Klubi Letrar "De Rada" - Ferizaj

30/04/2026

ARSIM HAMITI KRYETAR I RI I KLUBIT "DE RADA" NË FERIZAJ

Klubi letrar “De Rada” mbajti kuvendin e rregullt zgjedhor, në të cilin u bë zgjedhja e kryetarit dhe e bordit të ri drejtues të klubit. Me shumicë votash, për kryetar u zgjodh Arsim Hamiti.
Këto zgjedhje u zhvilluan pas përfundimit të mandatit të kryesisë së mëparshme, në përputhje me rregullat dhe procedurat statutare të klubit.
Takimin e hapi kryetarja e deritanishme, Zyrafete Shala, e cila paraqiti një raport të detajuar mbi punën shumëvjeçare të klubit, duke përfshirë aktivitetet, arritjet, sfidat dhe vështirësitë me të cilat është përballur klubi gjatë viteve të fundit.
Mbledhja u mbajt në Galerinë e Arteve, ndërsa procesi i votimit u zhvillua në mënyrë të rregullt dhe transparente, nën mbikëqyrjen e juristit Shefki Berisha.

29/04/2026

12/03/2026

17/12/2025

Sonte, në një atmosferë të ngrohtë kulturore në qytetin e Ferizajt, u përuruan dy libra të rinj të autorit të njohur dhe doajenit të gazetarisë shqiptare, Nehat Islami. Ngjarja e organizuar nga Klubi letrar "De Rada" dhe Botimet Botimet Drini mblodhi dashamirë të librit, gazetarë, intelektualë dhe përfaqësues të jetës publike, të cilët ndoqën me interes prezantimin e këtyre veprave me vlerë.
Librat që u përuruan: “Hotel Bejruti” dhe “Kur vjen kamerieri” janë botuar nga Shtëpia Botuese DRINI, e cila vazhdon të mbështesë autorët dhe veprat që kontribuojnë në pasurimin e letërsisë dhe publicistikës shqiptare.
Të pranishmit patën mundësinë të dëgjojnë fjalët vlerësuese për autorin dhe veprat e tij nga: Xheladin Rexhepi – shkrimtar, Rexhep Maloku – gazetar dhe Arsim Hamiti – kritik letrar. Ndërsa në cilësinë e botueses dhe të redaktores së librave foli Zyrafete Shala, e cila theksoi rëndësinë e këtyre botimeve për pasurimin e publicistikës dhe letërsisë shqiptare.
Vlen të theksohet se "Hotel Bejruti", është një prej veprave më të njohura të autorit, që sjell reflektime të thella mbi përvojat e tij nga Lindja e Mesme dhe përplasjet e realitetit politik të kohës. Ky është botimi i tretë i plotësuar i këtij libri.
Ndërsa "Kur vjen kamerieri" – një përmbledhje e re, që përfshin artikuj të botuar gjatë viteve ’90 në të përditshmen “Bujku” dhe intervista me personalitete të rëndësishme të kohës.
Ky përurim shënon jo vetëm një ngjarje kulturore, por edhe një kujtesë për rolin e rëndësishëm që ka pasur Nehat Islami në ndërtimin e gazetarisë bashkëkohore shqiptare, si dhe në rrëfimin e historive që kanë lënë gjurmë në kujtesën kolektive.

