What are the opening hours?

Monday 09:00 - 17:00 Tuesday 08:00 - 17:00 Wednesday 09:00 - 17:00 Thursday 09:00 - 17:00 Friday 09:00 - 17:00

BSPK - Bashkimi i Sindikatave te Pavarura te Kosoves

Home
Kosovo
Pristina
BSPK - Bashkimi i Sindikatave te Pavarura te Kosoves

Call Directions Website Contact the organization

Union of Independent Trade Unions of Kosova (BSPK) is established in its First Congress held in Gjak

Themeluar në Kongresin I, të mbajtur në Gjakovë prej 30 qershor deri më 1 korrik 1990, si rezultat i diskriminimit në baza etnike, politike dhe të dëbimit të dhunshëm nga puna, nga aktivitetet sindikale dhe nga administrata të afro 150.000 punëtorëve shqiptarë nga regjimi komunist serb. Metodat e presionit ndaj punëtorëve në vitet e dhunës ishte detyrimi i punëtorëve për të nënshkruar lojalitetin ndaj regjimit serb ose largimi nga puna. Punëtorët nuk pranuan dhe u organizuan, dhe kështu lindi BSPK-ja (Bashkimi i Sindikatave të Pavarura të Kosovës) që atë kohë kishte rreth 127.800 anëtarë nëpër 19 Sindikata të Pavarura të veprimtarive të ndryshme. BSPK-ja sot është një organizatë e hapur, pluraliste, demokratike dhe pranohet tërësisht nga Organizata Ndërkombëtare e Punës - ONP në kuadër të KB-së, nga Konfederata Evropiane e Sindikatave - ETUC, dhe është anëtare fuqiplotë e Konfederatës Ndërkombëtare të Sindikatave -ITUC.

08/10/2026

Kryetari i BSPK-së, Prof. dr. Atdhe Hykolli, e uron akademike Justina Shiroka-Pulën për zgjedhjen në detyrën e Presidentes së Republikës së Kosovës

Komunikatë për medie e Bashkimit të Sindikatave të Pavarura të Kosovës

Prishtinë, 8 tetor 2026

Bashkimi i Sindikatave të Pavarura të Kosovës (BSPK), në emër të anëtarësisë së vet dhe të punëtorëve të Kosovës, e uron akademike Justina Shiroka-Pulën për zgjedhjen në detyrën e Presidentes së Republikës së Kosovës.

Kryetari i BSPK-së, i ka shprehur Presidentes së re urimet më të mira dhe i ka dëshiruar shëndet e suksese në ushtrimin e detyrës më të lartë shtetërore. BSPK-ja e sheh zgjedhjen e saj si hap të rëndësishëm për stabilitetin institucional të vendit dhe për kthimin e vëmendjes te çështjet që e prekin jetën e përditshme të qytetarëve.

Përvoja e gjatë e akademike Shiroka-Pulës në Universitetin e Prishtinës, në jetën publike dhe në krye të Akademisë së Shkencave dhe të Arteve të Kosovës është një besim më shumë se institucioni i Presidentit do të udhëhiqet me dije, me maturi dhe me ndjenjë përgjegjësie ndaj të gjithë qytetarëve.

BSPK-ja shpreh bindjen se Presidentja, si përfaqësuese e unitetit të popullit, do të jetë zë mbështetës për dinjitetin e punëtorëve, për drejtësinë sociale dhe për forcimin e dialogut social në Republikën e Kosovës. Punëtorët e Kosovës presin që çështjet e tyre, nga siguria në punë e zbatimi i ligjit deri te Marrëveshja e Përgjithshme Kolektive, të kenë vendin që u takon në vëmendjen e institucioneve më të larta të shtetit.

Si partner social, BSPK-ja shpreh gatishmërinë e plotë për bashkëpunim me institucionin e Presidentes në të mirë të punëtorëve dhe të vendit.

Zyra e Kryetarit të BSPK-së

05/10/2026

Hykolli: Vlerat e UÇK-së mbrohen duke respektuar shtetin dhe Policinë e Kosovës

Komunikatë për medie e Bashkimit të Sindikatave të Pavarura të Kosovës
Prishtinë, 5 tetor 2026

Kryetari i Bashkimit të Sindikatave të Pavarura të Kosovës, Prof. dr. Atdhe Hykolli, u bën thirrje qytetarëve dhe qytetareve që protestat në mbrojtje të vlerave të Ushtrisë Çlirimtare të Kosovës t’i zhvillojnë paqësisht, me përgjegjësi ndaj vendit dhe me respekt të plotë për Policinë e Kosovës. E drejta për të protestuar dhe detyrimi për të ruajtur sigurinë publike janë përgjegjësi që e forcojnë rendin demokratik dhe duhen të ushtrohen në respekt të ndërsjellë.

