Kryqi i Kuq i Kosovës - Dega Drenas

14/10/2026

14/10/2026

Ligjeratë për ndihmën e parë në SHFMU “Zenel Hajdini” në Tërstenik
Sot, Kryqi i Kuq i Kosovës – Dega në Drenas, zhvilloi një ligjeratë për ndihmën e parë me nxënësit e SHFMU “Zenel Hajdini” në Tërstenik, me qëllim të vetëdijesimit dhe aftësimit të tyre për të reaguar drejt dhe me përgjegjësi në situata emergjente.
Trajnimi u organizua me iniciativën dhe përkushtimin e mësueses, znj. Shkurte Rruku, ndërsa pjesa praktike dhe informuese u udhëhoq nga instruktorja e ndihmës së parë, znj. Besarte Hoxha. Gjatë këtij aktiviteti, nxënësit patën mundësinë të njihen më nga afër me rëndësinë e ndihmës së parë, veprimet fillestare në raste emergjente dhe rolin që secili prej nesh mund të luajë në shpëtimin e jetës së një personi.
Kryqi i Kuq i Kosovës – Dega në Drenas, shpreh mirënjohje të veçantë për drejtoreshën e shkollës znj.Lindihana Qorri për mikpritjen dhe bashkëpunimin, si dhe për të gjithë stafin arsimor dhe mësimdhënësit për mbështetjen dhe gatishmërinë e treguar në realizimin e këtij aktiviteti edukativ.
Në përmbyllje të aktivitetit, nxënësit, stafi i shkollës dhe prindërit iu bashkuan aksionit të organizuar në kuadër të Muajit të Solidaritetit, duke përgatitur dhe dhuruar pako ushqimore me produkte ushqimore e higjienike për familjet në nevojë.
Ky gjest i bukur dëshmon se solidariteti, humanizmi dhe kujdesi për njëri-tjetrin kultivohen që në moshë të hershme. Përmes këtyre aktiviteteve, fëmijët mësojnë jo vetëm si të ndihmojnë në situata emergjente, por edhe sa e rëndësishme është të ndajnë me të tjerët dhe të kontribuojnë për një shoqëri më të drejtë e më humane.
Falënderojmë përzemërsisht mësuesen znj. Shkurte Rruku, drejtoreshën, stafin arsimor, nxënësit dhe prindërit për bashkëpunimin, përkushtimin dhe kontributin e tyre human.
Së bashku, për më shumë dije, solidaritet dhe humanizëm!

09/10/2026

NJOFTIM MORTOR

Me pikëllim të thellë morëm lajmin për ndarjen nga jeta të aktivistit shumëvjeçar të Degës së Kryqit të Kuq në Drenas, Halim Seferaj.
I ndjeri Halim ishte një aktivist i përkushtuar dhe një kontribuues i çmuar në veprimtarinë e Degës së Kryqit të Kuq në Drenas. Përveç angazhimit të tij shumëvjeçar, ai ishte edhe anëtar i Komisionit Financiar të Degës, ku me përgjegjësi dhe përkushtim dha kontributin e tij në shërbim të organizatës dhe komunitetit.
Ndarja e tij nga jeta është një humbje e dhimbshme për familjen, miqtë, bashkëpunëtorët dhe të gjithë ata që patën rastin ta njohin dhe të punojnë me të. Kujtimi për të dhe kontributi i tij do të mbeten gjithmonë të çmuara për Degën e Kryqit të Kuq në Drenas.
Varrimi i të ndjerit Halim Seferaj do të bëhet më 09.10.2026 (e premte), në ora 15:00, në varrezat e Drenasit.
Në këto momente të rënda, shprehim ngushëllimet tona më të sinqerta për familjen Seferaj, të afërmit, miqtë dhe bashkëpunëtorët e tij.
U prehtë në paqe dhe i qoftë i lehtë dheu!

