Federata sindikale e Radio televizionit të Kosovës

19/09/2026

Federata Sindikale e RTK-së uron 27 vjetorin e themelimit të Radiotelevizionit të Kosovës

Prishtinë, 19 shtator 2026

Me rastin e 27 vjetorit të themelimit të Radiotelevizionit të Kosovës, Federata Sindikale e RTK-së u shpreh urimet më të përzemërta të gjithë punëtorëve të RTK-së, si dhe të gjithë atyre që gjatë këtyre 27 viteve kanë dhënë kontributin e tyre në ndërtimin, zhvillimin dhe forcimin e transmetuesit publik të Kosovës.

27 vjet histori të RTK-së janë 27 vjet punë, përkushtim, sakrificë dhe profesionalizëm të qindra punëtorëve që kanë qenë dhe vazhdojnë të jenë pjesë e këtij institucioni.

RTK u themelua në rrethana të veçanta dhe gjatë gjithë këtyre viteve ka kaluar nëpër etapa të rëndësishme, sfida dhe vështirësi të shumta. Edhe sot, transmetuesi publik përballet me sfida financiare, por përballë tyre qëndron forca më e madhe e RTK-së: punëtorët e saj.

Gazetarët, kameramanët, redaktorët, producentët, regjisorët, teknikët, inxhinierët, punonjësit administrativë dhe të gjithë profesionistët e tjerë të RTK-së kanë dëshmuar ndër vite se ky institucion ka njerëz me përvojë, profesionalizëm dhe përkushtim të jashtëzakonshëm.

Kjo është dëshmuar edhe kur punëtorët e RTK-së, pavarësisht vështirësive, kanë qenë në krye të detyrës dhe i janë përgjigjur me profesionalizëm nevojës së publikut për informim të saktë dhe në kohë.

RTK nuk janë vetëm ndërtesat, pajisjet, studiot apo buxheti. RTK janë njerëzit që çdo ditë punojnë për të.

Prandaj, në këtë përvjetor, Federata Sindikale e RTK-së shpreh mirënjohjen dhe respektin e veçantë për të gjithë punëtorët e RTK-së, për punën dhe sakrificën e tyre ndër vite.

Një institucion i fortë ndërtohet mbi njerëz të vlerësuar, të respektuar dhe me dinjitet në punë. Mbrojtja e të drejtave të punëtorëve dhe krijimi i kushteve të dinjitetshme për punë janë të domosdoshme për të ardhmen e RTK-së dhe për përmbushjen e misionit të saj publik.

Federata Sindikale e RTK-së do të vazhdojë të jetë pranë punëtorëve dhe të angazhohet për mbrojtjen e të drejtave të tyre, për përmirësimin e kushteve të punës dhe për një RTK të fortë, profesionale, të pavarur dhe në shërbim të qytetarëve.

Pas 27 vitesh, mesazhi ynë është i qartë:

RTK ka histori.
RTK ka profesionistë.
RTK ka njerëz që besojnë në misionin e saj.
Dhe RTK ka të ardhme.

18/08/2026

RTK në krizë financiare: Sindikata kundërshton zgjerimin e menaxhmentit dhe kërkon anulimin e vendimit