Liria e Kosovës u arrit me luftën e UÇK-së, me sakrificën e popullit dhe me mbështetjen e aleatëve tanë. Ruajtja e saj kërkon përgjegjësi ndaj institucioneve dhe ndaj besimit që lidh Kosovën me vendet mike. Mbrojtja e vlerave të luftës çlirimtare merr kuptim të plotë kur shoqërohet me kujdesin për shtetin, për dinjitetin e qytetarëve dhe qytetareve dhe për sigurinë e atyre që i shërbejnë vendit.

“Policja dhe polici i Kosovës janë vajzat dhe djemtë tanë, janë aty për ne dhe për vendin. Kur mbrojnë institucionet në përmbushje të detyrës ligjore, ata dhe ato mbrojnë edhe të arriturat e lirisë dhe amanetin e atyre që dhanë jetën për të. Prandaj u bëj thirrje të gjithë protestuesve dhe protestueseve që ta respektojnë paprekshmërinë e tyre, të mos i provokojnë dhe t’i lejojnë ta kryejnë detyrën me dinjitet”, thekson Kryetari Hykolli.

Çdo veprim dhune, kërcënimi a dëmtimi ndaj polices dhe policit të Kosovës është i papranueshëm dhe nuk do të përkrahet nga BSPK-ja. Një veprim i tillë cenon sigurinë, dobëson mesazhin e protestës dhe dëmton qëllimin në emër të të cilit ajo zhvillohet. Përgjegjësia e organizatorëve, pjesëmarrësve dhe pjesëmarrëseve është që kërkesën e tyre ta mbajnë të qartë dhe protestën paqësore, sepse respektimi i shtetit të Kosovës i jep forcë politike dhe besueshmëri publike mbrojtjes së vlerave të UÇK-së.

Zyra e Kryetarit të BSPK-së

14/09/2026

Kryetari i BSPK-së, prof. dr. Atdhe Hykolli, uron fillimin e vitit të ri akademik në Universitetin e Prishtinës

Komunikatë për medie e Bashkimit të Sindikatave të Pavarura të Kosovës (BSPK)

Prishtinë, 14 shtator 2026

Nesër hapen dyert e Universitetit të Prishtinës dhe Bashkimi i Sindikatave të Pavarura të Kosovës u uron fillimin e vitit të ri akademik studentëve, mësimdhënësve dhe personelit administrativ të këtij institucioni.

Për këtë universitet çdo hapje viti është edhe një fitore e vogël mbi harresën. I themeluar më 1970, ai u bë shpejt shtëpi e dijes dhe e vetëdijes njëkohësisht, prandaj prej auditoreve të tij, në pranverën e vitit 1981, doli zëri i studentëve për liri e barazi, zë që u pagua me përjashtime, me burgje dhe me një presion të pandërprerë. Ai presion kulmoi në vitet nëntëdhjetë, kur punonjësit shqiptarë u dëbuan nga puna dhe fakultetet u uzurpuan, e universiteti mbeti pa objekte, por jo pa mësim, sepse ligjëratat vazhduan nëpër shtëpi private, pa laboratorë, pa biblioteka dhe pa paga. Nuk ishte zgjidhje e përkohshme organizative, siç thuhet sot me lehtësi, ishte vendim i përditshëm i mijëra njerëzve për të mos hequr dorë, ndërsa familjet shqiptare hapnin dyert e veta dhe mbanin brenda tyre atë që shteti i asaj kohe donte ta mbyllte.

Pikërisht nga ajo qëndresë e heshtur lindi vala e re e vitit 1997, kur studentët dolën në rrugë me marshime paqësore për kthimin e objekteve universitare dhe, edhe pse u përballën me dhunë policore, e thyen heshtjen mbi Kosovën e nxorën çështjen e arsimit shqip para syve të botës. Rruga që nisi atëherë u mbyll me çlirimin e vendit, me kthimin në hapësirat e veta dhe me punën në liri.

Studentët që nesër hyjnë në auditore nuk e kanë jetuar asnjë prej atyre viteve, dhe kjo është arritja më e madhe e brezave që erdhën para tyre. Atyre sot u kërkohet cilësi, dhe kjo është e drejtë, por cilësia nuk krijohet me thirrje. Ajo kërkon paga që e nderojnë punën e mësimdhënësit dhe të punonjësit administrativ, kushte pune të denja, kërkim shkencor të financuar dhe studime që e nxjerrin studentin në punë e jo në pritje.

BSPK-ja u dëshiron studentëve sukses në studime dhe stafit të universitetit një vit të mbarë pune. Ata e mbajtën arsimin në këmbë atëherë kur s'kishin as çati as rrogë, prandaj zëri i tyre sot nuk guxon të mbetet pa u dëgjuar atje ku vendoset për pagën, për kushtet e punës dhe për dinjitetin e profesionit.

