Instituti për Drejtësi Sociale dhe Dinjitet
Instituti për Drejtësi Sociale dhe Dinjitet është institucion jofitimprurës, i pavarur, i pa ndikuar politikisht nga parti politike apo grupe të ndryshme interesi, i themeluar konform legjislacionit që rregullon Lirinë e Asociimit në Organizatat Joqeveritare në Republikën e Kosovës. Instituti ka për qëllim hulumtimin e çështjeve që lidhen me drejtësinë
sociale në kuptim të shpërndarjes së të mirave publike në mënyrë të barabartë dhe meritore, konform legjislacionit në fuqi por edhe parimeve të përgjithshme të drejtësisë, duke përfshirë barazinë e shanseve, si dhe të drejtat e kategorive të veçanta sociale, të drejtat nga marrëdhënia e punës, siguria dhe shëndeti në punë si dhe shëndeti psiko-fizik i këtyre kategorive. Instituti do të fokusohet në gjendjen socio-ekonomike dhe të sigurisë dhe shëndetit në sektorin privat, ku edhe konsiderohet që drejtësia sociale por edhe zbatueshmëria e legjislacionit janë më të cënuara, por edhe në politikbërjen dhe implementimin nga ana e sektorit publik apo edhe publiko-privat. Gjithashtu, Instituti do të bëjë hulumtime dhe studime për shkaqet e padrejtësive sociale në Republikën e Kosovës, duke u bazuar edhe në hulumtime dhe literaturë përkatëse si dhe bazuar në studimet e studiuesëve më kredibil botëror. Në raport me të gjeturat nga hulumtimet tona, por edhe hulumtimet e institucioneve të tjera që kanë kredibilitet dhe kapacitete për hulumtime nga kjo fushë, do të rekomandohen dhe adresohen edhe rekomandimet përkatëse tek akterët kompetent.
