27/04/2026
Shishet plastike janë ndër materialet ma të përhapuna në përditshmërinë tonë. Përdoren për pak minuta, por mbesin për vite të tana. Në vend që me i pa veç si mbetje, ky projekt nis prej një pyetjeje të thjeshtë: çka ndodh nëse i trajtojmë si material ndërtimor?
Gjatë procesit në DYVOLAB kemi zhvillu një sistem lidhjeje përmes 3D printimit, që mundëson bashkimin e shisheve plastike pa i dëmtu ato. Këto lidhëza krijojnë module të vogla, të cilat mund të kombinohen e me u rrit në struktura ma të mëdha, si një hap i parë drejt krijimit të instalacioneve artistike prej materialeve të ricikluara.
Ky nuk është ende instalacioni, por prototipi i tij, një fazë ku ideja merr formë dhe fillon me u testu në praktikë.
Asht një provë se si një mendim kalon prej skicës në strukturë, prej konceptit në sistem. Një kërkim mbi mënyrën se si mbetjet mund të organizohen dhe të lidhen mes vete, duke marrë kështu një formë dhe funksion të ri.
Projekti synon me vazhdu përtej kësaj faze, drejt realizimit të një instalacioni në hapësira publike të qyteteve të ndryshme, me e afru këtë ide sa ma shumë me njerëzit dhe me nxitë një mënyrë tjetër të të menduemit rreth materialeve që na rrethojnë.
