23/06/2026
Rotary Club Peja ka kënaqësinë të prezantojë Ilir Albanin, President të Klubit për vitin Rotary 2026–2027.
Iliri është rritur në frymën e shërbimit, miqësisë dhe vlerave Rotary. Ai vjen nga një familje me traditë të gjatë shërbimi në Rotary, pasi prindërit e tij, Neshadi dhe Neba, janë ndër Rotarianët e parë në Kosovë dhe themelues të Rotary Club Peja, klubit të parë të zyrtarizuar në vendin tonë. I frymëzuar nga kjo trashëgimi, Iliri synon të vazhdojë traditën e Rotary Club Peja në promovimin e kulturës së dhënies, dialogut, lidershipit dhe shërbimit në komunitet.
Iliri ka përfunduar studimet në Shkencat Kompjuterike në UBT, ku u dallua si student shembullor dhe përfitues i bursës prestigjioze Erasmus+ të Bashkimit Evropian, duke vazhduar semestrin e fundit të studimeve në Universitetin Linnaeus në Suedi.
Me profesion është Senior Software Engineer në Celonis, një kompani gjermane lidere me prezencë globale në fushën e optimizimit dhe inteligjencës së proceseve (PI) dhe transformimit digjital.
Iliri është bashkëthemelues i Klinikës Digjitale, e cila në vitin 2022 u shpall Klinika më Inovative në Evropë nga European Patient Digital Health Awards (PDHA).
Ai është gjithashtu fitues i shumë çmimeve profesionale dhe garave ndërkombëtare, ndër to vlen të veçohet Çmimi “Rising Star” për projektin inovativ e-Health Clinic, të ndarë nga Regional Cooperation Council të Bashkimit Evropian, në Balkathon.
Por sipas Ilirit, një ndër projektet më të rëndësishme është kontributi i tij në zhvillimin e Digital Clinic for Ukraine, angazhimi i 40 mjekëve Ukrainas dhe ofrimi i shërbimeve falas në gjuhën Ukrainase për refugjatët Ukrainas kudo në botë.
I lindur dhe i formuar në një familje thellësisht të përkushtuar ndaj Rotary-t, Iliri ka qenë i përfshirë që në moshë të re në projektet humanitare dhe zhvillimore të Rotary Club Peja. Së bashku me bashkëmoshatarët e tij, ai luajti rol aktiv në promovimin e idealit të shërbimit të Rotaract Club Peja, organizatës Rotary për të rinjtë. Përgjatë viteve, ai ka shërbyer me përkushtim në Rotaract Club Peja, fillimisht si Sekretar e më pas si President. Në vlerësim të kontributit të tij të vazhdueshëm në Rotary, ai është nderuar me çmimin prestigjioz Paul Harris Fellow.
Formimi i tij rotarian është ndërtuar përmes pjesëmarrjes aktive në trajnime, seminare dhe konferenca Rotary në Kosovë, Shqipëri, Maqedoninë e Veriut, Greqi dhe vende të tjera. Ai ka marrë pjesë në programe RYLA (Rotary Youth Leadership Awards), Konferenca Distrikti, PETS, trajnime për Fondacionin Rotary, zhvillimin e anëtarësisë dhe lidershipin Rotary.
Iliri ka luajtur rol të rëndësishëm në implementimin dhe menaxhimin e Grantit Global Rotary për projektin e bursave për vajza “Gender Equality and Girls Education in Peja, Kosovo”, një iniciativë që ka kontribuar në fuqizimin e vajzave dhe promovimin e barazisë gjinore përmes edukimit.
Gjatë vitit Rotary 2026–2027, Rotary Club Peja do të vazhdojë traditën e tij të projekteve me ndikim në komunitet, duke vënë theks të veçantë në edukimin për paqe, të drejtat e njeriut, zhvillimin e rinisë dhe bashkëpunimin ndërkombëtar.
Rotary Club Peja aktualisht është përfitues i Grantit Global GG2577770, në partneritet me Rotary Club of Innsbrook (Virginia), Rotary Club of Johnston (Iowa), pesë Distrikte Rotary nga Shtetet e Bashkuara të Amerikës dhe organizatën Hardwired.
Në kuadër të këtij granti po realizohet projekti “Edukimi për Paqe dhe të Drejtat e Njeriut për Mësues dhe Nxënës”, përmes implementimit të projektit Fruitopia. Ky projekt është një nga projektet më të rëndësishme Rotary në Kosovë në fushën e edukimit për paqe dhe të drejtat e njeriut dhe po implementohet në pesë shkolla fillore në Komunën e Pejës.
Rotarianë të dashur, në fillim të çdo viti Rotary, Presidenti i Rotary International shpall temën që udhëheq veprimtarinë dhe shërbimin e Rotarianëve në mbarë botën. Për vitin Rotary 2026–2027, Presidenti i Rotary International, Olayinka H. Babalola, ka shpallur temën Rotary “Krijo një Ndikim të Qëndrueshëm”. “Rotary na ka ndryshuar, na ka formësuar dhe na ka bërë njerëz më të mirë”, thekson Presidenti Olayinka H. Babalola.
Frymëzuar nga kjo temë, Rotarianët Pejanë do të vazhdojnë me projekte që krijojnë vlerë afatgjatë për komunitetin, duke investuar në edukim, paqe, zhvillimin e rinisë dhe fuqizimin e qytetarëve. Ne besojmë se ndikimi më i madh nuk matet vetëm nga ajo që bëjmë sot, por nga ndryshimi pozitiv që lëmë për brezat që do të vijnë.
“Nëpërmjet Rotary-t kemi mundësinë të shërbejmë, të ndërtojmë miqësi të qëndrueshme dhe të krijojmë ndikim pozitiv në komunitetet tona. Ftoj liderët e biznesit, profesionistët dhe qytetarët që ndajnë këto vlera t’i bashkohen Rotary Club Peja dhe të kontribuojnë në zhvillimin e qytetit dhe vendit tonë të dashur”, porositë Iliri.
Për informata shtesë ose për anëtarësim në Rotary Club Peja, na kontaktoni në: [email protected]
