06/10/2026
PROF. DR. JUSTINA SHIROKA P**A, GRUAJA E PARË NË KRYE TË ASHAK-UT
Prof. Dr. Justina Shiroka P**a, e lindur në vitin 1953 në Prishtinë, është një ndër figurat e rëndësishme të arsimit të lartë dhe shkencës ekonomike në Kosovë.
Ajo diplomoi në Fakultetin Ekonomik të Universitetit të Prishtinës në vitin 1976. Studimet pasuniversitare në fushën e teorisë dhe politikës së zhvillimit ekonomik i përfundoi në Fakultetin e Shkencave Ekonomike të Universitetit të Zagrebit, në vitin 1984. Studimet e doktoratës i kreu në Universitetin e Prishtinës.
Karrierën profesionale e nisi në Bankën e Kosovës, ndërsa në fund të viteve ’70 filloi angazhimin akademik në Fakultetin Ekonomik të Universitetit të Prishtinës. Gjatë karrierës u avancua deri në titullin profesore ordinare.
Veprimtaria e saj shkencore lidhet veçanërisht me kërkimet operacionale, përdorimin e metodave matematikore dhe statistikore në planifikim, optimizimin e proceseve të biznesit, menaxhmentin dhe vendimmarrjen. Përmes mësimdhënies dhe udhëheqjes së studentëve në studimet bachelor, master dhe doktoratë, ajo ka kontribuar në zhvillimin e kësaj fushe në Kosovë.
Gjatë karrierës ka ushtruar edhe përgjegjësi të shumta institucionale, përfshirë drejtimin e Departamentit të Matematikës dhe Statistikës, angazhimin në Senatin dhe Bordin e Universitetit të Prishtinës, si dhe pjesëmarrjen në këshilla e komisione akademike dhe shkencore.
Përvojën profesionale e ka pasuruar përmes studimeve, trajnimeve dhe specializimeve në Austri, Shtetet e Bashkuara të Amerikës, Itali dhe Belgjikë. Ajo ka ligjëruar gjithashtu në Universitetin e Tetovës dhe në Universitetin e Evropës Juglindore.
Një pjesë e rëndësishme e veprimtarisë së saj lidhet me fuqizimin ekonomik të grave, barazinë gjinore dhe ndërmarrësinë. Prof. Dr. Shiroka P**a ka qenë e angazhuar në organizata dhe iniciativa vendore e ndërkombëtare në mbështetje të grave dhe zhvillimit ekonomik.
Në jetën institucionale dhe publike ajo ka shërbyer edhe si ministre e Energjisë dhe Minierave, nga viti 2008 deri më 2011, si dhe deputete e Kuvendit të Kosovës gjatë periudhës 2011–2014.
Anëtare e Akademisë së Shkencave dhe të Arteve të Kosovës që nga viti 2016, ajo ka shërbyer si sekretare e Seksionit të Shkencave Shoqërore dhe si nënkryetare e Akademisë. Në dhjetor të vitit 2025 u zgjodh kryetare e ASHAK-ut, duke u bërë gruaja e parë që drejton këtë institucion.
Prof. Dr. Justina Shiroka P**a mbetet një emër i rëndësishëm në historinë e arsimit të lartë, shkencës ekonomike dhe jetës institucionale në Kosovë.
