17/07/2026
Të nderuar anëtarë të Odës së Arkitektëve të Republikës së Kosovës,
Ju njoftojmë se, më datë 16.07.2026, delegacioni i Odës së Arkitektëve të Republikës së Kosovës (OARK), i kryesuar nga Kryetarja znj. Mimoza Haxhija Jedrashi, ka zhvilluar takim konsultativ me drejtorin e Drejtorisë së Shërbimeve Publike, Mbrojtjes dhe Shpëtimit të Komunës së Prishtinës, z. Luftar Braha, lidhur me draft-rregulloren për tarifa, ngarkesa dhe gjoba komunale.
Ky takim u zhvillua në vazhdën e reagimit të adresuar zyrtarisht nga OARK pranë Komunës së Prishtinës, për të cilin ju kemi informuar paraprakisht, me qëllim të paraqitjes së shqetësimeve dhe qëndrimeve të komunitetit profesional lidhur me këtë çështje.
Gjatë takimit, Oda ka paraqitur të gjitha shqetësimet dhe kërkesat e komunitetit profesional lidhur me draft-rregulloren, përfshirë metodologjinë e përdorur për përcaktimin e tarifave, nivelin e tarifës së propozuar dhe ndikimin e saj në veprimtarinë e kompanive dhe studiove të arkitekturës.
Nga ana e Komunës së Prishtinës është bërë e ditur se draft-rregullorja është ende në proces të shqyrtimit dhe përpunimit, ndërsa janë marrë në konsideratë shqetësimet e paraqitura nga OARK. Megjithatë, sa i përket çështjes së proporcionalitetit të tarifës në raport me madhësinë e subjektit, numrin e punëtorëve, hapësirën e përdorur apo vëllimin e aktivitetit, Komuna ka sqaruar se kjo çështje nuk mund të trajtohet si kriter për diferencim të tarifave, pasi kufizohet nga dispozitat e nenit 10 paragrafi 10.4 të Ligjit për Financat e Pushtetit Lokal, i cili përcakton se tarifat për lejet e ushtrimit të veprimtarisë afariste nuk mund të ndryshojnë në bazë të këtyre kritereve.
Megjithatë, gjatë diskutimit është arritur dakordim që tarifa e propozuar prej 500 euro për veprimtarinë e arkitekturës të rishikohet dhe të ulet në mënyrë të konsiderueshme në versionin përfundimtar të rregullores.
OARK do të vazhdojë të përcjellë këtë proces dhe është dakorduar që të bashkëpunojë me Komunën e Prishtinës deri në finalizimin dhe publikimin e versionit final të rregullores.
Ju falënderojmë për reagimet, komentet dhe angazhimin tuaj, të cilat kanë qenë të rëndësishme në adresimin institucional të kësaj çështjeje dhe në përfaqësimin e interesit profesional të komunitetit të arkitektëve.
