29/07/2026
Kërkesat prioritare të banorëve të fshatit Plemetin
Të hartuara nga asambleistja Mervete Shala pas konsultimeve me banorët e fshatit Plemetin
Pas takimeve dhe konsultimeve të zhvilluara me banorët e fshatit Plemetin, janë identifikuar këto kërkesa prioritare, të cilat kërkojnë trajtim nga kryetari Halil Thaçi, Komuna e Obiliqit dhe institucionet përgjegjëse:
1. Menaxhimi i mbeturinave – prioriteti kryesor
Shqetësimi më i madh i banorëve është menaxhimi i mbeturinave. Duke pasur parasysh se në Plemetin jetojnë komunitete të ndryshme, përfshirë komunitetin ashkali, rom dhe egjiptian, kërkohet një qasje më e organizuar dhe më efektive për menaxhimin e mbeturinave.
Kërkohet:
• Pastrim i përgjithshëm i të gjitha lagjeve të fshatit.
• Rritja e kontrollit nga institucionet përgjegjëse për hedhjen e mbeturinave.
• Vendosja e masave parandaluese dhe ndëshkuese ndaj atyre që hedhin mbeturina jashtë vendeve të përcaktuara.
• Vendosja e kontejnerëve shtesë dhe monitorimi i rregullt i pikave problematike.
• Fushata vetëdijesuese për ruajtjen e pastërtisë së ambientit.
2. Rregullimi i Shkollës Fillore në Plemetin
Kërkohet përmirësimi i kushteve në shkollë përmes:
• Pastrimit të mykut nga objekti.
• Lyerjes së shkollës.
• Renovimit dhe funksionalizimit të banjove.
• Furnizimit me inventarin e nevojshëm shkollor.
3. Asfaltimi i rrugëve
Kërkohet asfaltimi i të gjitha rrugëve që ende nuk janë asfaltuar, në mënyrë që çdo familje të ketë qasje të rregullt.
Prioritet kanë:
• Rruga deri te familjet Fatlum dhe Fatbardh Rrahmani.
• Rruga deri te familjet Gani dhe Jeton Mehmeti.
• Rruga deri te familjet Musli dhe Ylli Shala.
4. Rregullimi i rrugës alternative në Lagjen Ibrahimi
Gjatë sezonit të vjeshtës dhe dimrit, për shkak të vërshimeve, bllokohet rruga kryesore dhe lagjja mbetet e izoluar kjo ndodh shumë herë gjatë se zonës vjeshtë dimër .
Kërkohet:
• Rregullimi ose shtrimi me së paku me zhavorr i rrugës alternative "Jusuf Pllana", e cila do të mundësonte qarkullimin gjatë vërshimeve.
5. Ndërtimi i trotuarit në rrugën e Bregajve
Në rrugën që lidh lagjen më të madhe shqiptare të fshatit (Lagjja e Bregajve), kërkohet ndërtimi i trotuarit për të garantuar sigurinë e këmbësorëve, veçanërisht të nxënësve dhe të moshuarve.
6. Përmirësimi i ndriçimit publik
Kërkohet:
• Riparimi dhe funksionalizimi i plotë i ndriçimit publik në të gjitha lagjet e fshatit.
• Vendosja e ndriçimit në zonat ku ai mungon.
7. Rregullimi i kanalizimit pranë xhamisë
Kanalizimi pranë xhamisë së fshatit dhe banesave të komunitetit ashkali dhe rom shpesh bllokohet, duke shkaktuar erë të rëndë dhe duke krijuar shqetësime për besimtarët dhe banorët.
Kërkohet:
• Sanimi i plotë i kanalizimit.
• Eliminimi i problemit të ujërave të zeza dhe erërave të pakëndshme.
8. Pastrimi dhe mbrojtja e lumit Sitnica
Kërkohet:
• Pastrimi i lumit Sitnica në territorin e fshatit Plemetin.
• Monitorim i vazhdueshëm i lumit.
