06/07/2026
"Kamping për Krejt – Kur natyra na bashkon pa dallime"
Ka ditë që nuk maten me orë, por me buzëqeshje. Ka momente që nuk mbahen mend vetëm për aktivitetin, por për ndjenjën që lënë pas. Pikërisht një ditë e tillë ishte "Kamping për Krejt – Ku natyra na bashkon të gjithë", aktiviteti gjithëpërfshirës i organizuar nga Hiking Adventure Club Angros, në bashkëpunim me You Can Do dhe HANDIKOS – Dega në Viti si dhe pjesëmarrjen e nje grup të ftuar nga Gjilani "Ergoterapia"
Përgatitjet nisën që të shtunën në mbrëmje, kur vullnetarët e Angros-it punuan me përkushtim për ngritjen e tendave dhe përgatitjen e hapësirës, duke krijuar një ambient mikpritës ku secili do të ndihej i mirëpritur dhe i barabartë.
Të dielën, më 5 korrik, pjesëmarrësit u mblodhën në vendin e kampingut, ku u mirëpritën nga Hiking Adventure Club “Angros”, Udheheqesi i Klubit, Behar Mehmeti prezantoi programin e ditës dhe theksoi rëndësinë e organizimit të aktiviteteve që promovojnë përfshirjen sociale, solidaritetin dhe mundësitë e barabarta për të gjithë. Ai vlerësoi angazhimin e vullnetarëve të klubit, duke nënvizuar se kjo nuk ishte vetëm një ditë rekreative, por edhe një mesazh i qartë se një shoqëri më gjithëpërfshirëse ndërtohet përmes veprave konkrete.
Me fjalë përshëndetëse u drejtuan edhe përfaqësueset e organizatave partnere, Emine Drainca dhe Mimoza Zejnullahu, të cilat shprehën mirënjohjen për këtë organizim dhe theksuan se iniciativa të tilla janë të domosdoshme për ndërtimin e një komuniteti ku secili ndihet i vlerësuar. Ato vlerësuan gjithashtu bashkëpunimin e vazhdueshëm me Angros-at, duke e cilësuar atë si një partneritet që po forcohet çdo ditë përmes aktiviteteve me ndikim pozitiv në komunitet.
Pas pjesës zyrtare, dita vazhdoi me një ecje të lehtë në natyrë, lojëra argëtuese, muzikë, valle dhe momente të shumta shoqërimi. Ushqimi, pijet dhe atmosfera e ngrohtë krijuan një ambient ku dallimet humbën kuptimin dhe vendin e tyre e zunë respekti, miqësia dhe gëzimi i përbashkët.
Ky aktivitet dëshmoi edhe një herë se natyra nuk njeh barriera. Ajo i mirëpret të gjithë njësoj dhe na kujton se vlerat më të mëdha ndërtohen kur ecim së bashku, mbështesim njëri-tjetrin dhe krijojmë hapësira ku secili ndihet pjesë e së njëjtës familje.
Në fund, shprehim mirënjohjen tonë të thellë për të gjithë ata që kontribuan në organizimin dhe realizimin e këtij aktiviteti. Falë përkushtimit, mbështetjes dhe punës së tyre, "Kamping për Krejt" u zhvillua me sukses dhe u shndërrua në një ditë të paharrueshme për të gjithë pjesëmarrësit.
Sepse fuqia e një komuniteti nuk matet nga dallimet që ka, por nga mënyra se si arrin t'i bashkojë njerëzit.
Mirënjohje të veçantë i shprehim edhe mikut të Angros, këngëtarit Endrit Rexhepi, i cili që nga themelimi i klubit ka qenë gjithmonë pranë nesh, pa kursyer asnjëherë kohën, energjinë dhe kontributin e tij për të sjellë atmosferë dhe gëzim në aktivitetet tona.
Mbeteni me fotografit e akrivitetit të cilat do të postohen në disa albume
