09/10/2026
Qëndrim publik i Korit “Siparantum” mbi mbështetjen financiare të Komunës së Pejës për vitin 2026
Kori “Siparantum” e ka ndërtuar emrin e tij përmes punës së pandalshme, disiplinës artistike dhe sukseseve që sot i japin nder Pejës dhe Republikës së Kosovës në skenën ndërkombëtare. Çdo çmim i fituar, çdo bashkëpunim dhe çdo skenë ku kemi ngritur zërin tonë mbart përkushtimin e artistëve që besojnë në fuqinë e kulturës për ta përfaqësuar vendin me dinjitet.
Nga kjo pozitë e arritjeve dhe e përgjegjësisë ndaj së ardhmes, Kori “Siparantum” bën publik qëndrimin e tij lidhur me mbështetjen financiare të Komunës së Pejës për vitin 2026.
Gjatë viteve 2023, 2024 dhe 2025, Komuna e Pejës e ka mbështetur korin me nga 10,000 euro në vit. E vlerësojmë këtë kontribut si pjesë të një partneriteti që ka ndihmuar zhvillimin artistik dhe përfaqësimin e qytetit tonë.
Për vitin 2026, mbështetja e përcaktuar nga Komuna e Pejës është vetëm 2,000 €, që përbën një reduktim prej 80%. Një reduktim kaq drastik e konsiderojmë të pamjaftueshëm dhe joreal ndaj punës, rezultateve dhe kontributit të Korit “Siparantum” në jetën kulturore,
veçanërisht në një vit të karakterizuar nga aktivitet i shtuar artistik, bashkëpunime ndërkombëtare dhe përfaqësim i Republikës së Kosovës në skenën ndërkombëtare.
Vetëm gjatë vitit 2026, “Siparantum” ka sjellë në Pejë artistë dhe ansamble që e kanë kthyer qytetin në një hapësirë takimi, mësimi dhe shkëmbimi kulturor ndërkombëtar:
• Më 2 maj, koncerti i përbashkët me ARTyn Choir nga Lituania, nën drejtimin e Iveta Valickienė, në Kishën Katolike “Shën Katarina”.
• Më 30 korrik, “Northern Echoes”, koncerti i përbashkët me Defrost Youth Choir nga Norvegjia, nën drejtimin e Thomas Caplin, si dhe një punëtori falas e muzikës korale, me ftesë të hapur për koristë nga e gjithë Kosova.
• Më 12 shtator, koncerti i përbashkët me Charité Chor Berlin nga Gjermania, nën drejtimin e Adrian Emans, i shoqëruar me një punëtori falas për t’u ofruar të rinjve përvojë dhe mundësi zhvillimi artistik.
• Në gusht, në Malaysian International Choral Festival 2026 në Kuala Lumpur, “Siparantum” përfaqësoi Kosovën dhe u kthye me tri çmime: Gold në kategorinë Vocal Ensemble, Gold në kategorinë Mixed Choir dhe Çmimin special “Creative Staging”.
Vetëm pak ditë më parë, në International Choir Festival Herceg Novi 2026, kori fitoi vendin e parë në kategorinë Mixed Choir me 97 pikë, çmimin Outstanding Performance of Contemporary Composition, ndërsa dirigjenti ynë Memli Kelmendi u vlerësua me çmimin Award for the Most Promising Conductor.
Më 30 shtator 2026 kemi kërkuar zyrtarisht rishqyrtimin e kësaj shume, ndërsa dje, më 8 tetor 2026, në mungesë të një përgjigjeje, kemi njoftuar Komunën për refuzimin e mbështetjes prej 2,000 €.
Kjo shumë është e pamjaftueshme për 48 antarët e Korit Siparantum, jo vetëm për shkak të vlerës së saj të ulët, por edhe për faktin se paraqet shumën më të vogël të mbështetjes financiare që Kori “Siparantum” ka marrë nga Komuna e Pejës që nga themelimi i korit (2017).
Duke u bazuar në rritjen e aktivitetit artistik, bashkëpunimeve ndërkombëtare dhe rezultateve të arritura ndër vite, kemi pritur që mbështetja për Korin Siparantum të rritej, e jo të pësonte një reduktim kaq drastik.
Pavarësisht kësaj situate, “Siparantum” do të vazhdojë të krijojë, të bashkojë njerëz dhe ta përfaqësojë Kosovën me dinjitet. Sukseset tona janë një ftesë që institucionet të ecin me ne, me besim dhe përgjegjësi ndaj kulturës që na përfaqëson të gjithëve.
Kori “Siparantum”�
Pejë me 9 tetor 2026
