Dhoma e Tregtisë dhe Industrisë Kosovë

21/08/2026

https://www.facebook.com/share/p/1DXzAED6iM/

20/08/2026

AMG Group, shembull i përkrahjes së prodhimit vendor

Kryetari i Bordit të Dhomës së Tregtisë dhe Industrisë Kosovë, Skender Krasniqi, ka vizituar kompaninë AMG Group në Podujevë, ku bashkë me pronarin e saj Afrim Fazlia, u diskutua për angazhimet e kompanisë dhe kontributin e saj në zhvillimin e ekonomisë lokale.

AMG Group aktualisht punëson mbi 20 punëtorë, ndërsa një pjesë të rëndësishme të lëndës së parë e siguron nga bujqit vendorë. Përmes këtij modeli të bashkëpunimit, kompania kontribuon jo vetëm në krijimin e vendeve të drejtpërdrejta të punës, por edhe në gjenerimin dhe ruajtjen e të ardhurave për dhjetëra familje që merren me bujqësi dhe furnizim.

“Aktivitete të tilla dëshmojnë rëndësinë e prodhuesve vendorë dhe ndikimin që ata kanë në ekonominë e vendit. Mbështetja e produkteve të prodhuara në Kosovë nënkupton mbështetje për punësimin, bujqit vendorë, familjet dhe zhvillimin ekonomik. Puna dhe investimi i AMG Group në prodhimin vendor janë një shembull i rëndësishëm i kontributit që bizneset kosovare japin në zhvillimin e ekonomisë dhe fuqizimin e zinxhirit vendor të furnizimit. Përkrahja e prodhimit vendor është përkrahje për ekonominë e Kosovës - sepse çdo produkt vendor krijon vende pune dhe hap mundësi të reja për familjet dhe bizneset tona”, deklaroi kryetari Krasniqi.

20/08/2026

DHTIK vlerëson kontributin e kompanisë Dino në zhvillimin e sektorit privat dhe ekonomisë së Kosovës

Nevoja për ndryshime të shumta ligjore, duke nisur nga ato në fushën e tatimeve, përmirësimi i marrëdhënieve ndërmjet punëdhënësve dhe punëkërkuesve, lehtësimi i procedurave për licenca, si dhe rritja e angazhimit institucional në zgjidhjen e problemeve me të cilat përballen bizneset, ishin disa prej çështjeve të diskutuara mes drejtorit të Dhomës së Tregtisë dhe Industrisë Kosovë, Kushtrim Ahmeti, dhe drejtorit të kompanisë anëtare “Dino”, Abedin Salihu.

Drejtori i DHTIK-së ka falënderuar kompaninë “Dino” për mbështetjen e vazhdueshme ndaj Dhomës dhe për kontributin aktiv në takime, diskutime dhe angazhime të ndryshme që lidhen me avancimin e interesave të bizneseve.

Në veçanti, është vlerësuar pjesëmarrja dhe kontributi i kompanisë “Dino” në Grupin Punues për ndryshimin e Ligjit për Pronën Publike, duke dëshmuar gatishmërinë e saj për të kontribuar në gjetjen e zgjidhjeve për çështje që ndikojnë drejtpërdrejt në zhvillimin e bizneseve dhe ekonomisë së Kosovës.

Për DHTIK-në, angazhimi i kompanive anëtare si “Dino” është një vlerë e veçantë, pasi bashkëpunimi i drejtpërdrejtë me bizneset mundëson identifikimin e problemeve reale dhe adresimin e tyre te institucionet përgjegjëse.

E themeluar në vitin 2000, kompania “Dino” gjatë viteve ka ndërtuar një emër të besueshëm në industrinë e ndërtimit dhe në sektorë të ndryshëm të ekonomisë. Përmes fokusit në cilësi, zgjidhje inovative dhe përkushtimit ndaj klientëve, “Dino” vazhdon të zgjerojë veprimtarinë e saj dhe të kontribuojë në zhvillimin e sektorit privat në Kosovë.

19/08/2026

Risamont - pjesë e suksesit në energji

Në kuadër të vizitave te bizneset anëtare, drejtues të Dhomës së Tregtisë dhe Industrisë Kosovë vizituan kompaninë “Risamont” SH.P.K., e cila vepron në sektorin e energjisë dhe vazhdon të jetë pjesë e projekteve të rëndësishme në vend.

Me pronarin, Riad Rexhepi, u diskutuan për rrugëtimin e “Risamont” dhe përvojën e krijuar ndër vite.

Rexhepi theksoi se, krahas përvojës dhe angazhimit të vazhdueshëm, bizneset private përballen me sfida të shumta.

Gjatë këtij takimi u theksua nevoja që vendi të ketë institucione funksionale dhe tejkalim të ngërçit politik, pasi ekonomia dhe bizneset janë duke pësuar humbje të mëdha, derisa drejtori i DHTIK-së, Ahmeti ritheksoi angazhimin e Dhomës në mbështetje të bizneseve.

