EFKS Lalomalava, Savai'i/CCCS Lalomalava

EFKS Lalomalava, Savai'i/CCCS Lalomalava Official page for members of the Congregational Christian Church in Samoa/Ekalesia Faapotopotoga Kerisiano i Samoa Lalomalava, Savai'i.

21/06/2026

LAUGA I LE LOTU AFIAFI O LE A*O SA, 21.06.26

Tusi Faitau: Opetaia 1:1–4
: Luka 18:9–14

O LE LAUGA I LE SUAFA MAMALU O LE ATUA LE TAMA, LE ALO, MA LE AGAGA PA’IA, AMENE

Matua: Opetaia 1:4
“E ui lava ina maualuga le mea e te nofo ai pei o le aeto, ma e tu’u lou ofaga i fetū, o lo’o fetalai mai le ALI’I, ou te lafo iā te oe i lalo i lea mea.”
Though you soar aloft like the eagle, though your nest is set among the stars, from there I will bring you down, says the LORD. (Verse 4)

Manatu Autū: E leaga le fa’amaualuga (Arrogance is Evil)

Fa’atomuaga
E tele mauga tatou te iloa i lenei lalolagi. E i ai mauga maualuluga e matagofie i le va’ai, e i ai fo’i mauga ua a‘ea e nisi o tagata. A tū le tagata i luga o se mauga maualuga, ona ia molimauina lea o le matagofie o mea na faia e le Atua.

Ae i ai fo’i mauga e sili ona mata’utia. E lē o se mauga e tū i luga o le lauele‘ele, ae tupu i totonu o le loto o le tagata. O le mauga lea o le fa‘amaualuga. E manatu ai le tagata ua lava lona malosi ma lona poto, ma ua ia lē toe mana‘omia le Atua. O le taimi lea e ave ai e le tagata meaalofa a le Atua, ma manatu o ana lava mea na ia maua.

E amata filemu i totonu o le loto, ae tupu ma fa‘ateleina se‘ia o‘o ina nofo le tagata i le nofoāli‘i e tatau ona afio ai le Atua. A o upu masani fai mai o le maualuga lava o le a’e, o le tigaina fo’i lenā o le pa’ū.

Feagaiga Tuai: Opetaia 1:1–4
O le tusi a le perofeta o Opetaia o lo’o aumaia ai le tala o le nu’u o Etoma. O Etoma, o suli ia o Esau, le atali’i ulumatua o Isa’ako, ma le uso o Iakopo. O lo latou tala’aga, e amata mai lava i le fete’ena’iga i le vā o uso; o Iakopo ma Esau. O le tigā na amata mai totonu o le āiga, ae mulimuli ane avea ma fete’ena’iga i le vā o mālō; o Sā Iutā le nu’u o le Atua e tupuga mai iā Iakopo, ma Etoma le nu’u e tupuga mai i lona uso matua o Esau. O fa’ailoga tāua e iloa ai, o le tele lava o fa’afītauli, e amata mai i totonu o le loto.

Sa nonofo Etoma i nofoaga maualuluga. Sa latou fausia lo latou a’ai i luga o papa ma mauga. Sa latou manatu, o le maualuga o lo latou tulaga ma le si’osi’omaga, o le a avea ma puipuiga e lē mafai ai ona fa’ato’ilaloina i latou. Sa latou va’ai i le malolosi o latou ta’ita’i, o lo latou malosi fa’a-fitafita, ma lo latou nofoaga maualuga, ma latou fa’apea ane ai, “O ai se na te lafo iā te a’u i lalo i le ele’ele?”

Le la ua o’o ina tumu le fua, ma ua tali mai le Atua iā Etoma: “E ui lava ina maualuga le mea e te nofo ai pei o le aeto, ma e tu’u lou ofaga i fetū, ou te lafo iā te oe i lalo i lea mea.” O le aeto, o se manu e maualuga lana lele. E foliga mai e lē mafai ona pa‘i atu i ai se isi. O le ata fa’atusa lea o le va’ai a Etoma iā i latou lava. O le fa’afītauli tupito lea e tula’i mai, e lē o le maualuga o lo latou nofoaga, a o le maualuga o latou loto.

Ua galo iā Etoma, o le mafua’aga o lo latou ola ma lo latou malosi, e mai le Atua. Ua latou manatu, o lo latou manuia, na maua i latou lava malosi. Ua avea fa’amanuiaga na foai mai e le Atua ma mafua’aga e mitamita ai. O le uiga tonu lea o le fa’amaualuga. E lē na o le mitamita i luma o tagata, ae aofia ai ma le fa’agaloina o le Atua o le pogai o mea uma. Ua si’i e tagata Etoma i latou lava i luga i le tulaga e tatau ma le Atua. Ua manatu ifo, o ia lava le matai o ona lava manuia. Na te’ena e le Atua lo latou fa’amaualuga. Auā o le fa’amaualuga, na latou taumafai ai e ave’ese le Atua mai lona nofoali’i, ae sui tulaga i ai i latou.

O le fa’amasinoga a le Atua, e lē o le fa’aumatia o le tagata. A o lona fa’amoemoe, ia toe tata’i mai le loto o le tagata iā te IA. O nisi taimi e fa’atagaina e le Atua le tagata e pa‘ū mai lona maualuga, ina ia iloa ai, o le fa’avae moni o lona ola, e lē o lona malosi, a o le Atua. O le a’oa’oga lea mo Etoma, ia aua le fa’alagolago i mea e lē tumau ma mavae atu. Auā o mea e si’iina i latou i luga, e mafai ona ave’esea, pe a galo iā i tatou le Atua na pogai mai ai.

