksionimin e sistemit arsimor në Kosovë”.

“Rreth 1 në 6 nxënës raportojnë se nuk ndihet i sigurt në shkollë, dhe se çdo i katërti nxënës në Prishtinë e përjeton ose është dëshmitar i dhunës në mes nxënësve në mjediset shkollore. Kurse, 1 në 10 nxënës, sipas tij, raportojnë dhunë fizike a psikike nga mësimdhënsi ndaj tyre." tha Agon Ahmeti, drejtor i ETEA.

Nxënësit në Prishtinë e kanë vlerësuar sigurinë në shkollat e tyre me notën mesatare 3.64, ndërsa mbrojtjen e të drejtave të fëmijëve me 3.65, sipas një studimi të organizatës joqeveritare ETEA. Vetëm 35% e 1 mijë e 543 nxënësve të anketuar i kanë dhënë notën maksimale 5 si...

01/06/2026

📊 ETEA publikon gjetjet preliminare për sigurinë e fëmijëve në shkolla

Me rastin e 1 Qershorit - Ditës Ndërkombëtare të Fëmijëve, ETEA dhe Kryeqyteti Prishtina organizuan aktivitetin publik Përtej festës: Flasim për sigurinë e fëmijëve në shkolla, i cili mblodhi përfaqësues të institucioneve, shkollave, prindërve, nxënësve dhe organizatave partnere për të diskutuar mbi gjendjen e sigurisë në shkollat tona.

Ngjarja u hap me prezantimin e gjetjeve preliminare nga studimi "Perceptimet dhe përvojat e nxënësve për cilësinë dhe funksionimin e sistemit arsimor në Kosovë", nga drejtori i ETEA-s, Agon A. Ahmeti. Studimi tregoi se shumica e nxënësve e perceptojnë shkollën si një mjedis relativisht të sigurt, megjithatë sfida të rëndësishme vazhdojnë të mbeten të pranishme. Një vëmendje e veçantë iu kushtua edhe gjetjeve për Komunën e Prishtinës dhe sfidave me të cilat përballen nxënësit e klasës së 9-të, të identifikuar si grupi më i ekspozuar ndaj rreziqeve që lidhen me sigurinë në shkollë.

Prezantimi u pasua me një diskutim me pjesëmarrjen e akterëve relevantë, duke përfshirë drejtorin e Drejtorisë së Arsimit të Prishtinës, A***nit Elshani, menaxheren e programeve të Terre des hommes - Kosovo, Maria Vuksani, drejtoren e SHFMU " Nazim Gafurri" Prishtinë, Ardianë Makolli Sadiku, kryetarin e Këshillit të Prindërve të Prishtinës, Hoxha Nexhmi, kryetaren e Këshillit të Nxënësve të Gjimnazi "Xhevdet Doda", Ema Kuçi, të cilët ndanë perspektivat dhe rekomandimet e tyre për krijimin e mjediseve shkollore më të sigurta, më gjithëpërfshirëse dhe më mbështetëse për fëmijët.

Diskutimi u pasurua edhe nga pyetjet dhe komentet e pjesëmarrësve, duke e kthyer aktivitetin në një hapësirë të vlefshme dialogu mbi përgjegjësinë e përbashkët për sigurinë dhe mirëqenien e fëmijëve në shkolla.

22/05/2026

📊 Ka përfunduar mbledhja e të dhënave në terren në Komuna e Vushtrrisë dhe Komuna Skenderaj

Në kuadër të studimit mbi përdorimin aktual dhe mundësitë e integrimit të inteligjencës artificiale (AI) në procesin mësimor, të realizuar nga ETEA dhe Fakulteti i Edukimit / Faculty of Education- UP, ka përfunduar me sukses faza e mbledhjes së të dhënave edhe në Komunat e Vushtrrisë dhe Skenderajt.

📍 Në Komunën e Skenderajt janë përfshirë gjithsej 5 shkolla të niveleve të ndryshme arsimore: 3 shkolla fillore dhe të mesme të ulëta, si dhe 2 shkolla të mesme të larta. Ndërkaq, në Komunën e Vushtrrisë janë përfshirë 7 shkolla: 4 shkolla fillore dhe të mesme të ulëta dhe 3 shkolla të mesme të larta.

