13/09/2026
TINGULLI I KËMBANËS ROTARY NË ORËN 14:46: PEJA KUJTON 11 SHTATORIN
Nën moton “Të Kujtojmë – Kurrë Mos të Harrojmë”, Rotary Club Peja iu bashkua përkujtimit të 25-vjetorit të sulmeve terroriste të 11 Shtatorit 2001, duke nderuar viktimat dhe duke shprehur solidaritetin e popullit të Kosovës me popullin amerikan.
Për Rotary Club Peja, ky përkujtim ka një domethënie të veçantë. Klubi ka dhënë një kontribut të rëndësishëm në ndërtimin e Memorialit të 11 Shtatorit në Pejë, në zemër të të cilit ruhet një pjesë origjinale metalike nga Kullat Binjake.
Një pjesë e historisë së dhimbshme të Nju-Jorkut qëndron sot në Pejë si dëshmi e kujtesës, mirënjohjes dhe miqësisë së përhershme ndërmjet Kosovës dhe Shteteve të Bashkuara të Amerikës. Ky është i vetmi memorial i këtij lloji në Evropën Juglindore.
Takimi Përkujtimor u organizua në bashkëpunim me Peja Peace Forum, Komunën e Pejës dhe Universitetin “Haxhi Zeka”. Pjesëmarrësit ndanë kujtime dhe reflektime për ditën që tronditi botën, për jetët e humbura dhe për guximin e jashtëzakonshëm të atyre që, përballë tragjedisë, treguan humanizëm dhe solidaritet.
Në vazhdim u mbajt Tryeza e Rrumbullakët me temën: “Rruga përpara: A na bën Inteligjenca Artificiale më produktivë sot, por më pak të aftë nesër?”
Lidhja ndërmjet përkujtimit të 11 Shtatorit dhe diskutimit për inteligjencën artificiale qëndron te përgjegjësia jonë për të ardhmen. Tragjedia na kujton se dija, teknologjia dhe fuqia njerëzore duhet të udhëhiqen gjithmonë nga etika, respekti për jetën dhe përkushtimi ndaj paqes. Përfaqësues institucionalë, akademikë dhe profesionistë diskutuan se si inteligjenca artificiale mund t’i shërbejë njerëzimit, pa zëvendësuar mendimin kritik, gjykimin, përgjegjësinë dhe ndjeshmërinë njerëzore.
Pas Tryezës së Rrumbullakët, partnerët dhe pjesëmarrësit ecën së bashku drejt Memorialit të 11 Shtatorit. Në fjalimin e tij, Kryetari i Rotary Club Peja, Z. Ilir N. Albani, përkujtoi viktimat dhe shprehu nderim të thellë për reaguesit e parë dhe shpëtimtarët që vrapuan drejt rrezikut për të shpëtuar jetë.
Rotary Club Peja mirëpriti znj. Brooke Young, përfaqësuese e Ambasadës së Shteteve të Bashkuara të Amerikës në Kosovë, duke shprehur mirënjohjen për praninë dhe solidaritetin e saj në këtë ditë përkujtimi.
Pikërisht në orën 14:46, që përkon me orën 08:46 në Nju-Jork, çastin kur u godit Kulla Veriore dhe filloi sulmi ndaj Kullave Binjake, Kryetari i Klubit goditi me çekan këmbanën Rotary dhe i ftoi të pranishmit në një minutë heshtjeje dhe reflektimi. Tingulli solemn i këmbanës mbuloi memorialin, fjalët u ndalën dhe të pranishmit ulën kokat në nderim të viktimave.
Ceremonia vazhdoi me vendosjen e kurorave me lule, si shenjë respekti, kujtese dhe solidariteti me popullin amerikan. Ngjarja u bë edhe më prekëse me intonimin e Himnit Kombëtar të Shteteve të Bashkuara të Amerikës dhe interpretimin e "Amazing Grace" nga studentë të Universitetit “Haxhi Zeka”.
Rotary Club Peja kontribuoi në ndërtimin e këtij memoriali dhe vazhdon të kujdeset që mesazhi i tij të jetojë: kujtesa duhet të na bashkojë, mirënjohja duhet ta ruajë miqësinë dhe përgjegjësia jonë duhet të jetë ndërtimi i paqes.