Feagaiga Fou: Luka 18:9–14
O lo’o fa’aalia manino mai e Opetaia, le fa’amaualuga o le mālō ma le nu’u atoa. A o tusitusiga a Luka, ua fa’aalia mai ai le fa’amaualuga o le loto o le tagata e to’atasi. Fai mai le fetalaiga a Iesu, “Auā o sē fa’amaualuga iā te ia, e fa’amaulaloina lea; a o lē fa’amaulaloina iā te ia, e fa’amaualugaina lea.”

O le mea e sili ona mata’utia i le fa’amaualuga, e lē o taimi uma e iloa ai e tagata. E mafai ona natia ma nofo i totonu o le tagata e to’aga e tatalo, e alu i le lotu, e auauna, ae ua amata ona manatu, ua sili atu o ia na i lo isi. O le Faresaio i le tala a Luka, e lē o se tagata leaga. O ia o le tagata e iloa le tulafono. Sa anapogi, ma faia mea uma e tatau ona faia e so’o se tagata lotu.

A o le fa’afītauli e lē o ana galuega lelei, a o lona loto. Na ona sau i luma o le Atua, ae lē sau ma le loto ua mana’omia le alofa tunoa. Na sau o ia ma lana lava amiotonu. Fai mai a ia: “Le Atua e, ou te fa’afetai atu iā te oe, ou te le pei o isi tagata.” O le upu sili ona mata’utia i lana tatalo, o le “ou.” Auā o le loto fa’amaualuga, e amata ina ua avea le tagata ma ogatotonu o lona lava olaga.

A o le ao lafoga, e lē i sau o ia ma ni mea e mitamita ai. E lē i sau fo’i ma ni ana galuega; ae na sau ma le loto ua iloa lona tulaga i luma o le Atua. Fai mai a ia, “Le Atua e, ia e alofa mai ia te a‘u le tagata agasala.” E ofoofogia le tali a Iesu; o le ao lafoga na iloa lona mana’omia o le Atua, o ia lea na toe fo’i atu ua ta’uamiotonuina.

O le fa’amaualuga e fai mai, “E lava aʻu.” A o le loto fa’amaulalo e fai mai, “Le Atua e, ou te mana’omia oe.” E lē o fa’apea mai Iesu e lē taua galuega lelei. Ae ao ona malamalama le faresaio, e lē avea galuega ma mafua’aga e mitamita ai se tasi i luma o le Atua. O le tagata e iloa lona fa’atauva’a ma le lē mafaia o se mea, o ia lea e avanoa mo le alofa tunoa.

E lē i silasila le Atua i le anapogi a le faresaio po’o ana galuega lelei. Sa IA silasila i lona loto ma iloa ai, le fa‘amaualuga o lo’o natia i totonu. O le mea lea na tapunia ai e le faresaio, lona lava avanoa i le alofa tunoa; auā sa manatu ua lava lana amiotonu. A o le ao lafoga, sa leai sana mea e mitamita ai. Na si ana ai’oi; “Le Atua e, ia e alofa mai iā te a‘u le tagata agasala.” O le mea lea na toe foʻi atu ai o ia ua ta‘uamiotonuina, auā sa fa‘alagolago i le alofa tunoa o le Atua, ae lē o ia lava.

Fa’atatauga
Le pa’ia o le Ekālesia, e tasi lava le fe’au o lo’o taumafai le perofeta o Opetaia ma Luka e fa’amanatu mai iā i tatou; e tē’ena e le Atua le tagata fa’amaualuga, ae na te fa’aeaina le tagata loto maulalo. Atonu tatou te lē nonofo i luga o mauga maualuluga e pei o Etoma. Atonu e lē fai mo tatou le malumalu i a*o e tele o le ola, e pei o le faresaio. Peita’i, o lo’o i ai pea i totonu o tatou loto, le nofoaga e mafai ona avea ma ofaga i fetū. Atonu o lo tatou poto ma fa’ailoga ua ausia, o tatou tulaga i totonu o matāgaluega a le mālō, o saofa’iga a nu’u ma le Ekālesia, o lo tatou tamāo’āiga ma mea ua tatou ausia. Atonu fo’i o lo tatou soifua faitaulaga ma le auaunaga i le Atua. E o’o lava i mea lelei, e mafai ona avea ma mea e fa’amaualuga ai o tatou loto, pe a galo iā i tatou le Atua le pogai. O le tu’umumusu a le talalelei i lenei afiafi, “O ai na e nofo i le nofoali’i o lou loto?” O le fesili lenā na lu’itauina ai Etoma, ma o le fesili fo’i lea na fa’aalia ai le ese’esega o le faresaio ma le ao lafoga.

O le tali sili e maua iā Iesu Keriso. O IA o le Tupu o le lagi, ae na IA filifili e fa’amaulaloina IA lava. Na IA tu’ua le mamalu o le lagi, ae avea ma auauna, ma tau’ave le satauro mo i tatou. Tatou te manatu, o le maualuga e maua i le malosi, o le p**e, ma tulaga taualoa. A o Keriso na IA fa’aalia mai, o le fa’aeaina moni e maua i le agamalū ma le usiusita’i i le Atua. Na maliu o IA i luga o le satauro, ae na toe fa’atūina e le Atua o IA i lona mamalu. O ala o Keriso e fa’aalia ai, e le manumālō le fa’amaualuga, ae manumālō le lotomaulalo e fa’alagolago i le Atua. O le satauro e fa’amanatu mai ai ia i tatou, e leai se tasi e fa’aolaina i lona lava malosi, se i vaganā le alofa tunoa o le Atua ua fa’aalia iā Keriso.

