17/02/2026
Kosova po feston përvjetorin e saj të 18-të. Ne jemi shumë të gëzuar sot që kemi privilegjin për ta shijuar këtë liri për të cilën shumë vetë sakrifikuan e dhanë jetën që ne sot të jemi të lirë. Kujtojmë shprehjen e famshme: “U krye bac!”
Ndërkohë që ne e shijojmë këtë liri, dëshirojmë t’a nënvizojmë një ngjarje të ndodhur shumë vjet më parë e cila na sjellë lirinë shpirtërore. Pa këtë liri shpirtërore të njeriut nuk mund të ketë liri të plotë të tij.
Kështu dy mijë vjet më parë, Jezus Krishti sakrifikoi jetën e tij për ne në mënyrë që ne të gjejmë faljen e mëkateve tona. Ne si qenie njerëzore jemi peng i mëkatit i cili e robëron jetën tonë shpirtërisht. Bibla, si Fjalë e Perëndisë, thekson që për shkak të mëkatit ne bëhemi skllevër të mëkatit dhe prandaj kemi nevojë për një çlirim nga mëkati. Për këtë gjë kemi nevojë për një ndërhyrje nga Perëndia sepse vetvetiu nuk mund ta arrijmë këtë çlirim.
Jezusi e realizoi këtë përmes vdekjes së tij duke derdhur gjakun e tij të pastër për ne. Tashmë ne nuk paguajmë asgjë, sepse Jezusi mori gjykimin e mëkatit tonë. Ne çlirohemi nga barra e mëkatit dhe shpallemi plotësisht të pastër.
Kjo gjendje njihet si rilindje shpirtërore dhe arrihet kur kuptojmë atë që Perëndia ka ofruar dhe mundësuar për ne përmes Jezusit. Çdo njeri ka nevojë për këtë gjë përfshirë edhe ty që e lexon sot këtë. Të lutem mendo për këtë të vërtetë shpirtërore. Jezus Krishti, në momentin e vdekjes së tij tha: “U krye”! Me një fjalë, çlirimi dhe shpëtimi i njeriut u realizua. U ofrua falas, dhuratë për ne, për shkak të dashurisë së tij të madhe për të gjithë njerëzit! Neve na ngelet vetëm ta pranojmë këtë dhuratë përmes besimit tonë. Gëzuar!
🇽🇰 🇽🇰 🇽🇰 🎂🥂