Fotot nga: Fatmir Vata

14/12/2025

HOMAZH POETIK PËR POETIN DËSHMOR I ATDHEUT

Shkruar nga Mustafë Xhemaili
***
ASTRIT GAFURR BYTYÇI (1975 –1998)
Si sot, më 14 dhjetor më 1998, në betejën e Gorozhupit, Zona e Pashtrikut, duke luftuar kundër forcave pushtuese të ushtrisë serbe, ra heroikisht poeti e luftëtari i Ushtrisë Çlirimtare të Kosovës, Astrit Bytyçi.
Ashtu siç bënë me mijëra studentë, edhe Astriti, pas një viti studimesh, vendosi që për përparësi të jetës së tij, ta ketë luftën e armatoaur për lirinë e Kosovës. Ai la në planë të dytë studimet, ndërsa poezinë dhe frymëzimet poetike i kishte me vete. Madje ai do të arrij të shkruaj një numër të mirë poezish. Gjatë bastisjeve që i kishin bërë shtëpisë së Gafurr Bytyçit, babait të Astritit, në Ferizaj, në dimërin e vitit 1998/1999. policia serbe i ka marrë poezitë e Astritit dhe i ka asgjësuar. Pjesa më e madhe e tyre e patën fatin e tij - edhe ato ranë në luftë! Por jo të gjitha! Prej krijimtarisë poetike të Astrit Bytyçit kanë shpëtuar disa poezi, të cilat janë botuar në librin e tij “Yllin tim e thërras”.
Me rastin e zhvarrimit të Astrit Bytyçit, në rrobat e tij, u gjet një poezi, e cila edhe këtu publikohet ashtu siç ishte në dorëshkrim.
Për librin poetik “Yllin tim e thërras”, shkrimtari i mirënjohur ferizajas Ismet ALIU, shkruan: “Astrit Bytyçi, në kërkim të së bukurës, ngeli në gjysmë të rrugës, sepse Atdheu ia kërkonte flijimin. Pra autori e kishte të qartë se cilës rrugë duhej ecur… prandaj ndezi dritën në altarin e lirisë…”
Astrit Bytyqi, ka lindur më 17 prill të vitit 1975, në Ferizaj. Shkollimin fillor e ka mbaruar në “Tefik Canga”, si dhe shkollën e mesme drejtimin e lëndve teknike, në Ferizaj. Në Prishtinë ka studjuar në Fakultetin Filozofik, Dega e Letërsisë dhe Gjuhës Shqipe. Gjatë demonstratës së 1 Tetorit 1997, ai merr pjesë në mënyrë aktive. Aty njohu bashkëmendimtarë e veprimtarë si dhe pjesëtarë të njësiteve të armatosura të UÇK-së, të cilat ishin përgatitur për luftë të armatosur.
Më 15 shtator të vitit 1998 e caktojnë në pikën ushtarake të UÇK-së në Shalë të Drenicës dhe pastaj inkuadrohet në radhët e Batalionit “Ruzhdi Salihu” të Brigadës 121 Ismet Jashari-Kumanova.
Në mëngjesin e acartë të 14 dhjetorit 1998, kolona prej 143 ushtarëve të UÇK, niset nga Shqipëria për të luftuar në Kosovë. Në kushte të rënda të motit të lig dimëror dhe terrenit të vështirë malor, kolona sulmohet nga ushtria serbe që kishte ngritur pritë. Te vendi i quajtur “Likenet e Hasit”, zhvillohet beteja mes UÇK-së dhe ushtrisë serbe, e cila betejë njihet si beteja e Gorozhupit. Në luftë e sipër, bien heroikisht 43 luftëtarë, në mesin e tyre edhe poeti e luftëtari Astrit Bytyçi, dëshmor i Atdheut.
Në këtë betejë ranë dëshmorë edhe dy luftëtarë tjerë nga Ferizaj, Hysni Kajtazi dhe Besim Qarri. Po këtë ditë dhjetori, bie heroikisht komandanti i famshëm Mujë Krasniqi.
Klubi letrar «De Rada» i Ferizajit, i formuar para 52 vjetësh, për nderim të poetit dëshmor, ka themeluar Konkursin e Poezisë «Ora e Astritit», i cili organizohet për çdo vit, dhe ka karakter garues.
***
YLL I BARDHË
Ylli i bardhë feksi,
e nata qelq i thyer.
Aurora mbi sy kaltëron
Yll i bardhë
pishtar i diellit,
u shkëput nga gishtërinjtë e territ,
u ndez në zemrën e diellit.
Nga lart u ndrit,
yll i bardhë,
margaritar.
***
TROJA
Erërat jonike,
uragan mbi hirin tënd,
Trojë.
Në brigjet e purpurta,
sulen dallgë të tërbuara.
Mbi rërën e përjargur,
alga.
Në kafkën e thyer,
një thembër e përgjakur.
Tutje një kalë i bardhë,
Trojë,
ndiej frymëmarrjen tënde.
‘95