O le mea lea, aua tatou te fausia ni mauga ma ni o tatou ofaga i fetū. Aua tatou te ola fa’apea ua lava tatou. Ia tatou tutumau i lalo i le mea e tatau ona tatou i ai, i luma o le Atua. Ia tatou iloa o mea uma, ua tatou maua ona o le alofa tunoa. O la Keriso, “Auā o sē fa’amaualuga iā te ia, e fa’amaulaloina lea; a o lē fa’amaulaloina iā te ia, e fa’amaualugaina lea,” Amene.

20/06/2026

LAUGA I LE A*O SA, 21.06.26

Tusi Faitau: Iona 4: 1-11
: Luka 15:25–32

O LE LAUGA I LE SUAFA MAMALU O LE ATUA LE TAMĀ, LE ALO MA LE AGAGA PA’IA, AMENE

Matua: Iona 4:4
“Ona fetalai mai ai lea o le Ali’i, Ua lelei ea lou ita?”
But the LORD replied, ‘Is it right for you to be angry?’ June (Verse 4)

Manatu Autū: Ua fa’avasegaina (Working it out)

Fa’atomuaga
O le soifuaga lenei, e naunau le tagata ia tulaga lelei ma sa’o mea uma e tusa ma ona mana’o. E fia va’ai atu ua manuia ē amiotonu, ua fa’asalaina ē amioleaga, ma vave tali mai le Atua i talosaga. Ae lē o taimi uma e ta’oto lua ai le seuga, i fa’amoemoega o le tagata ma le ga*ologa o le soifuaga. E i ai itūa*o e lē maua ai se tali o fesili, ma tapunia ai faitoto’a i avanoa sa manatu e matalatala mai. A o taimi ia, o la lava e galue pea le Atua e tu’umatāmaga mea uma e tusa ma lona finagalo. A o finau le tagata e fa’atulaga lona si’osi’omaga ina ia o gatusa ma ona mana’o, o la e fa’avasega malie mai e le Atua lona loto, ina ia o gatusa ma lona finagalo. E lē fa’avasegaina e le Atua mea e fa’amalie ai mana’o o le tagata, ae na te fa’atulagaina le loto o le tagata ina ia malamalama, e sili atu le alofa o le Atua na i lo ona manatu.

Tusi Faitau: Iona 4:1–11
O le tulaga tonu lea sa i ai le loto o Iona. E oʻo mai tala i le mataupu e 4 lea sa tatou faitauina, ua salamō Nineva mai a latou agasala, e tusa ma le savali a le Atua na aʻauina atu ai Iona e talaʻi. Ua liliu ese le nuʻu mai a latou amio leaga, ma ua alofa mutimutivale le Atua iā i latou, ma lē faaumatia le aʻai. O se tala leo malie e tatau ona fiafia ai Iona, auā ua fa’asaoina le nu’u, ma tau le ai o lana talaʻiga. Peitaʻi o le mea e ofo ai, fai mai le tusitala, “Ua matuā leaga lava lenei mea iā Iona, ua ita lava o ia.” O le ita o Iona, e loloto ma ua pei o se afi mumū e lē faigofie ona tineia.

E mafua i se ā? E mafua ina ua fa’avasega e Iona le olaga, e tusa ma le tūlafono a Mose lea sa ta‘iala ai le soifuaga o Isaraelu. Fai mai le tūlafono, “O le mata e sui ai le mata, o le nifo e sui ai le nifo.” O le amiotonu la i le manatu o Iona, o le fa’asalaina o ē ua agasala. O Nineva o se aʻai sa ta‘uta‘ua i le fa’asauā, o le faamaligi toto, ma le ifo i tupua. O lea sa manatu ai Iona, ua tatau ona o’o i ai le fa’amasinoga a le Atua. Peitaʻi ina ua salamō le nuʻu, na fa’aalia i ai e le Atua lona alofa mutimutivale.

O le mafua’aga moni lea na sola ai Iona i Tasesa. E lē i sola ona o sona fefe iā Nineva, ae ona sa ia iloa lelei le natura o le Atua. O le Atua agalelei; e alofa mutimutivale, e fa’ateletelegese lona toʻasā, ma e naunau e fa’amagalo i ē salamō. Sa manatu Iona e tatau ona fa’aalia le amiotonu o le Atua i le fa’asalaina o Nineva, peita’i ua liliu alo o le lupe, ma ua fa’aalia e le Atua lana amiotonu e ala i lona alofa mutimutivale.

Fai mai le fesili a le Atua iā Iona e pei on fai ma matua, “Ua lelei ea lou ita?” E lē i fesili le Atua ona fa’apea na te lē silafia le tali. Sa IA silafia lelei le loto o lana auauna. O lenei fesili sa avea ma mea faigaluega e toe fa’avasega lelei ai le loto o Iona, i le mea e aupito sili ona tāua. Ua vala’aulia o ia e toe suʻesuʻe lona loto, ina ia iloa ai, e lē o Nineva le faafitauli autū, ae o lona lava loto ua tumu i le ita ma le fia tauimasui.

Ae lē i muta ai i’ī le galuega a le Atua. Sa fa’auau pea ona IA aʻoaʻo iā Iona e ala i mea e tutupu i lona si’osi’omaga. Na saunia e le Atua le lā’au o le kikaiona e fa’apaolo ai Iona. Na IA saunia foʻi le anufe e fa’aumatia ai le kikaiona, ma le matagi vevela e agi mai i luga o Iona. E leai se mea na tupu fa’afuaseʻi. O mea uma lava, sa i lalo o le p**e a le Atua.

