26/09/2026
Sot u mbajt takimi i organizuar nga drejtori Bekim Ferati, së bashku me anëtarët e Shoqatës së të Verbërve Ndërkomunale të Mitrovicës, me qëllim të zhvillimit të një takimi me trajneren Shasmie Xhaferi, për mbështetjen në mësimin e mbajtjes dhe ecjes me shkop, orientimin dhe lëvizjen në kohë dhe hapësirë për personat e verbër.
Ky takim synoi të kontribuojë në krijimin e mundësive për një jetë më të lehtë, më fleksibile, me më shumë pavarësi dhe autonomi, si dhe në promovimin e një qasjeje gjithëpërfshirëse dhe mbështetëse.
Në takim nuk mungoi as psikologu klinik, Bedri Mehmeti, i cili dha këshilla psikosociale dhe organizative lidhur me gjithëpërfshirjen, mbështetjen dhe fuqizimin e personave me dëmtim të shikimit dhe të verbërve.
Mbi të gjitha, rëndësi e veçantë iu kushtua dëgjimit të zërit të tyre, brengave, nevojave dhe çështjeve me të cilat përballen, me synim që këto nevoja të adresohen në mënyrë sa më konkrete, të shpejtë dhe gjithëpërfshirëse.
