09/01/2026
REAGIM ZYRTAR – HNK
Organizata HNK shpreh solidaritetin e saj të plotë me qytetarët e Republikës së Kosovës, veçanërisht me familjet e prekura në komunat Malishevë, Drenas, Gjakovë, Mitrovicë dhe Skenderaj. Në këto momente të vështira, është obligim institucional dhe shoqëror të ofrohet ndihmë e menjëhershme dhe të sigurohet stabilizimi i gjendjes për qytetarët e prekur.
Megjithatë, HNK thekson se përsëritja e këtyre situatave nuk është rastësi dhe as pasojë e thjeshtë e kushteve natyrore. Dëmet e shkaktuara janë rezultat i drejtpërdrejtë i dështimit institucional në menaxhimin e mjedisit. Devijimi i shtretërve të lumenjve, lejimi i ndërtimeve dhe ndërhyrjeve pa kritere mjedisore, si dhe mungesa e mbikëqyrjes dhe zbatimit të ligjit, kanë krijuar kushte të rrezikshme për qytetarët.
Institucionet përgjegjëse, si në nivel qendror ashtu edhe lokal, kanë neglizhuar obligimet e tyre ligjore për mbrojtjen e mjedisit dhe parandalimin e fatkeqësive. Mungesa e planifikimit hapësinor, tolerimi i shkatërrimit të ekosistemeve dhe mosndëshkimi i shkelësve kanë kontribuar drejtpërdrejt në përkeqësimin e situatës.
HNK kërkon llogaridhënie të menjëhershme institucionale, hetim të plotë për të gjitha ndërhyrjet e paligjshme në lumenj dhe hapësira natyrore, si dhe ndërmarrjen e masave urgjente për ndalimin e praktikave të dëmshme. Po ashtu, kërkojmë që politikat mjedisore të mos mbeten vetëm në letër, por të zbatohen në mënyrë rigoroze.
Mbrojtja e mjedisit nuk është zgjedhje, por detyrim ligjor dhe moral. Çdo vonesë apo neglizhencë institucionale rrezikon drejtpërdrejt jetën e qytetarëve dhe të ardhmen e vendit.