Na fiafia tele Iona i le kikaiona auā na maua ai lona paolo. Ae ina ua fa’aumatia le lā’au, ma agi mai le matagi vevela, na toe tofotofoina ai lona loto. O ī ua manino ai le galuega moni a le Atua. E lē i taumafai le Atua e suia le si’osi’omaga o Iona; sa IA taumafai e suia Iona. O le manaʻo o Iona, ia suia lona siosiomaga e ala i le fa’aumatia o Nineva lona fili; a o le finagalo loloto o le Atua, ia suia lona loto.

Fai mai le Atua iā Iona, “Ua e alofa i le kikaiona, …. O AʻU fo’i, ou te lē alofa ea i Nineva….?” Ua popole Iona i le lā’au e lē i alu ai sona afu e totō, ma ola mo sina taimi pu’upu’u, ae lē alofa i tagata e faitau afe na faia e le Atua e pei fo’i o ia. O le ata manino lea o le ese’esega o le loto o le tagata, ma le finagalo o le Atua. E fa’avasega e le tagata mea e manuia na o ia; ae fa’avasega e le Atua mea e tusa ma lona alofa mutimutivale. O lana galuega sili, e lē o le suia o tatou si’osi’omaga, a o le fa’avasegaina o tatou loto ina ia o gatasi ma lona finagalo.

Feagaiga Fou: Luka 15:25–32
E masani ona tatou manatu, o le ui’i fa’amaumau oa, le tagata autū o le fa’ata’oto lea a Iesu o lo’o fa’amauina e Luka. Ua alu ese mai lona aiga, ua fa’amaumau lona tofi, ua o’o i puapuagā, ma mulimuli ane ua salamō ma toe foi mai. Peitaʻi, ina ua toe fo’i mai le ui’i ma talia e lona tamā, o i’inā tonu lea ua amata fa’aalia ai le isi tala sa natia i le loto o le ulumatua.

Sa galue le uso matua i le fanua. Sa usiusitaʻi. Sa nofo tuāvae i le tamā ma fai mea uma e tatau ona fai. Ae ina ua fa’alogo atu i le leo o pesega ma siva, ma iloa ai ua talia e lona tamā lona uso ua salamō, ona tupu lea o le ita i lona loto. Fai mai Luka, “Ona ita ai lea o ia, e lē mafaia ona ulufale i ai.” E pei lava ona ita Iona ina ua fa’aalia e le Atua lona alofa mutimutivale i tagata sa manatu e tatau ona fa’asalaina, ua fa’apea foi ona ita le ulumatua ina ua fa’aalia e lona tamā le alofa i lona uso.

Peitaʻi, e lē i tu’ulafoa’iina e le tamā lona atali’i matua i fafo. Na sau lava le tamā e fa’amalie iā te ia. E pei lava ona fesili le Atua iā Iona, “Ua lelei ea lou ita?” Sa silafia e le tamā le ita o lona atali’i, ae sa manaʻo e fa’aali atu le mea sa natia i totonu o lona loto.

O le mea moni, e lē o le atalii la’itiiti le fa’afītauli i le faaiʻuga o le tala. Ua uma ona salamō o ia. A o le tagata o lo’o taumafai le tamā e papa’i atu i ai, o le uso matua. O le tagata sa manaʻo e suia lona siosiomaga ma maua se fa’amasinoga talafeagai mo lona uso lē usita’i ma le finau vale. A o le tamā, sa manaʻo e suia lona loto.

Fa’atatauga
Aiga ma le Faletolu, ma le mamalu o le au faitau, o le autū o le tala iā Iona, e lē o le ita o le perofeta i le a’ai ua fa’asaoina, a o le tala i le galuega a le Atua o le fa’avasegaina o le loto o le tagata. O le mea na taumafai Iona e fa’avasega, o lona si’osi’omaga e tusa ma lona manatu. A o le finagalo o le Atua, ia toe fa’avasega ma fa’afouina le loto o lona, ina ia o gatusa ma lona finagalo.

Fai mai le fesili a le Atua, “Ua lelei ea lou ita?” O le vala’au lea mo Iona ina ia toe su’esu’e ifo o ia i lona loto. E lē o Nineva le matā’upu autū, a o le loto o Iona ua iloa le amiotonu a le Atua, ae e lē i malamalama ato’atoa i lona alofa mutimutivale.

E i ai taimi tatou te fa’avasegaina ai tagata i o tatou manatu. Tatou te manatu po’o ai e tatau ona maua le fa’amagaloga, a o ai e tatau ona fa’amasinoina. A o le Atua, e lē fa’avasega tagata o IA. E silasila o IA i le tagata e mafai ona toe fa’aola.

Leitioa fai mai le tatalo a Tavita, “Le Atua e, ia e su’esu’e mai iā te a’u, ma ia e silafia lo’u loto.” O le loto lea na manaʻomia e Iona. E lē i tatau ona ia momo’o e fa’asalaina Nineva, ae sa tatau ona ia tatalo, “Le Atua e, ia e suia a’u.” Auā o le fa’afitauli sili, e lē o mea o lo’o siomia ai tatou, ae o mea o lo’o natia i totonu o tatou loto.

O le mea na lē mafai e Iona ona faia, na faia e Iesu Keriso. Na afio mai Iesu e fa’aali mai le finagalo o le Tamā. Na IA talia ē na tu’ulafoa’iina, fa’amagalo ē ua pa’u’ū i le agasala, ma alofa i ē ua manatu le lalolagi, e lē tatau ona alofaina.