Federata Sindikale e RTK-së shpreh shqetësimin e saj lidhur me vendimin e Bordit të RTK-së për hapjen e konkurseve për katër pozita drejtuese, përfshirë dy pozita të zëvendësdrejtorëve të përgjithshëm, në një periudhë kur institucioni ka bërë të ditur se përballet me vështirësi të theksuara financiare dhe mungesë të mjeteve për përmbushjen e obligimeve ndaj punëtorëve.
Federata vlerëson se është e nevojshme një qasje më e kujdesshme dhe e balancuar në menaxhimin e burimeve financiare, veçanërisht në një situatë kur nuk janë realizuar pagesat për angazhimet shtesë të stafit dhe kur theksohet nevoja për kursim dhe racionalizim të shpenzimeve.
Në këtë kontekst, Federata Sindikale ngrit çështjen e koherencës së vendimmarrjes institucionale, duke theksuar se, nëse ekzistojnë kufizime financiare për përmbushjen e detyrimeve ndaj punëtorëve dhe zbatimin e Kontratës Kolektive, atëherë kërkohet një arsyetim i qartë dhe i plotë për krijimin e pozitave të reja drejtuese.
Sipas Kontratës Kolektive, vlera e shujtës është 2.50 euro për punëtor. Në kushtet aktuale të çmimeve, kjo shumë është qartazi e pamjaftueshme. Me 2.50 euro, një punëtor i RTK-së sot vështirë se mund të blejë edhe një sanduiç të thjeshtë gjatë orarit të punës.
Pikërisht për këtë arsye, Federata Sindikale ka kërkuar që të shqyrtohet rritja e shumës së shujtës dhe në takimet me menaxhmentin është marrë zotimi se do të gjenden mundësi për përmbushjen e këtij obligimi në mënyrë më dinjitoze për punëtorët.
RTK, sipas vlerësimit të Federatës, vazhdon të përballet me mungesë të kapaciteteve në sektorin e prodhimit programor, ku stafi profesional përfshirë gazetarët, kameramanët, montazhierët dhe teknikët mbajnë barrën kryesore të funksionimit të përditshëm. Në këto rrethana, Federata konsideron se prioritet duhet të jetë forcimi i kapaciteteve të prodhimit dhe përmirësimi i kushteve të punës, në përputhje me obligimet ekzistuese institucionale.
Federata Sindikale e RTK-së kërkon që vendimi për hapjen e këtyre pozitave të rishqyrtohet, si dhe që çdo vendimmarrje e mëtejshme që ndikon në strukturën organizative dhe shpenzimet e institucionit të shoqërohet me transparencë të plotë, përfshirë arsyetimin funksional dhe financiar.
Në përmbyllje, Federata thekson se menaxhimi i qëndrueshëm i RTK-së duhet të bazohet në balancimin e nevojave institucionale me përgjegjësinë ndaj punëtorëve dhe misionit publik të transmetuesit.

28/07/2026

Këshilli Drejtues shqyrtoi po ashtu kërkesën e Federatës Sindikale të Radiotelevizionit të Kosovës për anëtarësim në BSPK. Në mbledhje ishte i pranishëm edhe kryetari i kësaj federate, z. Veton Rugova. Pas shqyrtimit, Këshilli Drejtues vendosi njëzëri që Federata Sindikale e RTK-së të pranohet në BSPK. Me këtë vendim, punëtorët e transmetuesit publik marrin përfaqësimin e tyre në organizimin më të gjerë sindikal të vendit.

28/07/2026

Federata Sindikale e RTK-së bëhet anëtare e BSPK-së

Këshilli Drejtues i Bashkimit të Sindikatave të Pavarura të Kosovës (BSPK) ka votuar unanimisht për pranimin e Federatës Sindikale të Radio Televizionit të Kosovës (FSRTK) si anëtare të saj.
Anëtarësimi në organizatën më të madhe sindikale në vend përbën një hap të rëndësishëm për forcimin e përfaqësimit dhe mbrojtjen e të drejtave të punëtorëve të RTK-së.
Ky vendim vjen vetëm pak ditë pasi drejtuesit e BSPK-së vizituan Radio Televizionin e Kosovës, ku zhvilluan takime me përfaqësuesit e Federatës Sindikale. Gjatë vizitës, ata shprehën mbështetjen e tyre të plotë për FSRTK-në dhe u zotuan se do të angazhohen për zgjidhjen e problemeve me të cilat po përballet RTK-ja, duke përfshirë sfidat financiare dhe çështjet që lidhen me të drejtat e punëtorëve.
Pranimi në BSPK përfaqëson një tjetër sukses të Federatës Sindikale të RTK-së dhe është rezultat i punës, angazhimit dhe përkushtimit të saj për të ndërtuar një organizim të fuqishëm sindikal në mbrojtje të interesave të punëtorëve të Radio Televizionit të Kosovës.

24/07/2026

Kryesia e Federatës Sindikale të RTK-së zhvilloi takim me Drejtoreshën e Përgjithshme të RTK-së, znj. Zana Spahiu.
Takimi u zhvillua në një atmosferë bashkëpunimi, ku u diskutua për komunikimin institucional, rolin e Federatës në mbrojtjen e të drejtave të punëtorëve dhe rëndësinë e një dialogu të rregullt e konstruktiv ndërmjet Federatës sindikale dhe menaxhmentit.
Federata Sindikale e RTK-së mbetet e përkushtuar për përfaqësim të denjë, transparencë dhe mbrojtjen e të drejtave dhe interesave të çdo punonjësi të RTK-së. Ky angazhim do të vazhdojë me përgjegjësi dhe vendosmëri.