Zyra e Kryetarit të BSPK-së

13/09/2026

BSPK URON QEVERINË E RE
Dialogu social duhet të kurorëzohet me Marrëveshjen e Përgjithshme Kolektive

Komunikatë për medie e Bashkimit të Sindikatave të Pavarura të Kosovës
Prishtinë, 13 shtator 2026

Kryetari i Bashkimit të Sindikatave të Pavarura të Kosovës, Prof. dr. Atdhe Hykolli, në emër të BSPK-së, uron konstituimin e Qeverisë së Republikës së Kosovës, paraqitjen e kabinetit dhe të Programit Qeverisës, me pritjen që ky mandat të sjellë edhe një hov të ri në bashkëpunimin ndërmjet partnerëve socialë.

BSPK mirëpret zotimet që lidhen drejtpërdrejt me pozitën ekonomike dhe sociale të punëtorëve, në veçanti pagën e katërmbëdhjetë për të punësuarit në sektorin publik dhe mostatimin e pagës minimale prej 500 eurosh. Për BSPK-në, rëndësia e këtyre zotimeve do të matet me zbatimin e tyre dhe me ndikimin real në jetën e të punësuarve.

Në të njëjtën kohë, presim që në ditët në vijim të konkretizohet konstituimi i Këshillit Ekonomiko-Social - KES dhe që, pas funksionalizimit të tij, të hapen pa vonesë negociatat për Marrëveshjen e Përgjithshme Kolektive. Pikërisht aty duhet të shihet fuqia e dialogut social dhe jo vetëm në zotime dhe takime, por në marrëveshje të negociuara, të nënshkruara dhe të zbatueshme.

Kryetari Hykolli vlerëson se demokracia funksionale nuk matet vetëm me konstituimin e institucioneve, por edhe me mënyrën se si ato dëgjojnë dhe përfshijnë përfaqësuesit legjitimë të punëtorëve në ndërtimin e politikave publike. Ky është standardi evropian i partneritetit social dhe ky duhet të jetë edhe drejtimi ynë.

BSPK mbetet e gatshme për bashkëpunim serioz dhe të qëndrueshëm me institucionet, me synimin që dialogu social të japë rezultate të prekshme, ndërsa konkretizimi i KES-it dhe Marrëveshja e Përgjithshme Kolektive të bëhen dëshmia më e qartë se partneriteti social po funksionon në dobi të punëtorëve dhe të zhvillimit të vendit.

Zyra e Kryetarit të BSPK-së

11/09/2026

BSPK u bën thirrje sindikatave anëtare t’i bashkohen “Marsh*t për Liri”

Komunikatë për medie e Bashkimit të Sindikatave të Pavarura të Kosovës
Prishtinë, 11 shtator 2026

Bashkimi i Sindikatave të Pavarura të Kosovës - BSPK, i udhëhequr nga Kryetari Prof. dr. Atdhe Hykolli, u bën thirrje sindikatave anëtare, punëtorëve të sektorit publik e privat dhe familjeve të tyre që nesër, më 12 shtator 2026, nga ora 14:00, të marrin pjesë në “Marshin për Liri” në sheshin “Skënderbeu” në Prishtinë.

Për BSPK-në, kjo nuk është çështje e politikës së ditës, por e kujtesës historike dhe e dinjitetit shoqëror. UÇK-ja doli nga një shoqëri e përballur me represion, me përjashtim dhe me dhunë. Doli nga punëtorët e larguar nga puna, nga minatorët, nga mësuesit, nga familjet që mbajtën gjallë arsimin shqip dhe nga mërgata që e mbështeti vendin në vitet më të vështira.

Vend të veçantë në këtë histori ka Lëvizja Studentore e 1 tetorit 1997, kur studentët e Universitetit të Prishtinës dolën paqësisht për të drejtën për arsim dhe u përballën me dhunën e policisë serbe. Shumë prej tyre, pak muaj më vonë, iu bashkuan UÇK-së e disa nuk u kthyen më në auditorë. Prandaj studenti, punëtori dhe luftëtari i përkasin së njëjtës vijë të rezistencës për liri.

BSPK respekton shtetin e së drejtës dhe të drejtën për gjykim të drejtë e të paanshëm, por thekson se drejtësia duhet të mbështetet vetëm në prova dhe përgjegjësi individuale, pa rishkruar karakterin çlirimtar të luftës së UÇK-së.

BSPK u bën thirrje sindikatave anëtare dhe zyrave regjionale të ndihmojnë organizimin e pjesëmarrjes dhe që marshi të zhvillohet me qetësi, me rend dhe me dinjitet qytetar.