07/10/2026

SHFMU “Gani Sylaj” – Poklek
Vullnetarët tanë, Jona, Olsi, Tringa dhe Masari, kanë realizuar dy sesione MISP për të rinjtë, me fokus në edukimin për Shëndetin Riprodhues në situata emergjente dhe rëndësinë e zbatimit të Pakos Minimale të Shërbimeve Fillestare (MISP).
Sesionet u zhvilluan në mënyrë interaktive, duke nxitur pjesëmarrjen aktive të nxënësve, të cilët kontribuuan me pyetje, diskutime dhe ndarjen e njohurive të tyre lidhur me temat e trajtuara.
Falënderojmë drejtorin e SHFMU “Gani Sylaj”, z. Rifat Demaku, për mikpritjen dhe bashkëpunimin e tij, Drejtorinë Komunale të Arsimit në Drenas për mbështetjen e vazhdueshme, si dhe të gjithë nxënësit për angazhimin dhe pjesëmarrjen e tyre aktive.
Së bashku për më shumë njohuri, vetëdijesim dhe një shëndet më të mirë për të rinjtë.

30/09/2026

MUAJI I SOLIDARITETIT 2026
📅 1 – 31 Tetor 2026
Kryqi i Kuq i Kosovës – Dega Drenas njofton fillimin e fushatës tradicionale humanitare “Muaji i Solidaritetit”, e cila do të zhvillohet nga 1 deri më 31 Tetor 2026.
Kjo fushatë synon mobilizimin e komunitetit për të mbështetur familjet në nevojë dhe për të promovuar vlerat e humanizmit, solidaritetit dhe ndihmës së ndërsjellë.
Ftojmë qytetarët, bizneset, institucionet dhe të gjithë njerëzit vullnetmirë të kontribuojnë me:
-Pako ushqimore
- Veshmbathje të reja
-Batanije dhe mbulesa
-Artikuj higjienikë
- Ndihma të tjera të nevojshme për familjet në gjendje të vështirë sociale
Donacionet mund të dorëzohen çdo ditë pune në zyrën e Kryqit të Kuq të Kosovës – Dega Drenas.

Kontributet financiare mund të realizohen përmes xhirollogarisë në NLB Banka:
Kryqi i Kuq i Kosovës – Dega Drenas
Xhirollogaria: 1708200008006331

Çdo kontribut ka vlerë. Së bashku mund të sjellim më shumë shpresë, mbështetje dhe dinjitet për familjet që kanë nevojë për ndihmën tonë.

30/09/2026

Sot, në kuadër të marrëveshjes së bashkëpunimit për klubet e Kryqit të Kuq në shkolla, instruktorja e Kryqit të Kuq – Dega Drenas, znj. Besarta Hoxha, mbajti një ligjëratë dhe trajnim praktik mbi Ndihmën e Parë për nxënësit dhe stafin e Gjimnazi "Gjergj Kastrioti Skënderbeu" - Drenas.
Gjatë aktivitetit, theks i veçantë iu kushtua përdorimit të Defibrilatorit të Jashtëm Automatik (AED), një pajisje jetike që mund të ndihmojë në shpëtimin e jetës në rastet e arrestit kardiak. Pjesëmarrësit patën mundësinë të njihen me rëndësinë e reagimit të shpejtë, hapat bazë të ndihmës së parë dhe mënyrën e përdorimit të AED-së në situata emergjente.
Falënderojmë drejtorin z. Naim Dobrëdolani për mbështetjen dhe bashkëpunimin e vazhdueshëm, si dhe profesorët, profesoreshat dhe nxënësit për pjesëmarrjen aktive dhe interesimin e treguar. Aktivitete të tilla kontribuojnë në rritjen e njohurive dhe aftësive që mund të bëjnë dallimin në shpëtimin e një jete.

28/09/2026

Duke falënderuar Kryqin e Kuq në Drenas, sot shkollës sonë iu shtuan edhe dy printerë, si mbështetje për përmirësimin e infrastrukturës së shkollës.

Drejtoria e shkollës falënderon KK-në, dega në Drenas, z. Egzon Morina, si dhe profesorët z. Ilir Demaku dhe znj. Ermira Demiqi qe perfunduan me sukses projektin .

