26/08/2025
Takim i Odës Ekonomike Japoneze në Kosovë me Japan External Trade Organization (JETRO)
Sot, Oda Ekonomike Japoneze në Kosovë, e udhëhequr nga Kryetari, z. Bujar Hoxha, pati nderin të presë në një takim pune delegacionin e lartë të Japan External Trade Organization (JETRO).
Në takim morën pjesë përfaqësues të rëndësishëm të JETRO-s: z. Yasunari Miyauchi, Drejtor i JETRO Budapest; z. Tatsuo Kamino, Drejtor i JETRO Vienna; z. Eckhart Derschmidt, Hulumtues në JETRO Vienna; z. Manuel Kaneko, Koordinator Projekti në JETRO Vienna; znj. Sawaka Takazaki, Drejtore e JETRO Bucharest; si dhe z. Takashi Mori, përfaqësues i Ambasadës së Japonisë në Kosovë. Nga ana e Odës morën pjesë edhe anëtarët e Bordit, z. Albert Fazlija dhe z. Lulzim Agani, si dhe koordinatorja, znj. Luljeta Arifi.
Kryetari i Odës, z. Hoxha, prezantoi rolin dhe misionin e Odës Ekonomike Japoneze në Kosovë, duke theksuar avantazhet konkurruese që Kosova si vende startegjik per rajonin ofron për investitorët japonezë dhe mundësitë e shumta për bashkëpunim ekonomik në fusha të ndryshme.
Diskutimet u përqendruan në potencialet që ka Kosova për tërheqjen e investimeve japoneze, zhvillimin e partneriteteve të reja tregtare dhe nxitjen e projekteve të përbashkëta që kontribuojnë në zhvillimin ekonomik të të dy vendeve.
Drejtori i JETRO Budapest, z. Miyauchi, njoftoi se në nëntor 2025 do të organizohet një mision biznesor në Kosovë në fushat e mjedisit, energjisë dhe infrastrukturës, gjatë të cilit do të mbahet një forum ekonomik që do të mundësojë takime direkte ndërmjet kompanive japoneze dhe atyre kosovare.
Në përfundim të takimit, u konfirmua vullneti i përbashkët për të ndërtuar një bashkëpunim të qëndrueshëm dhe afatgjatë, me qëllim rritjen e investimeve japoneze në Kosovë dhe forcimin e lidhjeve ekonomike mes dy vendeve.
