28/07/2026
CAMPING FEST – EDICIONI VIII
23–26 KORRIK 2026
Katër ditë të mbushura me art, kulturë, trashëgimi dhe emocione shënuan me sukses edicionin e tetë të festivalit kulturor “Camping Fest”, organizuar nga OJQ “ArtEko”, me mbështetjen e Komunës së Klinës – Drejtoria për Kulturë, Rini dhe Sport.
Dita e parë dhe e dytë u karakterizuan nga vizita kulturore në disa prej pikave më të rëndësishme të trashëgimisë së komunës sonë, ndër to Kulla e Mujë Krasniqit, Lapidari i Dëshmorëve në Ujmirë, Art Gallery e piktorit Idriz Berisha, si dhe lokacione të tjera me vlera historike e artistike.
Një falënderim i veçantë shkon për Prof. Dr. Shkëlqim Millakun për bashkëpunimin dhe kontributin e tij në aktivitetet e festivalit.
Dita e tretë solli para publikut shfaqjen teatrale “Koprraci”, interpretuar nga studentët e Fakultetit të Arteve të Universitetit të Prishtinës, e cila u mirëprit nga artdashësit.
Dita e katërt, nata përmbyllëse e festivalit, u zhvillua në Kullën e Bekë Sylë Millakut në fshatin Ujmirë. Mbrëmja nisi me hapjen e ekspozitës së Kolonisë së Artistëve Figurativë, me kurator Prof. Xhevdet Pantinën, të cilin e falënderojmë për përkushtimin, profesionalizmin dhe kontributin e çmuar në realizimin e kësaj ekspozite, e cila i dha një vlerë të veçantë natës përmbyllëse të festivalit.
Një mirënjohje e veçantë i takon familjes Millaku, për mikpritjen dhe mbështetjen e vazhdueshme gjatë gjithë festivalit, duke na mundësuar zhvillimin e aktiviteteve në Kullën e Bekë Sylë Millakut, një monument me vlera të veçanta historike e kulturore.
Programi vazhdoi me interpretime poetike nga autorë të ndryshëm. Paraqitja e Plakut Tradicional nga aktori i mirënjohur Ismet Krasniqi, me interpretimin e tij autentik dhe mjeshtëror, solli emocion, humor dhe frymën e traditës sonë popullore. Mbrëmja vijoi me një program muzikor nga rapsodët Nazmi Hajdari, Rilind Krasniqi dhe Erjad Karpuzi.
Edicioni VIII i Camping Fest u përmbyll me promovimin e gastronomisë tradicionale, muzikë dhe një atmosferë festive, duke dëshmuar edhe një herë rëndësinë e ruajtjes dhe promovimit të kulturës, artit dhe trashëgimisë sonë.
Faleminderit të gjithë artistëve, bashkëpunëtorëve, vullnetarëve, institucioneve mbështetëse dhe publikut që ishin pjesë e këtij rrugëtimi kulturor.
Mirupafshim në edicionin e radhës! ❤️