05/12/2025

Promovimi i librit “Zogjtë ende nuk ishin kthyer” nga Nafije Zogaj
Galeria e Arteve në Ferizaj sonte u mbush me dashamirë të librit dhe fjalës poetike, për të ndjekur me interesim promovimin e vëllimit të ri poetik “Zogjtë ende nuk ishin kthyer” të autores Nafije Zogaj, botuar nga SHB DRINI - Ferizaj. Poezitë që trajtojnë plagët e luftës, të lexuara me ndjeshmëri nga aktori Nexhat Xhokli dhe gazetarja Drita Miftari, krijuan atmosferë emocionuese.
Ngjarja u nderua me pjesëmarrjen e qytetarëve ferizajas të të gjitha moshave, adhurues të poezisë. Veçanërisht e rëndësishme ishte prania e Drejtorit të sapoemëruar të DKRS-së, z. Gazmend Bytyçi, për të cilin kjo ishte ngjarja e parë kulturore ku mori pjesë në cilësinë e re. Ai përshëndeti të pranishmit dhe e uroi autoren për krijimtarinë e saj.
Për librin folën me përkushtim dhe vlerësim: redaktorja dhe botuesja Zyrafete Shala, kritiku letrar Arsim Hamiti dhe krijuesja Idajete Imeri, duke theksuar thellësinë emocionale dhe rëndësinë e veprës në kujtesën tonë letrare. U theksua se poezia e Nafije Zogajt është zë i heshtur i kujtesës, që meriton të dëgjohet e të lexohet me vëmendje. Një befasi e bukur ishte edhe shkrimi nga Tirana, i dërguar nga krijuesja Zhaneta Barxhaj, në pamundësi të ishte e pranishme në këtë ngjarje.
Ngjarja u moderua me kujdes nga Nazmi Berisha, ndërsa fotografitë e mbrëmjes janë realizuar nga Fatmir Vata.
Ky përurim u organizua nga klubi letrar “De Rada” dhe Botimet DRINI.

🙏 Falënderim i veçantë për të gjithë pjesëmarrësit, për Galerinë e Arteve në Ferizaj dhe secilin që e bëri të mundur këtë promovim.

03/12/2025

📚 Ftesë për promovimin e librit të ri të Nafije Zogajt!

Të premten, më 5 dhjetor 2025, në ora 17:00, në Galerinë e Arteve në Ferizaj, do të organizohet promovimi i vëllimit poetik:

“Zogjtë ende nuk ishin kthyer”
nga Nafije Zogaj

Ky vëllim poetik, i botuar nga Botimet DRINI, sjell përballjen e thellë të autores me përvojat e luftës, traumën, mungesën dhe dhimbjen njerëzore. Nëpërmjet vargjeve të saj, Zogaj krijon një poezi që është njëkohësisht protestë e heshtur dhe kujtesë e gjallë – një zë që ngjall reflektim dhe ndjeshmëri.

Me stilin e saj të drejtpërdrejtë dhe emocionalisht të ngarkuar, ajo arrin të zhysë lexuesin në thellësinë e përvojave të hidhura, si ato kolektive ashtu edhe individuale.

📍 Ejani ta ndajmë së bashku këtë ngjarje letrare dhe t’i japim jehonë zërit poetik të kujtesës!

24/10/2025

Sonte në Festivalin Regjional të Recitatorëve (edicioni 22) organizuar nga Fondacioni Chaplin, klubi "De Rada" ndau çmimin "Zyhrije Vata", fituese e të cilit këtë vit ishte Elona Avdyli, nxënëse e shkollës "Vezir Jashari" në Ferizaj.
Bashkë me trofenë që u dorëzua nga Arsim Hamiti - nënkryetar i klubit, Elonës iu dhurua nga familja e Zyhrije Vatës edhe vëllimi i saj poetik "Dielli që nuk perëndon".

28/09/2025

Poezi nga “Ora e Astritit 2025”

PRITJA - Arben HYSENI

Eci kohës si në anije…
I përziej ndjenjat.
Kuptoj shumëçka që nuk di,
rrotullohem nëpër shkëndi…

Pres të shoh me sy…
Me sytë e mi të ndritur,
se kujtimi i ka çmu.
E jetën e lumtur, për ta parë…
Kjo i ka nguju!

Rritem me shpresë…
Nëpër lumenjtë e këndellur,
se e presin marshimin,
por presin edhe mënyrën!

Ku je more lum…
I gjerë që po fle pa arsye?
Se një gjë e ke të sigurt…
Gurrat e tua duhet të shihen.

Ky lum i njerëzve që s’flenë,
që kurrë asgjë nuk i përkuli,
sot shfaqen të zi.
Nën hije po ruhen…

Pres të shoh…
Veprimi mungon.