17/08/2026

Edhe një vepër me shumë rëndësi për të ardhmen ekonomike të vendit tonë po ndërtohet nga kompania jonë anëtare PRO&CO Group

12/08/2026

DHTIK - ura që lidh bizneset e Kosovës me partnerët ndërkombëtarë

Në kuadër të angazhimeve të Dhomës së Tregtisë dhe Industrisë Kosovë për fuqizimin e bashkëpunimit ndërkombëtar, drejtori i saj, Kushtrim Ahmeti, ka pritur në takim përfaqësuesit e Asamblesë së Eksportuesve Turq.

Në këtë takim është diskutuar për mundësitë për rritjen e bashkëpunimit dhe ndërmarrjen e iniciativave që kanë për qëllim thellimin e marrëdhënieve ekonomike dhe tregtare ndërmjet Kosovës dhe Turqisë.

Drejtori Ahmeti përmendi aktivitetet e Dhomës në mbështetje të bizneseve dhe angazhimet e saj për fuqizimin e prodhimit vendor, promovimin e lidhjeve dhe bashkëpunimeve me bizneset e huaja, si dhe nxitjen e investimeve të huaja në Kosovë.

Në takim u diskutua edhe për Forumin e ardhshëm të bizneseve turke dhe atyre të Kosovës, ku DHTIK do të japë kontributin e saj me qëllim të krijimit të mundësive konkrete për takime B2B, shkëmbim të përvojave dhe identifikim të partneriteteve të reja ndërmjet bizneseve të të dyja vendeve.

Drejtori Ahmeti ka deklaruar se DHTIK mbetet e përkushtuar në krijimin e urave të reja të bashkëpunimit ndërkombëtar dhe në ofrimin e mundësive për bizneset vendore që të zgjerojnë partneritetet, tregjet dhe mundësitë e investimeve.

11/08/2026

Tejkaloni ngërçin politik, vendi ka nevojë për institucione, jo për zgjedhje të reja

Dhoma e Tregtisë dhe Industrisë Kosovë shpreh shqetësimin e saj për vonesat në konstituimin e institucioneve të vendit, në veçanti të Kuvendit dhe Qeverisë së Kosovës, pasi mungesa e institucioneve funksionale krijon pasiguri dhe shkakton dëme të mëtejshme për ekonominë dhe bizneset vendore.

DHTIK u bën thirrje të gjitha partive politike të përfaqësuara në Kuvend që të tejkalojnë ngërçin politik dhe të mundësojnë sa më shpejt formimin e institucioneve, pasi Kosovës i duhen institucione funksionale dhe vendimmarrje, e jo një cikël tjetër zgjedhor që do ta thellonte edhe më shumë pasigurinë për bizneset dhe ekonominë.

Konstituimi i Kuvendit dhe formimi i Qeverisë janë të domosdoshëm edhe për shkak të agjendës së madhe që e pret vendin në fushën ekonomike.

DHTIK ka identifikuar një numër të madh të ligjeve dhe çështjeve që kërkojnë ndryshim, plotësim apo rregullim të ri, përfshirë Ligjin për Tregti të Brendshme, Ligjin për Falimentim, Ligjin për Miniera dhe Minerale, Ligjin e Punës, Ligjin për Pushimin e Lehonisë, legjislacionin për TVSH-në, Ligjin për Pronën Publike, Ligjin për Investime Strategjike dhe Ligjin për Shoqëritë Tregtare, si dhe një sërë çështjesh të tjera që lidhen drejtpërdrejt me funksionimin dhe konkurrueshmërinë e biznesit.

DHTIK konsideron se këto çështje nuk mund të mbeten të bllokuara për shkak të mungesës së institucioneve, pasi bizneset kanë nevojë për siguri juridike, politika të parashikueshme, lehtësim të barrës administrative dhe fiskale, përkrahje për prodhimin vendor dhe investimet, si dhe një klimë më të favorshme për zhvillim.

Prandaj, DHTIK u bën thirrje partive politike që ta vendosin interesin e vendit dhe të ekonomisë mbi dallimet politike, të përfundojnë procesin e konstituimit dhe t’u japin qytetarëve dhe komunitetit të biznesit institucione që punojnë dhe marrin përgjegjësi.

31/07/2026

Reagim nga Dhoma e Tregtisë dhe Industrisë Kosovë

Dhoma e Tregtisë dhe Industrisë Kosovë shpreh shqetësimin lidhur me publikimin në faqen e internetit të Agjencisë së Regjistrimit të Bizneseve të dokumenteve që përmbajnë të dhëna të bizneseve dhe të pronarëve të tyre.