O le tumutumuga o lona alofa, o le satauro. Na IA tau’ave la tatou sala i ona lava luga, ma totogi i lona soifua pa’ia. O le amiotonu lenā a le Atua ua fa’aalia e lē o le fa’aumatiaina, a o lo tatou fa’aolaina. O lona toetū manumālō, o le fa’amaoniga lea ua manumālō le alofa o le Atua.

O le fesili a le Atua iā Iona, “Ua lelei ea lou ita?” ua fesili mai ai fo’i o IA iā i tatou: O tatou taofia ea le fa’amagalo atu i isi? O sili ea ia i tatou le fa’amasino atu na i lo lona alofa? O le mea e mo’omia ona tatou fai, o le tu’uina atu o tatou loto i le galuega fa’avasega a le Atua. E lē o lo tatou vala’auina, le filifili po’o ai e tatau ona maua le alofa tunoa. Ua valaauina i tatou e avea ma tagata, ua uma ona tofo i le alofa mutimutivale o Keriso.

A tatou savavali i luma, tatou te lē toe fesili, “O ai e tatau ona fa’asala?” Ae tatou fesili, “E fa’apefea ona ou fa’aali atu le finagalo o Keriso?” Auā o le galuega sili a le Atua, e lē o le suia o o tatou si’osi’omaga, a o le fa’avasegaina o tatou loto ina ia foliga i le finagalo o Iesu Keriso, Amene.

18/04/2026

LAUGA I LE A*O SA, 19.04.26

Tusi Faitau: Ioane 7:40–52

O LE LAUGA I LE SUAFA MAMALU O LE ATUA LE TAMĀ, LE ALO MA LE AGAGA PA’IA, AMENE

Matua: Ioane 7:47-48
“Ona tali mai lea o le au faresaio iā te i latou, “Po ua fa’asesēina fo’i outou? Po ua talia o IA e se tasi o le au faip**e, po’o se tasi o le au faresaio?”
Then the Pharisees replied, ‘Surely you have not been deceived too, have you? Has any one of the authorities or of the Pharisees believed in him?’

Manatu Autū: O se uiga fa’afiasili (An attitude of superiority)

Fa’atomuaga
O le vaia*o atoa ua mavae, sa apoapoa’i mai ai faitauga o le Tusi Faitau A*o, i le mata’utia o le ola fa’asausili. Na amata mai i le laulaufaiva ma upu o le gagana, o le mana’o i tulaga taualoa ma le fia p**e, e o’o lava i le fa’ata’otoga o fuafuaga fa’aletagata, e aunoa ma le manatu i le Atua.

A o le A*o Sa lenei, ua tula’i mai ai se lu’itau e sili ona faigatā; o le fa’asausili po’o le fa’amaualuga ua pisia ai le ola fa’aleagaga. O le to’a’aga o nisi tagata i le lotu, o le umia o tofi i totonu o le Ekālesia, ma telē o lo latou malamalama i le Tusi Pa’ia, e mafai ona avea ma ala e manatu ai, e sili atu i latou i lo isi. Ua latou fa’aaogā fo’i upu o le Tusi Paia e fai ma a’upega e fa’amasinosino ai i isi, a ua lē avea ma ta’iala o le ola mafuta i le Atua. O nei lapata’iga uma o lo’o fa’ailoa mai ai, e leaga le fa’asausili, auā e fa’alavelave i le upu moni a le Atua. E fa’aleagaina ai mafutaga, ma i’u ai i le to’ilalo ma le māasiasi.

Tusi Faitau (Ioane 7:40–52)
O le faitauga o le a*ō mai le Evagelia a Ioane, o lo’o fa’amatala ai nisi o mea na tutupu i Ierusalema i le taimi o le tausamiga o fale apitaga. O fale apitaga, o fale lē tumau ia e fausia mai i lālā ma lau o lāʻau; sa na ona tōlauapi ma mapu i ai Isarā’elu i po ta’itasi, a o alu le malaga umi o le esoto. O le tausamiga la lea ua fa’apotopoto mai ai Isarā’elu i Ierusalema e fa’amanatu le alofa tausi o le Atua, ua maua ai lo latou lau’ele’ele ma le tofi; ma nonofo ai i fale tumau ma le lelei.

A o tū ma aga masani i a*o e 7 o le tausamiga, e savavali le ositaulaga sili ma tagata lautele mai le malumalu i Ierusalema e o’o atu i le vai o Seloa, e asu mai le vai i le ipu auro, ma toe fo’i atu i le malumalu e sasa’a i luga o le fata faitaulaga, a o pepese ma vivi’i tagata uma i le Atua. O le vai ua sasa’a i luga o le fata faitaulaga, o le fa’ailoga o lo latou agaga fa’afetai i le alofa sasa’a mai o le Atua. E fa’aali atu ai fo’i le fa’alagolago o Isarā’elu i le Atua, na te sasa’a mai uaga o fa’amanuiga, e ola ai fa’ato’aga ma tamāo’āiga ai le seleselega. A o le vai fo’i, o le ata fa’atusa lea o le fa’afouina o le agaga. E pei ona fai mai le Atua iā Isaia, “ou te liligi atu le vai i le nu’u naumati,…. ou te liligi atu lo’u Agaga i luga o lau fanau.”

O le a*o mulimuli o le tausamiga, lea na tula’i ai Iesu ma fetalai atu i tagata, “Afai e fia inu se tasi, ia sau ia te Aʻu ma inu ai.” O le uiga o le saunoaga a le ALI’I, e lē o IA o se vai e fa’asūsū ai fa’ato’aga ma tamāo’āiga ai le seleselega, a o IA o le punāvai e tafe mai ai le Agaga o le Atua, e malie ai le galala fa’aleagaga o tagata uma e fa’atuatua i ai, ma latou maua ai le ola e fa’avavau.