23/07/2026

BSPK zhvilloi vizitë zyrtare në Federatën Sindikale të RTK-së

Prishtinë, 23 korrik 2026 – Bashkimi i Sindikatave të Pavarura të Kosovës (BSPK) zhvilloi sot një vizitë zyrtare në Federatën Sindikale të Radio Televizionit të Kosovës (RTK), ku u diskutua për situatën aktuale në transmetuesin publik, sfidat me të cilat përballen punëtorët dhe rëndësinë e mbrojtjes së të drejtave të tyre.
Kryetari i Federatës Sindikale të RTK-së, Veton Rugova, i njoftoi përfaqësuesit e BSPK-së me gjendjen aktuale në institucion dhe kushtet e punës, duke shprehur shqetësimin e veçantë për uljen e buxhetit të transmetuesit publik. Ai theksoi se zvogëlimi i buxhetit për 2.5 milionë euro rrezikon funksionimin normal të RTK-së, cenon stabilitetin institucional dhe ndikon drejtpërdrejt në pozitën dhe sigurinë e punëtorëve.
Kryetari i BSPK-së, Atdhe Hykolli, shprehu mbështetjen e plotë për Federatën Sindikale të RTK-së dhe punonjësit e transmetuesit publik, duke theksuar se BSPK do të angazhohet në koordinim me partnerët socialë dhe institucionet përkatëse për gjetjen e zgjidhjeve të qëndrueshme, në përputhje me legjislacionin në fuqi dhe përmes dialogut social.
Ai vlerësoi se arritja e Marrëveshjes Kolektive dhe garantimi i të drejtave të të gjithë anëtarëve të sindikatës janë me rëndësi të veçantë, duke nënvizuar se çdo ndryshim që prek statusin e punëtorëve duhet të bëhet në konsultim të ngushtë me përfaqësuesit sindikalë.
Gjatë takimit u diskutua edhe për procesin e ndryshimit të Ligjit për RTK-në. Kryetari Hykolli theksoi se BSPK mbështet përfshirjen aktive të Federatës Sindikale të RTK-së në grupet punuese dhe në proceset konsultative, me qëllim që ligji i ri të garantojë pavarësinë e transmetuesit publik, financim të qëndrueshëm, siguri në punësim dhe mbrojtje të plotë të të drejtave të punëtorëve.
Palët u dakorduan të vazhdojnë bashkëpunimin dhe koordinimin e ngushtë për adresimin e sfidave me të cilat përballet RTK-ja, duke ritheksuar rëndësinë e dialogut social dhe respektimit të të drejtave të punonjësve si parakushte për një transmetues publik të pavarur, profesional dhe të qëndrueshëm.
Federata Sindikale e RTK-së falënderoi BSPK-në për vizitën dhe mbështetjen e ofruar, duke vlerësuar se uniteti sindikal është thelbësor për mbrojtjen e interesave të punëtorëve dhe për forcimin e rolit të transmetuesit publik në Kosovë.

13/07/2026

Pezullohet protesta e punëtorëve të RTK-së pas ndarjes së mjeteve buxhetore

Protesta e paralajmëruar për sot nga Federata Sindikale e RTK-së dhe Sindikata e Punëtorëve të RTK-së është pezulluar, pas vendimit të Qeverisë në detyrë të Republikës së Kosovës për të alokuar 2.24 milionë euro për Radio Televizionin e Kosovës. Vendimi u miratua të premten n....