Punëtorët e Kosovës do të jenë në shesh jo si palë politike, por si pjesë e një populli që lirinë nuk e mori dhuratë dhe që nuk pranon që sakrifica për të të shndërrohet në faj.

Zyra e Kryetarit të BSPK-së

03/09/2026

Në përkujtim të 36-vjetorit të Grevës së Përgjithshme të 3 shtatorit 1990

Komunikatë për medie e Bashkimit të Sindikatave të Pavarura të Kosovës
Prishtinë, 3 shtator 2026

Sot, kur janë mbushur tridhjetë e gjashtë vjet nga Greva e Përgjithshme e 3 shtatorit 1990, Kryetari i Bashkimit të Sindikatave të Pavarura të Kosovës, Prof. dr. Atdhe Hykolli, përkujton me nderim të thellë punëtorët dhe qytetarët e Kosovës, të cilët, në njërën ndër periudhat më të rënda të historisë sonë, u ngritën bashkërisht në mbrojtje të të drejtave të punës, të dinjitetit njerëzor dhe të vullnetit politik e kombëtar të popullit të Kosovës.

Greva e Përgjithshme e 3 shtatorit 1990 nuk ishte vetëm ndërprerje e punës. Ajo ishte përgjigje e organizuar qytetare dhe sindikale ndaj masave të dhunshme të regjimit serb, të largimit diskriminues të punëtorëve shqiptarë nga vendet e punës, të suprimimit të autonomisë së Kosovës dhe të goditjes së institucioneve të saj arsimore, kulturore e shoqërore. Thirrjes së Bashkimit të Sindikatave të Pavarura të Kosovës iu përgjigjën punëtorët, studentët, zejtarët dhe qytetarët anekënd vendit, duke e shndërruar grevën njëditore në njërin prej manifestimeve më të fuqishme të rezistencës paqësore gjithëpopullore.

Më 3 shtator 1990, punëtorët e Kosovës dëshmuan se djersa e derdhur me punë nuk mund të humbet, nuk mund të tjetërsohet dhe nuk mund të nëpërkëmbet nga asnjë pushtet. Ata treguan se vendi i punës nuk është vetëm burim i të ardhurave, por hapësirë e dinjitetit njerëzor, e përgjegjësisë shoqërore dhe e lirisë. Duke kërkuar mbrojtjen e të drejtave të tyre, ata vunë edhe themelet e një organizimi sindikal që çështjen ekonomike e sociale të punëtorit e lidhi pandashëm me kërkesën për liri, për barazi dhe të drejtën e Kosovës për ta përcaktuar të ardhmen e vet.

Greva e Përgjithshme ishte e qetë në formën e saj, por e fuqishme në përmbajtjen dhe jehonën e saj. Ajo i tregoi botës se një popull i shtypur mund të kundërshtojë paqësisht, me organizim, me disiplinë dhe me vetëdije të lartë qytetare. Prandaj, 3 shtatori 1990 zë vend të veçantë jo vetëm në historinë e lëvizjes sindikale, por edhe në historinë politike dhe shoqërore të Kosovës. Ishte dita kur punëtori, duke e mbrojtur të drejtën e vet, mbrojti njëkohësisht edhe të drejtën e vendit të vet.

Sot jetojmë në Republikën e lirë e demokratike dhe të pavarur të Kosovës, por liria politike nuk e përmbush kuptimin e vet të plotë nëse nuk shoqërohet me drejtësi ekonomike, me siguri në punë dhe me mirëqenie sociale. Gjendja e shumë punëtorëve, pagat që nuk e përballojnë koston e jetesës, mungesa e sigurisë së mjaftueshme në vendin e punës dhe zvarritja e dialogut social na dëshmojnë se kërkimi i të drejtave nuk ka përfunduar. Ai ka ndryshuar rrethanat dhe mjetet, por jo domosdoshmërinë e vet.

Duke përkujtuar 3 shtatorin 1990, Kryetari i BSPK-së, Prof. dr. Atdhe Hykolli, i bën thirrje Partnerit Social, Qeverisë së Republikës së Kosovës, që pa vonesa të mëtejshme të krijojë kushtet për negocimin dhe nënshkrimin e Marrëveshjes së Përgjithshme Kolektive dhe ta dëgjojë zërin e BSPK-së si zë legjitim të punëtorëve të vendit.

Përkujtimi i Grevës së Përgjithshme të 3 shatorit 1990 nuk duhet të mbetet vetëm nderim për një datë historike. Ai duhet të jetë zotim institucional se djersa e punëtorit nuk do të zhvlerësohet, se dinjiteti i tij nuk do të negociohet dhe se e drejta e tij për përfaqësim nuk do të anashkalohet. Punëtorët e 3 shtatorit 1990 na mësuan se të drejtat nuk dhurohen po ato kërkohen me organizim, mbrohen me solidaritet dhe jetësohen përmes dialogut e përgjegjësisë institucionale.