O nisi o le motu o tagata na fa’alogo i le fetalaiga a le ALI’I, ua latou manatua ana galuega lelei, o vavega ma ana a’oa’oga. Ua latou lagona fo’i le lotomaulalo i mea ua va’ai ma fa’alogo i ai, ma taliaina e moni lava, o Iesu o le perofeta e pei ona valo’ia e Mose. O isi fo’i na latou talia o Iesu o le Keriso po’o le Fa’aola na valo’ia e le au perofeta. E o’o lava i leoleo o le malumalu na poloa’iina e le fono sili a Iutaia e pu’e mai Iesu, ua fo’i mai ma latou ta’utino, e leai se tagata e tutusa ma IA; i upu o le p**e ma le poto e pa’ū mai lona fofoga.

O le motu o tagata ma leoleo o le malumalu, latou te lē i manatu i le tulaga mativa o Iesu pe fa’ailoga tagata i lona tupu’aga. O lo latou lotomaulalo, na matala ai iā sega le faitoto’a o lo latou fa’atuatua, ma taliaina ai Iesu o le Keriso. Na sili atu lo latou fia fa’alogo i le upu moni, na i lo le usita’i i poloa’iga a ta’ita’i fa’asausili o le nu’u ma le lotu.

O i latou ia, e lē i mafai ona ofi le upu moni i o latou loto. O lo latou fa’amaualuga, na manatu fa’atauva’a ai i ta’utinoga a leoleo o le malumalu ma le motu o tagata, peisea’ī e valea leoleo o le malumalu ma le motu o tagata, ae na o i latou e iloa le tulafono.

Fai mai la latou tali i leoleo, “Po ua fa’asesēina fo’i outou? Po ua talia o IA e se tasi o le au faip**e, po’o se tasi o le au faresaio?” E lē fesili, ona o se fa’amoemoe e sa’ili le mea moni, pe sa’o o Iesu o se perofeta po’o le Keriso ma le Fa’aola. Ae fesili ma toe taotaotua mai ai lava la latou tali, latou te le taliaina o Iesu o le Keriso.

O latou uiga fa’afiasili, lea ua latou lē fia iloa ai le mea moni. Ua latou fa’amasinoina leoleo o le malumalu e pei o ni tamaiti laiti e faigofie ona fa’asesēina. A o le mea moni, o i latou lea ua fa’asesēina, ona o le ola fa’amaualuga. Ua latou tu’uina leoleo i lalo o le vaega o tagata valea, ae si’i i latou lava i le vaega o tagata atamamai.

O le tā’ua o le upu faip**e, ua fa’ailoa mai ai, o i latou ta’ita’i e maualuga o latou tulaga ma umia le p**e. So’o se mea latou te lē talitonu i ai ma lē taliaina, e lē moni. Ua latou suia le auala e iloa ai le upu moni. Ua lē fuaina i upu o afioga a le Atua, ae ua fua i lo latou iloa. Ua latou manatu, o latou e p**e i le mea moni. Ua latou fa’aea i latou lava i le tulaga o le Atua; na o IA na te silafia le upu moni. Ua i’u ai ina latou fetu’u i leoleo o le malumalu ma tagata lautele. Ua le fa’alogo fo’i i le fautuaga a Nikotemo.

O le mea sili lea ona matagā. O tagata lautele ma leoleo o le malumalu e va’ai maulalo i ai, lea latou te iloa le mea moni o Iesu le Mesia. A o i latou fai mai e maualuluga ma malamalama i le tulafono a le Atua, lea e fa’ataua*oina.

Fai mai la latou mau, e lē o le Keriso po’o le Fa’aola Iesu, auā na tupu ane ma ola o IA i le a’ai o Nasareta i Kalilaia. A o lea e fai mai le valo’aga a Mika, e fanau mai le Mesia i Petele’ema. O lo latou fa’afiasili, ua lē fia fa’alogo ma lē iloa ai, e ui na tupu ma soifua ane Iesu i Nasareta i Kalilaia, ae na fanau o IA i Petele’ema mai iā Iosefa ma Maria, o suli mai le gafa o Tavita, e pei ona valo’ia e Mika ma le au perofeta.

Fa’atatauga
Le pa’ia o le Ekālesia, o le fe’au ma le lapata’iga autū mo tatou i le a*ō, e leaga uiga fa’afiasili; auā e tete’e i le finagalo o le Atua. A o’o ina tatou manatu ua sili lo tatou iloa, sili la tatou amiotonu, pe sili lo tatou latalata i le Atua na i lo isi, o i’inā e amata punitia ai o tatou loto mai le upu moni. E lē toe avea ai le Atua ma fua fa’atatau o le mea moni, a o i tatou lava.

Aua ne i avea so tatou to’a’aga i le lotu, o le umia o ni tofi i le Ekālesia, po’o le malamalama i le Tusi Pa’ia, ma ala tatou te va’ai maulalo ai i isi. E iloa lo tatou fa’afiasili, ina ua vave ona tatou fa’amasino atu, ua tatou lē fia fa’alogo, ma tatou fa’aaogāina le Tusi Pa’ia e fai ma a’upega e tusitusilima ai i isi, ae lē fa’asa’o ai i tatou lava.

