Departamenti i gruas - KBI Ferizaj

11/08/2026

24/07/2026

Kursi veror në Xhaminë e Re në fshatin Pleshinë përfundoi me një atmosferë festive, të mbushur me gëzim, buzëqeshje dhe momente të bukura.

Le të jetë ky kurs një fillim i ri në rrugën drejt dijes, edukimit dhe vlerave të larta islame. Xhamia është shtëpia e Zotit, ku përveç adhurimit dhe kryerjes së ibadeteve, është edhe një vend i shenjtë i mësimit, edukimit dhe formimit të brezave të rinj.

Falënderim i veçantë për mualimen Ardiana Hajra Bakolli dhe imamin e Xhamisë së Re në fshatin Pleshinë, Mensur Avdyli, për përkushtimin, angazhimin dhe kontributin e tyre në zhvillimin e këtij kursi veror.

Lusim Allahun e Madhëruar që t’i shpërblejë me të mira të gjithë ata që kontribuan dhe që fëmijët t’i ruajnë e t’i zbatojnë dijet e fituara në jetën e tyre. Amin.

13/07/2026

Zhvillimi i kursit veror në Xhaminë e Re të fshatit Pleshinë

Në Xhaminë e Re të fshatit Pleshinë po zhvillohet me sukses kursi veror, ku fëmijët dhe të rinjtë kanë mundësinë të përfitojnë njohuri fetare, edukative dhe morale në një atmosferë të ngrohtë e frymëzuese.

Përveç mësimeve fetare, ky kurs u mundëson pjesëmarrësve të krijojnë miqësi të reja, të angazhohen në aktivitete edukative e argëtuese dhe ta kalojnë kohën në një mjedis të sigurt, pozitiv dhe të mbushur me vlera.

Kursi veror luan një rol të rëndësishëm në formimin e karakterit, kultivimin e moralit dhe edukimin e brezit të ri me ndjenjën e përgjegjësisë, respektit dhe solidaritetit, duke i motivuar ata të bëhen anëtarë të dobishëm për familjen, shoqërinë dhe komunitetin.

Kjo përvojë e çmuar lë mbresa të bukura në zemrat e fëmijëve dhe u dhuron atyre njohuri e vlera që do t’i shoqërojnë gjatë gjithë jetës.

11/07/2026

Kursi Veror në Xhaminë e Nekodimit!
Këtë javë, xhamia e Nekodim përfundoi kursin verorë ku prezantuan më shumë se 50 nxënës. Përgjatë pesë ditëve, fëmijët tanë mësuan bazat e fesë, edukatën islame dhe morën këshilla të vlefshme për jetën, si dhe u argëtuan pafund përmes lojërave, aktiviteteve dhe shëtitjeve së bashku! Çdo ditë ishte një mundësi për të mësuar diçka të re, për të forcuar vlerat e mira dhe për ta kaluar kohën në një ambient të ngrohtë e miqësor. Ky organizim u bë më i lehtë dhe më i këndshëm falë bashkëpunimit me mualimet Arlinda Lami, Florentina Maliqi dhe nxënësit e xhamisë në rrugën “Vëllezërit Gërvalla”. Gjatë këtyre ditëve ishte në vizitë edhe Koordinatorja Blerina Nazifi Asllani.

Në fund, secili prej tyre u vlerësua me nga një certifikatë për përkushtimin në mësime dhe sjelljen e mrekullueshme gjatë kursit.

Allahu e pranoftë këtë punë dhe i bëftë këta fëmijë prej atyre që e duan dijen dhe e zbatojnë atë.

02/06/2026

Në Xhaminë e re në Pleshinë u mbajt një program i veçantë për nder të hyrjes në Kur’an të nxënësve: Trim Mustafa, Atik Avdyli, Ajan Asllani dhe Amina Asllani.

Këta nxënës kanë ndjekur mësimet pranë mësueses Ardiana Hajra Bakolli, e cila me përkushtim dhe angazhim i ka udhëhequr në rrugëtimin e tyre drejt mësimit të Kur’anit.