Lavdi qëndresës së punëtorëve të Kosovës!
Nderim Grevës së Përgjithshme të 3 shtatorit 1990!

Zyra e Kryetarit të BSPK-së

31/08/2026

Urimi i Kryetarit të BSPK-së për fillimin e vitit të ri shkollor

Komunikatë për medie e Bashkimit të Sindikatave të Pavarura të Kosovës
Prishtinë, 31 gusht 2026

Kryetari i Bashkimit të Sindikatave të Pavarura të Kosovës – BSPK, Prof. dr. Atdhe Hykolli, uron fillimin e vitit të ri shkollor:

“Në emër të Bashkimit të Sindikatave të Pavarura të Kosovës dhe në emrin tim personal, ua uroj fillimin e vitit të ri shkollor të gjithë qytetarëve të Republikës së Kosovës, e në rend të parë mësueseve e mësuesve, mësimdhënëseve e mësimdhënësve, të cilëve shoqëria ua beson një nga përgjegjësitë e saj më të mëdha, ua beson formimin e brezave dhe ndërtimin e së ardhmes.

Me respekt të veçantë, uroj punëtoret e punëtorët e administratës, punëtoret teknike e punëtorët teknikë, puna e të cilëve rrallë shihet e për të cilën edhe më rrallë flitet, por pa të cilën shkolla nuk mund ta bëjë asnjë ditë të saj. Uroj po ashtu drejtuesit dhe menaxhmentet e shkollave anekënd vendit, me dëshirën që përgjegjësia, mirëkuptimi dhe respekti për njeriun e punës ta përcjellin tërë vitin shkollor.

Urimin më të përzemërt ua drejtoj nxënëseve dhe nxënësve, e posaçërisht vogëlusheve e vogëlushëve që për herë të parë ulen në bankat shkollore. Uroj që shkolla t’u bëhet vend i dijes, i edukimit, i miqësisë dhe i ëndrrave që marrin udhë. Prindërve u dëshiroj gëzim e krenari me rritjen dhe arritjet e fëmijëve të tyre.

Rrugëtimin tim profesional e kam nisur si mësimdhënës dhe e di peshën e ditës së parë të vitit shkollor. Prandaj ky urim nuk është vetëm urim institucional. Fillimi i vitit shkollor është fillimi i një pune të përbashkët për të ardhmen e vendit.

Një shoqëri që e çmon shkollën, e çmon dijen. Një shoqëri që e respekton mësuesen e mësuesin, mësimdhënësen e mësimdhënësin dhe çdo punëtore e punëtor të arsimit, respekton punën dhe vetveten. Ndërsa një shoqëri që kujdeset për fëmijët e saj, e ndërton të ardhmen e vet.

Urime dhe mbarësi në vitin e ri shkollor!

Prof. dr. Atdhe Hykolli
Kryetar i Bashkimit të Sindikatave të Pavarura të Kosovës – BSPK”

Zyra e Kryetarit të BSPK-së

29/08/2026

Fuqizimi i sindikatave, kusht për dialog social dhe përfaqësim të denjë të punëtorëve

Komunikatë për medie e Bashkimit të Sindikatave të Pavarura të Kosovës
Prishtinë, 29 gusht 2026

Kryetari i Bashkimit të Sindikatave të Pavarura të Kosovës – BSPK, prof. dr. Atdhe Hykolli, mori pjesë në seminarin dyditor me temën “Fuqizimi i SBASHK-ut për dialog social, negociata kolektive dhe përfaqësim të punëtorëve të arsimit”, të organizuar në Istog nga Sindikata e Bashkuar e Arsimit, Shkencës dhe Kulturës – SBASHK, me mbështetjen e Qendrës Amerikane të Solidaritetit.

Në seminar morën pjesë edhe Ministri në detyrë i Arsimit dhe Shkencës, z. Hajrulla Çeku, Kryetari i SBASHK-ut, z. Rrahman Jasharaj, Sekretari i Përgjithshëm i SBASHK-ut, z. Ymer Ymeri, si dhe zyrtarja e Qendrës Amerikane të Solidaritetit, Zyra në Tiranë, znj. Brunilda Hylviu.

Në fjalën e tij, Kryetari Hykolli theksoi se dialogu social nuk duhet të mbetet takim i rastit ose shprehje e vullnetit të çastit, por duhet të institucionalizohet si proces i rregullt, i mbështetur në mirëbesim, në përgjegjësi dhe në marrëveshje të zbatueshme. Dialogu social, sipas tij, i ul partnerët socialë në tryezën e partneritetit të barabartë, ku, përmes bashkëbisedimit, argumentimit dhe negocimit, duhen të gjenden rrugëzgjidhje të qëndrueshme për çështjet që lidhen me mirëqenien ekonomike dhe sociale të punëtorëve të arsimit, por edhe të të gjithë të punësuarve në vendin tonë.

