19/08/2026
🌍 Dita Botërore e Humanizmit
Sot, ndajmë një moment për të vlerësuar punonjësit tanë, të cilët çdo ditë punojnë me përkushtim për mirëqenien dhe zhvillimin e fëmijëve. Përmes punës së pa lodhur, kujdesit, mbështetjes dhe përpjekjeve të tyre të vazhdueshme, ata kontribuojnë që bota të bëhet një vend më i mirë për të gjithë.
Humanizmi nuk është vetëm ajo që i japim të tjerëve, por edhe ajo që fitojmë brenda vetes në përpjekje për të bërë mirë. 🧡
💭“Për mua, puna humanitare shkon përtej asaj që mund të japësh për tjetrin. Fillon me idenë se ke diçka për të dhënë, por me kalimin e kohës kupton se kjo punë të jep edhe ty diçka. Dhe ndoshta pikërisht këtu qëndron kuptimi i saj: në përpjekjen për t’i bërë dikujt një të mirë, diçka e mirë ndodh edhe brenda nesh.” – Besarta Buqaj, Mësuese Asistente në Qendrën Ditore në Prishtinë.
💭“Për mua, puna humanitare nuk është vetëm një profesion është një rrugëtim njerëzor që më ka formuar dhe më ka mësuar të shoh botën përmes syve të fëmijëve.
Pas 9 vitesh në Tdh, kam pasur mundësinë të punoj në fusha dhe projekte të ndryshme, nga riintegrimi i familjeve, aktivitetet psiko-sociale dhe qasja në edukim, deri te puna e drejtpërdrejtë me fëmijët në situatë rruge. Kjo e fundit ka qenë një nga përvojat më të fuqishme të rrugëtimit tim. Kam parë fëmijë që, pavarësisht vështirësive, vazhdonin të buzëqeshnin, të jepnin dashuri dhe të sillnin shpresë edhe në ditët më të vështira të pandemisë COVID-19. Më pas, puna me fëmijët dhe të rinjtë, përfshirja në Bordin Këshillimor të Fëmijëve dhe ndërhyrjet për shëndetin mendor dhe mbështetjen psikosociale më kanë ndihmuar të kuptoj edhe më shumë se sa shumë dritë, forcë dhe potencial ekziston në botën e tyre.
Sot, pas gjithë këtyre viteve, e kuptoj se ndikimi humanitar nuk matet vetëm me atë që u japim të tjerëve, por edhe me atë që ata na mësojnë neve. Fëmijët, të rinjtë dhe të rriturit me të cilët kam punuar më kanë mësuar të jem më e durueshme, më empatike dhe të besoj më shumë në fuqinë e ndryshimit.
Për mua, të jesh humanitar do të thotë të punosh me zemër, të dëgjosh, të jesh pranë dhe të mos heqësh dorë nga mundësia për të sjellë një ndryshim pozitiv. Dhe ndoshta kjo është ajo që më ka mbajtur për 9 vite në këtë rrugëtim: kur punon me zemër, fillon ta shohësh dritën dhe shpesh, ajo dritë vjen pikërisht nga fëmijët për të cilët punojmë.” – Esa Çe Ester Celic Mekuli, Zyrtare për Mbrojtjen e Fëmijëve.
💭“Për ne, puna humanitare është më shumë se një profesion është një përgjegjësi për të qenë pranë njerëzve, për t’i dëgjuar, mbështetur dhe fuqizuar. Të punosh në Tdh do të thotë të jesh pjesë e një ekipi që çdo ditë punon për të krijuar mundësi, për të mbrojtur të drejtat dhe për të sjellë ndryshime pozitive në jetën e fëmijëve, të rinjve dhe familjeve.” – Blertë Rexha Koqinaj, Psikologe në Qendrën Ditore të Fëmijëve në Nashec, Prizren.
