21/08/2026
Komuna e Gjakovës, përkatësisht drejtoria për Buxhet dhe Financa ka përmbyllur sot ciklin e takimeve për Dëgjimet Buxhetore për buxhetin komunal 2027 - 2029.
Gjatë tërë javës janë mbajtur takime në 8 lokacione të ndryshme në të katër regjionet e komunës së Gjakovës, për tu përmbyllur sot me takimin final në Gjakovë.
Në të gjitha takimet e mbajtura, drejtori i DBF-së Durim Halilaj i shoqëruar edhe nga disa prej drejtorëve tjerë komunal kanë bashkëbiseduar me qytetarët dhe krahas spjegimeve të përgjithshme rreth buxhetit kanë dëgjuar dhe kanë evidentuar edhe kërkesat konkrete të qytetarëve për nevoja dhe investime konkrete në lokacionet dhe vendbanimet e tyre. Të gjitha këto kërkesa do të shqyrtohen një nga një dhe sipas mundësive ligjore e buxhetore edhe do të trajtohen gjatë vitit të ardhshëm dhe dy viteve tjera pasuese.
Ndryshe, buxheti i tërësishëm komunal për vitin 2027 është rreth 43 milion e 700 mijë Euro, ndërsa rëndësi e veçantë i është kushtuar Investimeve Kapitale, të cilat përfshijnë 30 % të buxhetit të përgjithshëm apo rreth 13 milion e 200 mijë Euro. 23 milion Euro janë të përcaktuara për paga dhe meditje, 5 milion Mallra dhe Shërbime, 1.6 milion Subvencione dhe 1.1 milion pagesa për komunali.
