23/02/2026
23 SHKURTI, DITA KUR U THEMELUA ROTARY INTERNATIONAL
Sot Festojmë 121 Vjetorin nga takimi i parë Rotary në Chicago SHBA dhe 21 Vjetorin nga takimi i parë Rotary në Pejë, Kosovë.
Më 23 Shkurt 1905 në Chicago, Paul P. Harris, Gustavus Loehr, Silvester Schiele dhe Hiram E. Shorey u mblodhën në zyrën e Gustavus Loehr dhe ky njihet si takimi i parë i klubit Rotary në botë.
Dëshira e Paul Harris për të themeluar një shoqëri më të mirë me bashkëpunëtorët e tij çoi në themelimin e Rotary International. Rotary filloi me vizionin e një njeriu - Paul Harris, Avokatit nga Çikago i cili formoi Klubin Rotary të Çikagos, në mënyrë që liderët dhe profesionistët të mund të shkëmbenin ide dhe të krijonin miqësi kuptimplote dhe të përjetshme.
Ky përkushtim vazhdon edhe sot përmes 46.000 Klubeve Rotary dhe 1.400.000 anëtarëve në mbarë botën, duke kontribuar për të zgjidhur disa nga problemet më sfiduese të kohës sonë. Me çdo projekt dhe çdo aktivitet Rotary ne ndryshojmë botën për të mirë.
Derisa 100 vite më vonë, në Pejë, me 23 Shkurt 2005, ftesës së Dr. Neshad Asllanit për takimin e parë Rotary, i përgjigjen Avokatja Hamijeta Myftari, Prof. Dr. Edmond Beqiri dhe Vedat Belegu, Artist dhe pronar i Restorantit Art Design, ku edhe mbahet takimi i parë Rotary në Pejë.
Këtij grupi themelues do ti bashkohen edhe shumë anëtarë të tjerë, Neba Asllani, Petrit Bajraktari, Rexhep Baholli dhe Suzana Baholli, Shaqir Elezaj, Samir Berlajolli, Musa Rexhaj, Xhemajl Bajraktari, Nysret Taraku, Flamur Kelmendi dhe shumë liderë të tjerë nga Peja. Pastaj nga Prizreni Safet Dorambari, Armend Spahiu, Bujar Myftiu, Agron Shporta, nga Gjakova Mark dhe Maria Culaj, Prishtina Ardian Hoxha dhe Mazllum Belegu, Ferizaji Afrim Konjufca dhe Franc Kurti, Mitrovica Avni Kastrati dhe Bajram Rexhepi, Gjilani Naim Shaqiri dhe Muhamet Halili, nga Vitia Mentor Rexhepi dhe Izak Martini si dhe shumë liderë të tjerë nga mbarë Kosova. Pranimi i anëtarëve nga qytetet tjera mundësoi që Rotary Club Peja të shtrijë rrjetën Rotary në mbarë Kosovën, themeloi dhe sponzorizoj Klubet Rotary në Prizren, Mitrovicë, Ferizaj, Rotary Club Prishtina International, Rotary Club Garden Prishtina dhe bashkë sponzorizoj Klubet Rotary në Gjilan dhe Viti.
Rotary Club Peja me të drejtë quhet inkubator i zhvillimit Rotary në Kosovë. Derisa mbi 100 projekte të implementuara, simbolet dhe monumentet e shumëta Rotary kanë bërë që Peja të njihet edhe si Qyteti Rotary. Vlen t’i cekim disa nga ato:
- Parku Rotary, në 5 vjetorin e themelimit Rotary Club Peja ka rregulluar Parkun Rotary dhe ka vendosur gurin masiv në të cilin është ingranuar logoja Rotary.
- Service Above Self Monument, në 10 vjetorin e themelimit, Rotary Club Peja ka ngritur në qendër të qytetit, monumentin Rotary me moton Rotary “Service Above Self”.
- Memoriali “Kujtim dhe Miqesi”, në 15 vjetorin e themelimit, Rotary Club Peja ka inauguruar Memorialin e Paqes "Kujtim dhe Miqësi" në përkujtim të viktimave të 11 Shtatorit, 2001 në New York.
Rotary është organizatë e mrekullueshme, tani Kosova dhe Shqipëria janë bashkuar në Rotary duke themeluar Distriktin Rotary 2485, me 46 Klube Rotary dhe 1.100 anëtarë.
Në fund inkurajohen liderët në biznes dhe profesion të vizitojnë Klubin Rotary në qytetin e tyre në Shqipëri dhe Kosovë, për t’u informuar për projektet Rotary dhe mundësinë për t'u bashkuar me liderët Rotarian dhe krijuar miqësi të reja në mbarë botën.