O le i’uga o lo tatou fa’afiasili, e vaeluaina ai āiga, nu’u, Ekālesia ma le atunu’u, ma fa’avaivaia ai i tatou e sa’ili i le Atua.
O le mea moni, e lē o le maualuga o ni o tatou tofi, po’o le tele o lo tatou iloa, e fa’amaonia ai lo tatou latalata i le Atua; a o lo tatou loto lotomaulalo e talia ai lana upu moni. O le uiga lotomaulalo lea na iloa e le motu o tagata ma leoleo o le malumalu, ma latou talia ai o Iesu o le Keriso. A o le fa’afiasili o le au faresaio ma ta’ita’i o le lotu fai mai latou te iloa le tulafono, na pogisā ai la latou va’ai i le ALI’I.

O Iesu Keriso lo tatou ALI’I, e lē i afio mai o IA i se tulaga fa’afiasili, a o le lotomaulalo. Na nonofo ma a’ai fa’atasi ma tagata agasala, fa’amalōlō i ē mama’i, ma talia ē ua tu’ulafoa’iina. Na IA a’oa’o mai fo’i, “o lē fia sili, ia avea ma auauna.” O lona soifuaga atoa, na IA te’ena le fa’afiasili. E o’o fo’i i vavega na IA faia, e lē i faia e fa’aalia ai sona fia sili po’o sona mamalu, a ia lavea’iina ai ē vaivai ma fa’amāonia ai le alofa o le Atua i tagata uma.

O lona maliu i le satauro, ua mausalī ai le fe’au o le lotomaulalo, ma ave’esea ai le manatu fa’asausili, e mafai ona tatou lavea’iina i tatou lava. E leai se tasi e sili; o i tatou uma e mana’omia lona alofa tunoa. O lona toetū manumālō, o le fa’amaoniga lea e lē o lo tatou malosi, a o le mana o le Atua tatou te ola ai.

Ia tatou lafoa’i le loto fa’afiasili, ma toe fo’i i le lotomaulalo. Ia lē avea i tatou ma pa puipui e taofia ai isi mai le Atua, ae avea ma faitoto’a e ulufale mai ai. Ia manatua, e lē o i tatou e p**e i le mea moni, a o le Atua. E iloa lo tatou iloa moni o le Atua, ina ua tatou ifo ma le lotomaualo ia te IA. O la Iakopo, “inā fa’amaulalo ia i luma o le ALI’I, ona fa’amaualugaina lea o outou e IA”, Amene.

11/04/2026

LAUGA I LE A*O SA, 12.04.26

Tusi Faitau: Salamo 12:1-4
: Iakopo 3:1-12

O LE LAUGA I LE SUAFA MAMALU O LE ATUA LE TAMĀ, LE ALO MA LE AGAGA PA’IA, AMENE

Matua: Salamo 12:3-4
“E vavae’ese e le ALI’I o laugutu molemole uma lava, ma le laulaufaiva e tautala i mea fa’asausili; o ē ua fai mai, o tatou laulaufaiva tatou te manumālō ai, o tatou laugutu o tatou lava ia; o ai ea so tatou ali’i?”
The boastful tongue May the LORD cut off all flattering lips, the tongue that makes great boasts, those who say, ‘With our tongues we will prevail; our lips are our own – who is our master?’ (Psalm 12:3– 4)

Manatu Autū: O le laulaufaiva fa’asausili (The boastful tongue)

Fa’atomuaga
O le lalolagi lenei o upu ma tala. O a*o uma, e galue a le laulaufaiva e feso’ota’i ai ma isi tagata. O tala malie e o’o lava i matā’upu ogaoga. E fa’aaogā e le tagata le laulaufaiva, o se mea faigaluega e fa’aleo ai upu vivi’i, e fa’asalalau ai ona lava lelei. A o le isi itū, e fa’aleo ai fo’i upu afeifei e ufiufi ai ona fa’aletonu. O le fa’amoemoe tupito, ia taumafai e si’itia o ia i luga, ina ia sili atu lona tulaga i isi.

O foliga na o le laulaufaiva fa’asausili. E pisa ma leotele, ae malū fo’i i nisi taimi. E tele ana tala, e fia vī’ia, e fia tūtoatasi, ma taumafai e fa’aofo isi. Na te fa’aaogāina talanoaga masani, e fa’aeaea ai iā te ia lava. O le laulaufaiva fa’asausili, e fa’atupu vevesi i so’o se vaipanoa o le ola. E fa’asesē ai i latou e fa’alogologo i ai, ma lē iloa ai e le tagata ona ola fa’afetai e le Atua. A o lona taunu’uga, fai mai le Poto e muamua atu lea i le pa’ū. E uma loa lona fa’asausili, soso’o loa ma le fa’amaulaloina.

Tusi Faitau (Salamo 12:1-4)
O le Salamo e 12 ua fai ma faitauga o le a*ō, o le pese na tusia e Tavita, i taimi a o feagai o ia ma le matuitui o le ola taufa’alata. Na amata le tautua a Tavita i le maota o le Tupu o Saulo, e ala i lana taleni ta kitara, sa avea ma vaiola na sufi ma fa’ato’amālie ai le loto tigā o Saulo, i taimi na ulufia ai o ia e le agaga leaga. Ina ua mavae le fa’ato’ilaloina e Tavita o Koliata ma au a Filisitia, o ī na taofi ai o ia e Saulo e fai ma auauna tumau o le maota; ma lē toe fo’i ai Tavita i lona āiga.