DHTIK ka pranuar ankesa nga bizneset anëtare lidhur me lejimin e qasjes së plotë në dokumentet si; statuti dhe marrëveshjet e shoqërisë, duke përfshirë këtu edhe të dhënat personale të pronarëve dhe personave të autorizuar, të cilat janë të ndaluara me Ligjin për Mbrojtjen e të Dhënave Personale.

Publikimi i këtyre dokumenteve me këto të dhëna mund të cenojë konfidencialitetin e marrëdhënieve kontraktuale dhe afariste.

Andaj, DHTIK i bën thirrje institucioneve përgjegjëse për ndërmarrje të veprimeve urgjente për të adresuar këto çështje, si dhe të kërkohet përgjegjësi nga personat përgjegjës.

Call now to connect with business.

28/07/2026

Medifab i bashkohet familjes së bizneseve të DHTIK

Kompania e njohur Medifab është anëtarja më e re e Dhomës së Tregtisë dhe Industrisë Kosovë, duke iu bashkuar komunitetit të bizneseve që kontribuojnë në zhvillimin ekonomik dhe avancimin e sektorit privat në vend.

Kompania është e specializuar në prodhimin dhe furnizimin me produkte njëpërdorimshme me standarde të larta higjienike, duke ofruar një gamë të gjerë produktesh për sektorë të ndryshëm të industrisë dhe shërbimeve.

Në portofolin e saj përfshihen përparëse njëpërdorimshme, maska mbrojtëse, doreza nitrili, kapela higjienike, mbulesa për krahë, këmisha për vizitorë dhe produkte të tjera që përdoren gjerësisht në industrinë ushqimore, laboratorë, sektorin e shërbimeve dhe ambientet profesionale.

Medifab është prodhuesi i vetëm në Kosovë për kalaqe njëpërdorimshme.

Misioni i kompanisë është të ofrojë produkte cilësore që garantojnë higjienë, siguri dhe praktikë në përdorim, duke u ofruar klientëve një zgjidhje të plotë furnizimi në një vend të vetëm.

Përmes përzgjedhjes së kujdesshme të materialeve, kontrollit të vazhdueshëm të cilësisë dhe bashkëpunimit me partnerët, kompania synon të kontribuojë në krijimin e ambienteve më të pastra, më të organizuara dhe më të sigurta për bizneset dhe profesionistët.

Vizioni i Medifab Global është të shndërrohet në një nga kompanitë më të besueshme në rajon në prodhimin dhe furnizimin me produkte njëpërdorimshme, duke zgjeruar vazhdimisht gamën e produkteve, duke investuar në inovacion dhe duke ndërtuar partneritete afatgjata me klientë dhe distributorë.

Për më shumë: www.medifabco.com

23/07/2026

Extra Colors - mbi gjysmë shekulli traditë duke i dhënë ngjyrë zhvillimit ekonomik

Përfaqësuesit e Dhomës së Tregtisë dhe Industrisë Kosovë vizituan kompaninë anëtare Extra Colors në Vushtrri, ku bashkë me drejtuesit e kompanisë diskutuan për sfidat me të cilat përballen prodhuesit vendorë, me theks të veçantë në rritjen e eksporteve, konkurrueshmërinë në tregjet ndërkombëtare, kostot e të bërit biznes dhe nevojën për politika më mbështetëse për sektorin prodhues.

Gjatë takimit, të dyja palët vlerësuan se prodhimi vendor mbetet një nga shtyllat kryesore të zhvillimit ekonomik të Kosovës dhe se nevojitet një angazhim më i madh institucional për krijimin e kushteve më të favorshme për investime, zgjerimin e kapaciteteve prodhuese dhe promovimin e eksporteve kosovare.

Drejtori Ekzekutiv i DHTIK-së, Kushtrim Ahmeti, ritheksoi përkushtimin e Dhomës për të vazhduar përfaqësimin e interesave të bizneseve prodhuese dhe adresimin e sfidave të tyre pranë institucioneve përgjegjëse, me synim përmirësimin e klimës së të bërit biznes dhe fuqizimin e ekonomisë së vendit.

Ai theksoi se vetëm përmes bashkëpunimit të ngushtë ndërmjet sektorit privat dhe institucioneve mund të hartohen politika që nxisin zhvillimin industrial, rrisin konkurrueshmërinë e produkteve vendore dhe kontribuojnë në një rritje ekonomike të qëndrueshme.

E themeluar në vitin 1959, Extra Colors është një kompani moderne prodhuese, e specializuar në prodhimin e veshjeve murale dhe materialeve ndërtimore me cilësi të lartë.

Me investime të vazhdueshme në teknologji dhe zhvillimin e produkteve, kompania synon të përmbushë nevojat e ndërtuesve, profesionistëve dhe konsumatorëve, duke forcuar njëkohësisht praninë e saj në tregun vendor dhe atë ndërkombëtar.