01/06/2026
📢 NJOFTIM PËR NISMËN E RENOVIMIT TË XHAMISË NË FSHATIN PRILEP
Të nderuar bashkëfshatarë, bashkatdhetarë dhe miq,
Pas një takimi të mbajtur në fshatin Prilep, mes përfaqësuesve të fshatrave Prilep, Rastavicë, Gllogjan dhe Prokolluk, së bashku me Imamin e Xhamisë, u diskutua dhe u vendos fillimi i një nisme për renovimin e Xhamisë.
Pas vlerësimit të gjendjes aktuale të objektit dhe konsultimeve me profesionistë të fushës, janë identifikuar këto punime të domosdoshme:
✅ Ndërrimi i dritareve
✅ Lyerja e brendshme e objektit
✅ Izolimi dhe fasadimi i jashtëm
✅ Renovimi i abdeshanes dhe nyjeve sanitare përcjellës
✅ Rregullimi i hapësirës ku ligjëron imami dhe i ambientit përreth
✅ Zëvendësimi i dy dyerve të brendshme
✅ Hapja e një dere të re hyrëse (nga ana e kullës)
✅ Vendosja e ulluqeve të rinjë pas izolimit të objektit
✅ Shtrimi i kubëzave përreth xhamisë pas përfundimit të izolimit
✅ Përmirësimi i ndriçimit të brendshëm të xhamisë
Pas ofertave dhe përllogaritjeve paraprake, vlera e përgjithshme e projektit është vlerësuar rreth 50.000 (pesëdhjet mijë) euro.
Për mbarëvajtjen e projektit, është formuar komisioni mbikëqyrës i përbërë nga:
• Riza Tolaj – Kryetar i fshatit Prilep•
• Xhafer Kadrijaj – Kryetar i fshatit Rastavicë•
• Rexhep Zeqiraj – Kryetar i fshatit Gllogjan•
• Skender Haxhosaj – Kryetar i fshatit Prokolluk•
• Imami i Xhamisë•
Ky komision do të jetë përgjegjës për koordinimin, mbikëqyrjen dhe raportimin e të gjitha aktiviteteve gjatë realizimit të projektit.
Procesi do të zhvillohet me transparencë të plotë. Të gjitha kontributet, shpenzimet, kontraktimet e punimeve dhe ecuria e projektit do të jenë të dokumentuara dhe të informohen rregullisht banorët dhe donatorët, në mënyrë që secili kontribues të ketë pasqyrë të qartë mbi përdorimin e mjeteve të grumbulluara.
Është vendosur që kontributi minimal i rekomanduar për çdo familje të jetë 50 euro, ndërsa secili që ka mundësi mund të kontribuojë edhe më shumë sipas dëshirës dhe mundësive të veta.
Ftojmë të gjithë banorët e fshatrave Prilep, Rastavicë, Gllogjan dhe Prokolluk, si dhe bashkatdhetarët tanë kudo që ndodhen, që ta mbështesin këtë iniciativë të përbashkët. Çdo kontribut është një investim për shtëpinë tonë të përbashkët të adhurimit dhe për gjeneratat që do të vijnë.
Lusim Allahun e Madhëruar që ta pranojë këtë vepër të mirë dhe t'i shpërblejë të gjithë kontribuuesit për bujarinë dhe mbështetjen e tyre.
Me respekt,
Këshillat e Fshatrave Prilep, Rastavicë, Gllogjan, Prokolluk dhe Imami i Xhamisë.