Ky hulumtim synon të analizojë mënyrën se si nxënësit përdorin aktualisht inteligjencën artificiale (AI) në procesin e të nxënit - nga realizimi i detyrave dhe projekteve, deri te përgatitja për teste - si dhe të identifikojë mundësitë për integrimin e saj të strukturuar dhe të përgjegjshëm në sistemin arsimor të Kosovës.

Falënderojmë Drejtoritë Komunale të Arsimit në Vushtrri dhe Skebderaj dhe të gjitha shkollat për bashkëpunimin dhe mbështetjen gjatë realizimit të këtij procesi hulumtues.

📸 Më poshtë mund të shihni disa momente nga puna në terren.

20/05/2026

REAGIM PUBLIK I ROSCAP MBI RASTIN E RAPORTUAR NË GJAKOVË

Rrjeti i OSHC-ve të Arsimit Parauniversitar - ROSCAP, shpreh shqetësim të thellë në lidhje me pamjet e raportuara mbi sjelljet e papranueshme të drejtorit të shkollës në Demjan, Komuna e Gjakovës.

Rasti i raportuar ndaj drejtorit të shkollës në Demjan të Komunës së Gjakovës është alarm serioz për sigurinë, mbrojtjen dhe dinjitetin e fëmijëve në institucionet shkollore apo jashtë tyre.

Çdo sjellje që e cenon integritetin fizik, emocional apo seksual të fëmijëve apo nxënësve është e papranueshme dhe duhet të trajtohet me urgjencë, seriozitet dhe përgjegjësi të plotë institucionale. Po ashtu, drejtorët e shkollave kanë përgjegjësi të drejtpërdrejtë për sigurinë, mirëqenien dhe mbrojtjen e fëmijëve, dhe çdo dyshim për sjellje që nuk përkojnë me këto duhet të trajtohet me urgjencë dhe seriozitet maksimal.

ROSCAP mirëpret largimin e menjëhershëm nga puna të drejtorit nga Komuna e Gjakovës dhe aktivizimin e Policisë së Kosovës dhe Prokurorisë.

Po ashtu, ky rast nuk duhet të trajtohet si incident i izoluar por duhet të shërbejë si thirrje urgjente për forcimin e mekanizmave të mbrojtjes së fëmijëve sidomos vajzave në raportimin e ngacmimeve seksuale nga drejtorët ose stafi i shkollës.

ROSCAP do të vazhdojë të avokojë për një sistem arsimor ku siguria, dinjiteti dhe mirëqenia e fëmijëve janë të panegociueshme.

13/05/2026

📚 Fantazia si botë më vete, gjuha si hapësirë krijimi dhe Prishtina si peizazh i së pazakontës.

Në Qendrën “Libart” u promovua libri "Në Dyert e Palltoshiut" nga Albnor Sejdiu, një vepër që solli në qendër diskutimin mbi mundësitë e zhanrit të fantazisë në gjuhën shqipe dhe raportin ndërmjet imagjinatës, gjuhës dhe filozofisë.

Ngjarja u hap me një reflektim nga profesori i filozofisë Labinot Kelmendi, duke vijuar me diskutime mbi zhvillimin e fantazisë në letërsinë botërore, dimensionin filozofik të veprës dhe përpjekjen për të ndërtuar një univers autentik fantastik në kontekstin shqiptar.

💭 Gjatë diskutimit u trajtuan edhe aspektet gjuhësore të librit, përfshirë eksperimentimin me forma dhe fjalë të reja në shqip, si pjesë e ndërtimit të një bote letrare autonome.

“Në Dyert e Palltoshiut” ndërthur elemente të fantazisë, folkut të errët dhe neo-romantizmit përmes tregimeve që gradualisht lidhen në një univers të përbashkët, ku kufiri ndërmjet pamjeve, ëndrrave dhe realitetit fillon të shpërbëhet.

Falënderojmë Korporata Rugove për mbështetjen e aktiviteteve të Qendrës “Libart” me ujë të freskët.