22/06/2026
Akademia e Yjeve
Në kuadër të Akademisë së Qershorit, fëmijët të ndarë sipas grupmoshave patën mundësinë të marrin pjesë në një trajnim edukativ me temën “Ngacmimet Kibernetike”. Gjatë aktivitetit, fëmijët u informuan mbi format e ngacmimeve në internet, mënyrat e mbrojtjes dhe rëndësinë e raportimit të rasteve të tilla, me qëllim të rritjes së vetëdijes dhe sigurisë së tyre në hapësirën digjitale.
Ndërsa për fëmijët më të vegjël, krahas aktiviteteve edukative, u zhvilluan edhe aktivitete që promovojnë rëndësinë e aktivitetit fizik në jetën e përditshme. Përmes lojërave dhe angazhimit aktiv, fëmijët u inkurajuan të kuptojnë ndikimin pozitiv që lëvizja dhe aktivitetet fizike kanë në zhvillimin e shëndetshëm, mirëqenien emocionale dhe krijimin e shprehive të shëndetshme që në moshë të hershme.
Në fund të trajnimit dhe aktiviteteve, për të gjithë fëmijët u shpërndanë dhurata si shenjë vlerësimi dhe përkrahjeje për pjesëmarrjen e tyre aktive.
Falënderojmë nga zemra ekipin vullnetar të Fondacionit Freskia, për angazhimin dhe përkushtimin e treguar në organizimin dhe realizimin e këtij aktiviteti. Një falënderim i veçantë për të gjithë donatorët që kontribuan në mbulimin e shpenzimeve të ushqimit, dhuratave dhe shpenzimeve të tjera organizative, duke bërë të mundur realizimin e këtij trajnimi dhe krijimin e një eksperience të vlefshme për fëmijët.