Kryetari Hykolli nënvizoi se dialogu social merr kuptim vetëm kur prodhon rezultate konkrete, ndërsa partneriteti dëshmohet atëherë kur kërkesat e drejta të punëtorëve shndërrohen në politika, marrëveshje dhe masa të zbatueshme. Prandaj, institucionet dhe sindikatat duhen të ulen përballë njëra-tjetrës jo vetëm për t’i paraqitur problemet, por për t’u dhënë atyre zgjidhje të drejta, të përbashkëta dhe afatgjata.

Ministri në detyrë, z. Hajrulla Çeku, shprehu përkushtimin e Ministrisë për avancimin e dialogut social dhe për ndërtimin e partneritetit të qëndrueshëm me përfaqësuesit e punëtorëve të arsimit. Kryetari i SBASHK-ut, z. Rrahman Jasharaj, vlerësoi rëndësinë e bashkëpunimit me Ministrinë, ndërsa pjesëmarrja e Sekretarit të Përgjithshëm, z. Ymer Ymeri, dhe e znj. Brunilda Hylviu dëshmoi rëndësinë e fuqizimit të kapaciteteve sindikale dhe të bashkëpunimit ndërkombëtar.

BSPK-ja e mirëpret gatishmërinë e shprehur për dialog, por vlerëson se pesha e tij matet me rezultatet konkrete. Prandaj, ajo përsërit kërkesën për funksionalizimin e plotë të Këshillit Ekonomik-Social dhe për përfundimin e Marrëveshjes së Përgjithshme Kolektive.

Duke e përgëzuar SBASHK-un për organizimin, dhe Qendrën Amerikane të Solidaritetit për mbështetje e Ministrinë e Arsimit, të Shkencës, të Teknologjisë dhe të Inovacionit për pjesëmarrje, BSPK-ja rikonfirmon mbështetjen për fuqizimin e strukturave të veta anëtare, sepse vetëm sindikata e përgatitur, e organizuar dhe e bashkuar mund t’i përfaqësojë punëtorët me fuqinë dhe peshën që u takon.

Zyra e Kryetarit të BSPK-së

25/08/2026

Reagim i Kryesisë Ekzekutive të BSPK-së
Të mos instrumentalizohet dhimbja e familjeve dhe e punëtorëve
Përgjegjësia sindikale kërkon maturi, punë dhe respektim të organizimit sindikal

Komunikatë për medie e Bashkimit të Sindikatave të Pavarura të Kosovës
Prishtinë, 25 gusht 2026

Kryesia Ekzekutive e Bashkimit të Sindikatave të Pavarura të Kosovës – BSPK, duke shprehur edhe një herë keqardhjen e thellë për humbjen tragjike të jetës së katër punëtorëve të Korporatës Energjetike të Kosovës, bashkëndien me familjet e tyre, me kolegët dhe me gjithë punëtorët e KEK-ut. Pikërisht respekti për jetët e humbura dhe dhimbjen e familjeve na obligon që për këtë çështje të flasim me përgjegjësi, me maturi e me dinjitet, e jo ta instrumentalizojmë tragjedinë për përplasje ndërmjet organizimeve sindikale ose për sulme ndaj individëve.

Kryesia Ekzekutive e BSPK-së është e detyruar të reagojë ndaj deklaratave të pamatura të përfaqësuesit të të ashtuquajturës Sindikatë e Re e KEK-ut dhe, veçanërisht, ndaj përpjekjes për ta paraqitur BSPK-në dhe Kryetarin e saj si të painteresuar për të drejtat, kushtet dhe sigurinë e punëtorëve. Deklarata të tilla nuk e mbrojnë punëtorin, nuk e bëjnë vendin e tij të punës më të sigurt dhe nuk e fuqizojnë sindikalizmin. Kur fjala publike ndahet nga fakti dhe përgjegjësia, ajo vetëm e largon vëmendjen nga pyetja themelore se çfarë është bërë dhe çfarë duhet bërë çdo ditë që rreziku të parandalohet para se të shndërrohet në tragjedi?

Ekzistenca e disa organizimeve sindikale brenda KEK-ut dëshmon për një fragmentarizim që e dobëson fuqinë përfaqësuese të punëtorëve. Sindikalizmi fuqizohet duke bashkuar punëtorët rreth interesit të përbashkët, jo duke e shpenzuar energjinë në përplasje ndërmjet sindikatave. Pikërisht sindikata bazë, si organizimi më i afërt me punëtorin dhe vendin e tij të punës, duhet të veprojë pandërprerë për evidentimin e rreziqeve, përmirësimin e kushteve të punës, zbatimin e masave të sigurisë dhe parandalimin e aksidenteve. Përgjegjësia sindikale nuk fillon pasi të ketë ndodhur e pariparueshmja po ajo dëshmohet me punën e bërë që e pariparueshmja të mos ndodhë.

