20/01/2026
Drejtoresha e OJQ "For New Life Kosovo", znj. Kumrie Karaqica, me ftesë të z. Bardhyl Mahmuti kryetar i Qendrës “Gjenocidi në Kosovë – Plagë e Hapur”, e cila vepron në Zvicër, mori pjesë në tubimin përkujtimor, i organizuar nga Qendra “Gjenocidi në Kosovë – Plagë e Hapur”, kushtuar viktimave të gjenocidit serb në Kosovë, ku morën pjesë numër të madh bashkatdhetarësh, përfaqësues institucionesh, shoqatash kulturore, organizatash humanitare dhe personalitete nga Kosova, Shqipëria, mërgata shqiptare në Evropë dhe komunitetet arbëreshe. Interesimi i jashtëzakonshëm i pjesëmarrësve bëri që salla të rezultonte e vogël për dhimbjen e madhe dhe për të gjithë ata që kishin ardhur për të nderuar viktimat e Gjenocidit serb të viteve 1998–1999 dhe për të dëshmuar se kujtesa historike shqiptare mbetet e gjallë dhe aktive.
Tubimi u hap me himnet kombëtare dhe një minutë heshtje në nderim të viktimave dhe të rënëve të luftës çlirimtare. U rikujtuan krimet e kryera gjatë viteve 1998–1999, përfshirë vrasjet masive, zhdukjet me forcë, dhunën seksuale, dëbimet dhe shkatërrimet e mëdha materiale, duke theksuar rëndësinë e dokumentimit, ruajtjes së kujtesës kolektive dhe kërkimit të drejtësisë.
Programi artistik, me interpretime muzikore dhe këngë kushtuar viktimave, përcolli mesazhe të forta dhimbjeje, shprese dhe qëndrese. Në kuadër të përkujtimit u ndanë edhe mirënjohje për kontributin në sensibilizimin e opinionit ndërkombëtar.
Tubimi u mbyll me një mesazh të fuqishëm për kujtesë, drejtësi dhe angazhim të vazhdueshëm, duke riafirmuar se viktimat e gjenocidit mbeten dritë e përhershme në ndërgjegjen kolektive shqiptare.
Qëllimi i organizatës sonë është që të vazhdojmë me aktivitete të tilla, me synimin për të sensibilizuar opinionin ndërkombëtar mbi çështjen e krimeve të luftës në Kosovë regjimi serb gjatë viteve 1998-99.
For New Life Kosovo shpreh falënderime të sinqerta për të gjithë bashkëpunëtorët që kontribuuan në realizimin e këtij projekti, siç janë z. Bardhyl Mahmuti dhe z. Adnan Asllani, dhe të gjitha ata që kontribuuan në realizimin e këtij aktiviteti.
bashku jemi më të fort.