13/07/2026

Pezullohet protesta e paralajmëruar për sot, në ora 11:30

Të premten Qeveria në detyrë e Republikës së Kosovës, në një mbledhje elektronike, ka miratuar kërkesën për alokimin e ndarjeve buxhetore në vlerë prej 2,240,000 euro për Radio Televizionin e Kosovës.
Ky vendim i hap rrugë tejkalimit të një situate të papranueshme, në të cilën punëtorët e RTK-së u detyruan të punojnë 13 ditë pa paga. Pavarësisht kësaj padrejtësie, ata nuk e ndalën punën dhe nuk e lanë qytetarin pa shërbimin e transmetuesit publik. Profesionalizmi dhe përgjegjësia e tyre qëndruan në kontrast të plotë me papërgjegjësinë institucionale që e solli RTK-në në këtë gjendje.
Duke marrë parasysh zhvillimin e fundit, Federata Sindikale e RTK-së dhe Sindikata e Punëtorëve të RTK-së pezullojnë protestën e paralajmëruar për sot, në ora 11:30.
Ne do ta ndjekim situatën në vazhdimësi dhe, në varësi të zhvillimeve (në rast të mosekzekutimit të pagave), do të nisim protestën e paralajmëruar për sot.
Megjithatë, e bëjmë të qartë se kjo nuk nënkupton se çështja është mbyllur. Asnjë punëtor nuk duhet të detyrohet kurrë më të punojë pa marrë pagën e tij. Kërkojmë nga të gjitha institucionet përgjegjëse të marrin masa konkrete dhe të krijojnë mekanizma që garantojnë financim të qëndrueshëm të RTK-së dhe pagesën e rregullt të pagave. Punëtorët nuk do të pranojnë të jenë peng i bllokadave politike, neglizhencës institucionale apo dështimeve menaxheriale.
Federata Sindikale e RTK-së dhe Sindikata e Punëtorëve të RTK-së do të vazhdojnë të mbrojnë pa kompromis të drejtat e çdo punëtori. Çdo tentativë që cenon dinjitetin, sigurinë ekonomike dhe të drejtat e punëtorëve do të përballet me reagim të menjëhershëm sindikal dhe me të gjitha mjetet demokratike që na garanton ligji.
Falënderojmë të gjithë punëtorët për unitetin, solidaritetin dhe dinjitetin që treguan në këto ditë të vështira. Pikërisht ky unitet ishte forca që bëri të mundur tejkalimin e kësaj krize.

Me respekt,
Federata Sindikale e RTK-së dhe SPERTK

10/07/2026

Të hënën në ora 11:30 protestë – Kërkohet përgjegjësi nga Bordit dhe Menaxhmenti pse punëtorët janë pa paga.

Federata Sindikale e RTK-së dhe SPERTK njoftojnë të gjithë punonjësit dhe opinionin publik se ka përfunduar çdo mundësi për pritje. Sot shënohet dita e 10-të pa ekzekutimin e pagave tona të rregullta në transmetuesin publik.

Pas takimit urgjent të zhvilluar me U.D. Drejtorin e Përgjithshëm të RTK-së, u kërkua alokimi i menjëhershëm i mjeteve, Sindikatat vendosin këtë ultimatum të prerë: Nëse pagat nuk alokohen në llogaritë e punëtorëve gjatë ditës së sotme, nga dita e hënë do të fillojmë me protesta.

Të hënën, më 13 Korrik 2026, në ora 11:30, ftojmë të gjithë punëtorët pa dallim që të bashkohen në protestë para objektit të RTK-së- TV. Duhet ta bëjmë të qartë se paga nuk është privilegj, por është një e drejtë elementare dhe ligjore që po u mohohet punëtorëve të RTK-së.

Nuk ka më hapësirë për premtime apo arsyetime burokratike që rrezikojnë mirëqenien e qindra familjeve. Përveç bllokimit të procesit të punës, Federata Sindikale e RTK-së dhe SPERTK nga e hëna do të kërkojë llogaridhënie të plotë ligjore dhe morale.

Këto dy organe të RTK-së po luajnë normalitetin ndonëse situata aspak nuk është normale.

Kjo papërgjegjshmëri është duke u përsëritur, ndonëse ligji i obligon edhe Bordin edhe Menaxhementin të sigurojnë funksionim normal të RTK-së.

Bordi dhe Menaxhmenti kanë treguar dështim total, paaftësi operative dhe shkelje të drejtave elementare. Rikujtojmë se ky nuk është lëshimi i tyre i parë; të njëjtit (Bordi) dhe menaxhmenti, janë përgjegjës që i lanë punëtorët pa paga edhe gjatë muajve të kaluar. Përsëritja e këtyre krizave tregon qartë se këta zyrtarë janë tërësisht të paaftë për ta ushtruar këtë veprimtari dhe për të udhëhequr transmetuesin publik.

Gjendja ekonomike e kolegëve tanë nuk pret më. Ftojmë të gjithë punëtorët e RTK-së që të qëndrojnë të bashkuar dhe të gatshëm për të mbrojtur dinjitetin dhe djersën tonë.

Me respekt,
Federata Sindikale e RTK-së dhe SPERTK

09/07/2026

Federata Sindikale e RTK-së i dërgon letër Kurtit dhe Haxhiut për ndërhyrje urgjente për pagat e punëtorëve

Federata Sindikale e RTK-së i ka kërkuar ushtrueses së detyrës së presidentes, Albulena Haxhiu, dhe kryeministrit në detyrë, Albin Kurti, ndërhyrje urgjente për ekzekutimin e pagave të punëtorëve. Sindikata tha se vonesa e pagave përbën "cenim ...