Për hir të së vërtetës, duhet sqaruar se organizimi sindikal nga i cili vijnë këto deklarata nuk është pjesë e BSPK-së prej më shumë se dy vjetësh. Pas përpjekjeve për ruajtjen e unitetit dhe funksionimit të rregullt sindikal, organet kompetente të BSPK-së kanë marrë vendimet përkatëse në përputhje me aktet e organizatës, ndër të tjera edhe për shkak të mosplotësimit të detyrimeve të anëtarësisë. Prandaj, përfaqësuesit e këtij organizimi nuk kanë mandat të flasin në emër të BSPK-së dhe, aq më pak, ta paraqesin vlerësimin e tyre si masë të legjitimitetit ose të veprimtarisë së saj.

Po aq i papranueshëm dhe faktikisht i pavërtetë është cilësimi i Kryetarit të BSPK-së si “i vetëquajtur”. Kryetari i BSPK-së është zgjedhur me besimin unanim të delegatëve të Kongresit IX të BSPK-së, organit më të lartë të saj. Legjitimiteti sindikal buron nga vota e delegatëve, Statuti dhe organet legjitime të organizatës e që ai as krijohet nga deklaratat publike dhe as zhbëhet prej tyre. Fjala e pamatur mund ta shtrembërojë faktin për një çast, por nuk mund ta ndryshojë atë.

BSPK-ja përfaqëson federatat anëtare dhe, përmes tyre, anëtarësinë e organizuar sindikalisht, pjesë e së cilës është edhe Sindikata e Pavarur e KEK-ut. BSPK-ja do të vazhdojë bashkërendimin e drejtpërdrejtë me Kryetarin e saj, z. Avni Grajqevci, si dhe dialogun me Bordin Drejtues dhe menaxhmentin e KEK-ut, duke kërkuar zgjidhjen e problemeve konkrete, duke kërkuar përmirësimin e vazhdueshëm të kushteve dhe sigurisë në punë dhe duke kërkuar realizimin e kërkesave legjitime të punëtorëve. BSPK-ja ka vepruar, vepron dhe do të vazhdojë të veprojë, sepse fuqia e organizimit sindikal nuk matet me praninë e përditshme para kamerave, por me përfaqësimin, vazhdimësinë e veprimit dhe rezultatet në mbrojtje të punëtorit.

Kryesia Ekzekutive e BSPK-së nuk do të hyjë në garën se kush flet më fort mbi dhimbjen e punëtorit. Jetët e humbura janë më të mëdha se çdo përplasje sindikale dhe më të rënda se çdo deklaratë për media. Fotografitë e punëtorëve të ndjerë duhen të jenë thirrje për përgjegjësi, për parandalim dhe për bashkëveprim, jo mjete për sulme personale, për interesa të ngushta ose për përçarje të reja sindikale.

Punëtori nuk mbrohet duke e luftuar sindikalisti sindikalistin. Punëtori mbrohet kur fuqia e organizuar sindikale drejtohet aty ku duhet, kur drejtohet kundër rrezikut, kundër padrejtësisë dhe kundër çdo kushti që ia cenon të drejtën për punë të sigurt, për dinjitet dhe për jetë. Kjo është përgjegjësia e sindikatës. Kjo është dhe do të mbetet përgjegjësia e BSPK-së.

Kryesia Ekzekutive
e Bashkimit të Sindikatave të Pavarura të Kosovës – BSPK

24/08/2026

Jeta e punëtorit nuk negociohet dhe vdekja në vendin e punës nuk guxon të politizohet

Komunikatë për medie e Bashkimit të Sindikatave të Pavarura të Kosovës
Prishtinë, 24 gusht 2026

Kryetari i Bashkimit të Sindikatave të Pavarura të Kosovës – BSPK, Prof. dr. Atdhe Hykolli, i shoqëruar nga Kryetari i Sindikatës së Pavarur të Energjetikës së Kosovës – SPEK, z. Avni Grajçevci, dhe bashkëpunëtorët e tyre, zhvilloi sot takim me drejtuesit e Korporatës Energjetike të Kosovës – KEK. Në takim morën pjesë Kryetari i Bordit të KEK-ut, z. Valdrin Krasniqi, së bashku me Bordin në përbërje të plotë, si dhe Kryeshefi Ekzekutiv, z. Gramos Hashani, me ekipin e tij. Ky nivel përfaqësimi institucional i dha takimit peshën e nevojshme për trajtimin e çështjeve që për BSPK-në qëndrojnë mbi çdo interes tjetër në marrëdhënien e punës e që janë jeta, shëndeti, siguria dhe dinjiteti i punëtorit.