• Masa të rrepta për ndalimin e hedhjes së mbeturinave në lumë dhe ndëshkimin e ndotësve.
9. Zgjatja e relacioneve të autobusëve
• Banorët e fshatit Plemetin kërkojnë zgjerimin e linjave të transportit publik, me qëllim të përmirësimit të qasjes në transport për të gjithë banorët.
• Kërkohet që autobusët, të përfundojnë qarkullimin në Lagjen Bregaj, të vazhdojnë itinerarin deri në Lagjen Haliti dhe më pas të vazhdojnë drejt Obiliqit. Kjo zgjatje e relacioneve do të lehtësonte lëvizjen e banorëve, veçanërisht të nxënësve, studentëve, të moshuarve dhe punëtorëve që udhëtojnë çdo ditë drejt Obiliqit.
10. Përmirësimi i furnizimit me ujë të pijshëm
Banorët e fshatit Plemetin kërkojnë përmirësimin e sistemit të ujësjellësit, pasi në shumë lagje furnizimi me ujë është i pamjaftueshëm për shkak të shtypjes së ulët në rrjet.
Kërkohet:
• Identifikimi dhe eliminimi i problemeve në rrjetin e ujësjellësit.
• Rritja e shtypjes së ujit në të gjitha lagjet e fshatit.
• Ndërmarrja e investimeve të nevojshme për të siguruar furnizim të rregullt dhe cilësor me ujë të pijshëm për çdo familje.
11. Përmirësimi i infrastrukturës në lagjet e komunitetit ashkali dhe rom
Banorët kërkojnë ndërhyrje urgjente për përmirësimin e infrastrukturës në lagjet ku jetojnë komunitetet ashkali dhe rom, për shkak të problemeve të vazhdueshme me kanalizimin dhe mungesës së rrugëve të asfaltuara.
Kërkohet:
• Lagjja përballë Shkollës Fillore në Plemetin, ku jetojnë mbi 20 familje të komunitetit ashkali dhe rom:
• Rregullimi urgjent i rrjetit të kanalizimit, pasi familjet përballen vazhdimisht me probleme në funksionimin e tij.
• Asfaltimi i rrugicës që shfrytëzohet nga këto familje, për të siguruar qarkullim normal dhe kushte më të mira të jetesës.
• Lagjja e familjes Mustafa, ku jetojnë 11 familje të komunitetit ashkali dhe rom:
• Rregullimi urgjent i kanalizimit për eliminimin e problemeve ekzistuese.
• Asfaltimi i rrugicës që lidh këto familje me rrugën kryesore.
12. Ndërtimi i parkut dhe terreneve sportive në Lagjen Bregaj
Banorët e fshatit Plemetin kërkojnë nga Komuna e Obiliqit që të sigurojë një parcelë të përshtatshme në Lagjen Bregaj, lagjja më e madhe shqiptare e fshatit, për realizimin e një hapësire rekreative dhe sportive.
Kërkohet:
• Sigurimi i tokës nga Komuna e Obiliqit për këtë projekt.
• Ndërtimi i një parku të vogël me kënd lojërash për fëmijë.
• Ndërtimi i një fushe sportive multifunksionale për futboll dhe basketboll.
• Rregullimi i hapësirës me ndriçim publik, ulëse, gjelbërim dhe pajisje të tjera urbane.
Ky projekt do të krijojë një hapësirë të sigurt për rekreacion, sport dhe socializim të fëmijëve, të rinjve dhe banorëve të Lagjes Bregaj, duke kontribuar në përmirësimin e cilësisë së jetës dhe zhvillimin e komunitetit.
Përfundim
Banorët e fshatit Plemetin kërkojnë që këto projekte dhe investime të kryhen në buxhetin komunal të aprovuar për vitin 2026 , pasi ato ndikojnë drejtpërdrejt në përmirësimin e cilësisë së jetës, sigurisë, higjienës publike dhe zhvillimit të fshatit.
Me respekt,
Mervete Shala
Asambleiste në Kuvendin Komunal të Obiliqit