Në këtë manifestim ishte e pranishme edhe përfaqësuesja e Departamentit të Gruas, znj. Blerina Nazifi Asllani, si dhe mualimja Teuta Boroci Jaha. Me këtë rast, znj. Blerina Nazifi Asllani përgëzoi mësuesen Ardiana Hajra Bakolli për punën dhe përkushtimin e saj në edukimin e nxënësve, duke uruar që këta fëmijë të mos ndahen kurrë nga Kur’ani dhe udhëzimet e tij.

Programi u pasurua me recitime, ilahi dhe pika të ndryshme artistike të përgatitura nga nxënësit e kësaj xhamie, duke i dhënë aktivitetit një atmosferë të veçantë shpirtërore dhe festive.

Lusim Allahun e Madhëruar që mësimet dhe udhëzimet e Kur’anit t’i shoqërojnë këta nxënës gjatë gjithë jetës së tyre, t’i bëjë prej atyre që e lexojnë, e kuptojnë dhe e zbatojnë atë në jetën e përditshme. Le të jetë kjo një nismë e bekuar dhe frymëzuese për të gjithë nxënësit e kësaj xhamie.

Urime nxënësve, familjeve të tyre dhe mësueses Ardiana Hajra Bakolli për këtë sukses të çmuar! 🤍📖🌹

28/05/2026

Me rastin e festës së Kurban Bajramit, mualimet pranë Departamentit të Gruas në Ferizaj, në bashkëpunim me imamët e xhamive ku veprojnë, kanë organizuar shpërndarjen e dhuratave për fëmijët që vijojnë mësimbesimin.

Nxënësit u kënaqën shumë me këtë surprizë festive dhe atmosfera ishte e mbushur me gëzim, buzëqeshje dhe emocion. Ky aktivitet solli hare tek fëmijët dhe njëkohësisht shërbeu si motivim dhe kujdes ndaj tyre me rastin e kësaj feste të begatë.

27/05/2026

Me rastin e festës së Kurban Bajramit, ju uroj nga zemra paqe, shëndet, lumturi dhe begati në familjet tuaja.Kjo festë na kujton vlerat e sakrificës, mirësisë, respektit dhe dashurisë ndaj njëri-tjetrit.

Uroj që këto ditë festive t’i kaloni pranë më të dashurve tuaj me gëzim dhe harmoni.

Gëzuar Kurban Bajramin! 🌙

25/04/2026

Në një atmosferë të veçantë shpirtërore dhe festive, u organizua ceremonia e Duasë së Hatmes për 12 nxënës të moshave nga 12 deri në 66 vjeç, të cilët me përkushtim dhe sukses përfunduan leximin e plotë të Kuranit nën udhëheqjen e mësueses së tyre, znj. Blerina Nazifi Asllani.

Ky aktivitet shënon një arritje të rëndësishme për nxënësit, duke dëshmuar se rruga e dijes dhe lidhjes me Kuranin është e hapur për çdo moshë dhe kërkon vetëm vullnet, durim dhe përkushtim.

E pranishme si musafire nderi ishte znj. Florentina Tërmkolli, zyrtare e Departamentit të Gruas në Bashkësinë Islame të Kosovës, e cila në fjalën e saj theksoi rëndësinë dhe vlerën e Kuranit në jetën e përditshme të besimtarit, duke i inkurajuar të gjithë që ta bëjnë atë udhërrëfyes të jetës. Ndërsa nikoqirja e programit përgëzoi nxënësit për suksesin e arritur, duke vlerësuar përkushtimin dhe angazhimin e tyre gjatë gjithë këtij rrugëtimi.

Programi u pasurua me pika të ndryshme si lexim i Kuranit, ilahi dhe poezi, të cilat i dhanë një dimension të veçantë dhe emocional kësaj ngjarjeje.

Në fund, aktiviteti u përmbyll me një koktej të përgatitur nga vetë nxënësit, duke reflektuar frymën e bashkëpunimit dhe mirënjohjes.

Ky program u ndoq nga një numër i madh i nxënëseve dhe të pranishmëve, të cilët ndanë së bashku gëzimin e kësaj arritjeje të rëndësishme.