Duke ngritur shqetësimin për rastet fatale në vendin e punës, Prof. dr. Atdhe Hykolli kërkoi që siguria të mos trajtohet vetëm pasi të ketë ndodhur aksidenti, por të ndërtohet si sistem i përhershëm parandalimi. Ai kërkoi forcimin e mbikëqyrjes profesionale, kontrolle të rregullta mjekësore, pajisje të mjaftueshme mbrojtëse, mirëmbajtje të vazhdueshme, trajnime profesionale dhe mekanizma të qartë përgjegjësie. Punëtori nuk duhet të shkojë në punë duke bartur mbi vete rrezikun që sistemi ka për detyrë ta parandalojë.

BSPK-ja dhe SPEK-u kërkuan ngritjen e një mekanizmi profesional për parandalimin e aksidenteve, fuqizimin e Qendrës së Trajnimeve të KEK-ut dhe përfshirjen sa më të gjerë të punëtorëve në trajnime të vazhdueshme për sigurinë dhe shëndetin në punë. U kërkua që edhe mekanizmat ligjorë e institucionalë të mbikëqyrjes të veprojnë para se rreziku të marrë jetë njerëzish. Kontrolli pas aksidentit mund ta përcaktojë shkakun; veprimi profesional para tij mund ta shpëtojë jetën.

Menaxhmenti i KEK-ut e njoftoi Kryetarin Hykolli se Korporata ka shtuar masat e sigurisë në punë, ka ngritur nivelin dhe shtrirjen e trajnimeve profesionale dhe po zbaton kontrolle të rregullta mjekësore për punëtorët. Po ashtu, u bë e ditur se, në rastet kur një punëtor humb jetën në vendin e punës, Korporata siguron përkujdesje të përhershme ekonomike për familjen e tij, në formën e pagesës mujore në vlerën e pagës që ka marrë punëtori. BSPK-ja e vlerëson këtë masë të mbrojtjes së familjes, duke theksuar njëkohësisht se përgjegjësia e parë dhe më e madhe mbetet parandalimi i humbjes së jetës, sepse asnjë përkujdesje ekonomike nuk mund ta zëvendësojë jetën e punëtorit dhe praninë e tij në familje.

Prof. dr. Hykolli theksoi prerazi se vdekja e punëtorit në vendin e punës nuk guxon të politizohet. Jeta e humbur nuk është argument për përplasje politike dhe as numër për statistika. Çdo rast fatal kërkon hetim profesional, përgjegjësi institucionale dhe masa konkrete parandaluese. Për BSPK-në, pyetja nuk është se kush do ta përdorë tragjedinë, por çfarë duhet bërë sot që ajo të mos përsëritet nesër.

Në takim u ngritën edhe çështjet e pajisjeve rezervë dhe mbrojtëse, shujtës së punëtorëve, mbrojtjes ekonomike të punëtorëve të lënduar, si dhe domosdoshmëria e rregullimit të marrëdhënieve të punës me kontratë kolektive, pas më shumë se tri vjetësh pa një marrëveshje të tillë. BSPK-ja vlerëson se siguria, paga, mbrojtja sociale dhe dinjiteti në punë janë pjesë të pandashme të së drejtës për punë të denjë dhe të sigurt.

Palët u pajtuan për vazhdimin e bashkëpunimit dhe trajtimin e çështjeve të ngritura. Për BSPK-në, dialogu social ka kuptim vetëm kur fjala shndërrohet në veprim, përgjegjësia në parandalim dhe marrëveshja në rezultat të prekshëm për punëtorin. Ky është edhe thelbi i veprimit sindikal: të jesh pranë punëtorit para se të ndodhë e keqja, ta mbrosh kur i cenohet e drejta dhe të kërkosh përgjegjësi kur sistemi nuk e kryen detyrën e vet.

Jeta e punëtorit nuk negociohet. Siguria e tij nuk shtyhet. Vdekja e tij nuk politizohet.

Zyra e Kryetarit të BSPK-së

Address

Pristina
10000

Opening Hours

Monday	09:00 - 17:00
Tuesday	08:00 - 17:00
Wednesday	09:00 - 17:00
Thursday	09:00 - 17:00
Friday	09:00 - 17:00

Telephone

+38338609859

Website

http://www.bspk.org/

Alerts

Be the first to know and let us send you an email when BSPK - Bashkimi i Sindikatave te Pavarura te Kosoves posts news and promotions. Your email address will not be used for any other purpose, and you can unsubscribe at any time.

Contact The Organization

Send a message to BSPK - Bashkimi i Sindikatave te Pavarura te Kosoves:

Want your organization to be the top-listed non profit organization in Pristina?