17/08/2026
📣KOMUNIKATË PËR MEDIA - Heshtja e Qeverisë në detyrë përbën shkelje të detyrimeve ligjore, parimeve të transparencës dhe llogaridhënies
Grupi për Studime Juridike dhe Politike (GLPS) shpreh shqetësimin lidhur me shpërfilljen e obligimeve ligjore dhe mungesën e transparencës të Qeverisë në detyrë lidhur me kërkesën për qasje në dokumente publike publike të GLPS drejtuar Zyrës së Kryeministrit (ZKM) me kërkesë për qasje në informacione dhe dokumente publike lidhur me dorëheqjet e anëtarëve të qeverisë në detyrë të cilët janë zgjedhur deputetë të Kuvendit të Republikës së Kosovës. Me 6 gusht 2026, GLPS ka parashtuar këtë kërkesë duke kërkuar listën e anëtarëve të qeverisë që kanë dhënë dorëheqje, datën e dorëheqjes dhe vendimet përkatëse të pranimit të dorëheqjeve.
Kërkesa është parashtruar duke u bazuar në paragrafin 1 të nenit 26 të Ligjit për Qeverinë, sipas të cilit, në rast se një anëtar i Qeverisë në detyrë zgjidhet deputet, ai duhet të japë dorëheqje nga posti i ministrit para ditës së certifikimit të rezultateve të zgjedhjeve. Po ashtu, neni 72 i Kushtetutës ndalon ushtrimin e njëkohshëm të funksionit të deputetit dhe ministrit. Kjo çështje është trajtuar edhe nga Gjykata Supreme në vendimin P.A.nr.09/2025, të datës 25 qershor 2025, ku është konstatuar se ushtrimi i njëkohshëm i këtyre dy funksioneve është në kundërshtim me Kushtetutën.
Përkundër obligimit ligjor dhe rëndësisë së kësaj çështjeje, ZKM nuk i është përgjigjur kërkesës së GLPS-së brenda afatit prej 7 ditësh, të përcaktuar me Ligjin për Qasje në Dokumente Publike. Mungesa e përgjigjes nga ZKM nuk është vetëm shkelje e afatit ligjor për qasje në dokumente publike, por cenon edhe parimin e transparencës institucionale. Për një çështje që lidhet drejtpërdrejt me respektimin e Kushtetutës dhe ligjit, institucionet publike duhet të jenë transparente edhe pa u detyruar nga kërkesat për qasje, e aq më tepër të mos refuzojnë apo heshtin kur një informacion i tillë kërkohet në mënyrë formale.
Prandaj, duke qenë se ZKM nuk ka dhënë përgjigje brenda afatit ligjor, GLPS ka parashtruar sot, me 17 gusht 2026, ankesë në Agjencinë për Informim dhe Privatësi (AIP), duke kërkuar që ZKM të obligohet të ofrojë informacionin dhe dokumentet e kërkuara. Moszbatimi i detyrimeve të përcaktuara me ligj dhe heshtja institucionale ndaj kërkesave të ligjshme të publikut nuk mund të normalizohen si praktikë dhe institucionet janë të detyruara të veprojnë në përputhje me ligjin dhe të japin llogari për veprimet dhe mosveprimet e tyre.
Një qasje e tillë përbën mungesë serioze të përgjegjësisë dhe transparencës institucionale ndaj shoqërisë civile dhe publikut në përgjithësi. GLPS i bën thirrje Qeverisë në detyrë që, pa vonesa të mëtejshme, ta informojë opinionin publik lidhur me këtë çështje dhe të bëjë publike informacionet dhe dokumentet përkatëse, siç e kërkon detyrimi i saj ligjor për transparencë dhe llogaridhënie.
Sinqerisht,
Grupi për Studime Juridike dhe Politike (GLPS)
