09/08/2026
PËRMBYLLJA E EDICIONIT VIII TË PANAIRIT TË LIBRIT NË FERIZAJ
Me tri aktivitete letrare u përmbyll dita e katërt dhe e fundit e Edicionit të VIII-të të Panairit të Librit në Ferizaj, duke sjellë para publikut librin, autorët, poezinë, publicistikën dhe bashkëbisedimin për letërsinë.
Programi i ditës nisi me prezantimin e një prej veprave të autorit Aid el-Karni, botuar nga Shtëpia Botuese “Dëshmia”. Përmes një bashkëbisedimi me Ramadan Kashtanjevën, nga stafi i kësaj shtëpie botuese, publiku pati mundësi të njihej më nga afër me veprën, mesazhin e saj dhe veprimtarinë botuese të “Dëshmisë”.
Në aktivitetin e dytë u prezantuan tri autore ferizajase: Idajete Imeri, Blerta Tmava Veselaj dhe Bulëza Hysenaj Ademi. Përmes një bashkëbisedimi me udhëheqësen e aktivitetit, autoret folën për krijimtarinë e tyre, librat dhe përvojën e tyre letrare. Për veprën e Bulëza Hysenaj Ademit foli edhe Alban Hajrushi, ndërsa poezi nga krijimtaria e Blerta Tmava Veselajt interpretoi Safet Syla.
Aktiviteti përmbyllës i mbrëmjes iu kushtua gazetarit dhe publicistit Nehat Islami, me promovimin e librit të tij më të ri, “Gjarpri ilir lidh shekujt”, botuar nga Botimet DRINI.
Për librin dhe krijimtarinë shumëvjeçare të autorit folën Xheladin Rexhepi dhe Rexhep Maloku, ndërsa u lexua edhe vlerësimi i Avni Halimit. Përmes shkrimeve të mbledhura në këtë vëllim, libri sjell para lexuesit dekada të gazetarisë, kulturës dhe kujtesës historike shqiptare.
Promovimet dhe bashkëbisedimet e kësaj dite u udhëhoqën nga Zyrafete Shala.
Me këtë mbrëmje u mbyllën edhe aktivitetet letrare të Edicionit VIII të Panairit të Librit në Ferizaj.
Katër ditë me libra, autorë, botues, promovime e takime me lexuesit dëshmuan edhe një herë se panairi është më shumë sesa një hapësirë ku ekspozohen libra: është një vendtakim i njerëzve që i bashkon fjala e shkruar.
Klubi letrar “De Rada” falënderon autorëvt, botuesit, lexuesit, vizitorët dhe publikun që ishin pjesë e këtyre katër ditëve.
Fotot nga: Fatmir Vata