Një falënderim i veçantë u dedikohet nxënësve pjesëmarrës, të cilët me entuziazmin, kreativitetin dhe përkushtimin e tyre ishin pjesë e rëndësishme e këtij suksesi.

Së bashku vazhdojmë të promovojmë humanizmin, solidaritetin dhe vlerat që forcojnë komunitetin

28/09/2026

PROJEKTI PËR PROMOVIMIN E VLERAVE HUMANE- PVH
Pas përfundimit me sukses të projektit për promovimin e vlerave humane, sot Gjimnazit “Gjergj Kastrioti – Skënderbeu” në Drenas iu dorëzuan dy printerë si mbështetje për procesin edukativo-arsimor dhe aktivitetet e shkollës.
Falënderojmë sinqerisht drejtorin e shkollës, z. Naim Doberdolani, për bashkëpunimin dhe mbështetjen e vazhdueshme gjatë realizimit të projektit.
Mirënjohje e veçantë shkon edhe për profesorët diseminatorë, z.Ilir Demaku dhe znj.Ermira Demiqi të cilët me përkushtimin, angazhimin dhe punën e tyre të palodhshme kontribuan në arritjen e rezultateve të suksesshme të projektit.
Një falënderim i veçantë u dedikohet nxënësve pjesëmarrës, të cilët me entuziazmin, kreativitetin dhe përkushtimin e tyre ishin pjesë e rëndësishme e këtij suksesi.
Së bashku vazhdojmë të promovojmë humanizmin, solidaritetin dhe vlerat që forcojnë komunitetin tonë.

Gjimnazi "Gjergj Kastrioti Skënderbeu" - Drenas
Ilir Demaku

28/09/2026

MIRËNJOHJE PËR CARABINIERËT ITALIANË TË KFOR-it
Kryqi i Kuq i Kosovës – Dega Drenas ka ndarë mirënjohje për:
• Cap. Liubovi LUCHIANIC
• Mar. Cap. Maurizio NIGRO
• App. Sc. Q.S. Antonio SANTORI
në shenjë respekti dhe mirënjohjeje për kontributin e dhënë në mbështetje të aktiviteteve humanitare të Kryqit të Kuq të Kosovës dega në Drenas, veçanërisht në ndihmën dhe përkrahjen e familjeve në nevojë.
Pas ceremonisë së ndarjes së mirënjohjeve, së bashku me Carabinierët Italianë të KFOR-it vizituam një familje në nevojë, të cilën e ndihmuam me pako ushqimore, pako higjienike dhe veshmbathje. Ky gjest solidariteti dëshmon edhe një herë përkushtimin tonë të përbashkët në mbështetje të familjeve që kanë nevojë për ndihmë.
Falënderojmë përzemërsisht për bashkëpunimin, solidaritetin dhe mbështetjen e vazhdueshme të treguar ndaj komunitetit tonë.

05/09/2026

Sot, së bashku me donatorin tonë të rregullt, z. Mergim Morina , pronar i autosallonit GM AUTO, vizituan familjen Muja nga fshati Gradicë.
Me këtë rast, z. Morina i dhuroi familjes një ndihmë financiare në para të gatshme, duke ofruar mbështetje për nevojat e tyre të përditshme dhe duke dëshmuar edhe një herë solidaritetin dhe përkushtimin ndaj familjeve në nevojë.
Kryqi i Kuq shpreh mirënjohjen e sinqertë për z. Mërgim Morina për kontributin e vazhdueshëm humanitar dhe gatishmërinë e tij për të ndihmuar ata që kanë nevojë. Bashkëpunimi me donatorë dhe mbështetës të tillë është një shembull i rëndësishëm i humanizmit dhe përgjegjësisë shoqërore.
Falënderojmë të gjithë donatorët që kontribuojnë në përmirësimin e jetës së familjeve në nevojë dhe në forcimin e vlerave të solidaritetit në komunitetin tonë.