A o tautua fa’amaoni Tavita i le maota o le tupu, o ī na ia māitauina ai se si’osi’omaga o lo’o lotolotoi ai laulaufaiva ma le gagana fa’asausili. O Toeka le faufautua a Saulo, ma isi auauna o le maota, sa mafuta fa’atasi ma Tavita e fa’atino la latou tautua masani mo le tupu. Peita’i, na iloa e Tavita o latou uiga taufa’a’ole’ole. O a latou upu molemole pei o le suāu’u, sa logo malie ma se’etia ai le fa’afofoga a Saulo, a o lo’o natia ai i tua le taufa’alata. Na avea o latou laulaufaiva ma au’upega e fa’atupu ai le masalosalo ma le fuā o Saulo iā Tavita. Ua latou toe fa’amanatu atu iā Saulo pese a fafine Isarā’elu fai mai, "Ua fasia e Saulo ana afe, a o Tavita ana sefulu o afe,". Ae momono atu ai tua ma le pepelo fai mai o lo’o sauni Tavita e fōua le mālō.

O laulaufaiva ma laugutu pepelo e peisea’ī e mālū i le fa’alogo, ae fafau mai ai i tua le mailei ina ia fa’aleaga le tautua lelei a Tavita le tagata amiotonu, ae ta’uleleia ai latou ma si’itia i luga o latou tulaga i totonu o le maota. O le mafua’aga lea o le alaga atu o Tavita i le Atua; “Le ALI’I e, ia e fa’aola mai; auā ua uma tagata amio Atua; auā ua mavae ē ua fa’amāoni na i le fanau a tagata.” O le alaga mai le loto ua fa’amanu’alia ma mafatia, ona ua suia le lelei o le vā tagata, i le suamalie o le pepelo. Ua mou atu mea tāua o le ola i le vā feagai o le tagata ma le Atua, o le fa’amāoni ma le amiotonu; a ua suia i le gagana fa’amaualuga, lea e tā’ua e Tavita o laugutu fa’alotolotolua. O le tagata ola fa’afoliga e peisea’ī e lua ni ona itu; o le itu lelei e fa’aali mai i fafo, ma le itū leaga e natia i totonu.

Fai mai Tavita o tagata fa’apea, ua latou fa’aleagaina le fa’atusa po’o le ata o le Atua, o lo’o i totonu iā i latou. Auā ua latou fa’aaogā le laulaufaiva na fai e le Atua e fa ’aleaga ai le uso a tagata, ina ia fa’aeaina ai i latou. Ua o’o ina pa’i tumutumu lo latou fa’amaualuga ma latou fa’apea ane ai, o tatou laulaufaiva tatou te manumālō ai, o tatou laugutu fo’i, o tatou lava e ana. Ua fesili fo’i, o ai ea so tatou alii?” E peisea’ī ua fai mai, o ai e p**e iā tatou?

O lea e o ma tala’i fai mai e fouvale Tavita iā Saulo, ae natia ai lo latou fouvale i le P**e Silisili’ese a le Atua na faia le laulaufaiva ma le tagata atoa. Ua galo ia i latou, a ave’ese e le Atua le manava ola, e leai se laulaufaiva e toe minoi, ma leai se upu e toe lagonaina. E pei lava o Koliata ma Nepukanesa sa tautatala fa’asausili; na i’u le tasi i le oti matagā, a o le isi na liua e fai ma manu o le vao, ma lē toe mafai ona tautala.

Feagaiga Fou (Iakopo 3:1-12)
O le au kerisiano sa ta’ape solo i Ierusalema ma nu’u ese sa p**ea e le mālō o Roma i le vaitau o le Feagaiga Fou, sa matitiva ma lē amana’ia a latou aiā tatau e tagata mau’oa i na ona po. Sa tutupu fo’i fete’ena’iga i lo latou lava loto’ifale. Ua lē autasi i taimi o puapuagā, a ua fetaua’i ona o le fia maua o ni tulaga maualuluga ma mamalu i totonu o le Ekālesia. Ua o’o ina avea ai o latou laulaufaiva ma au’upega e fefa’aleagaa’i, e fefa’amasinoa’i, ma faufau leaga ai. Ua tauau ina mate ai la latou molimau i le alofa o Keriso, ma fa’aalia ai se olaga fa’afoliga, o se lotu e na o le gutu, ae lē o i ai le loto. O le māfua’aga tonu lea na apoapoa’i atu ai Iakopo iā i latou.

Fai mai Iakopo o le laulaufaiva, o le fa’ailoga lea o le loto. E pei ona fetalai Iesu, “o le tele o mea i le loto e tautala mai ai le gutu.” Afai e lē fa’ato’ilaloina le loto, e lē mafai fo’i ona p**ea le laulaufaiva. Ua fa’atusaina e Iakopo le laulaufaiva i le fa’agutu o le solofanua po’o le foeuli o le va’a. O ni mea e foliga laiti, ae fa’atonuina le ala o le solofanua ma le va’a telē. E fa’apenā le laulaufaiva fa’asausili na te suia atoa le olaga o le tagata. E pei o le afi e mafai ona susunu ai le vao tele, e fa’apenā le upu e tasi e pa’ū mai le laulaufaiva fa’amaualuga; e mafai ona nutimomoia ai loto, fa’atupu ai le masalosalo, ma save’u ai le filemū o le Ekālesia.

O le fa’afitauli ua iloa e Iakopo, o laulaufaiva lava o le au kerisiano lea e vivi’i ai i le Atua, lea fo’i e ta’u fa’atauva’aina ai isi uso a tagata ua faia i le fa’atusa o le Atua. Fai mai Iakopo e le tatau ona fa’apenā; auā e lē mafai ona puna mai le vai magalo ma le vai o’ona i le puna e tasi. O le lapata’iga a Iakopo mo le au kerisiano, ia taumamao mai le fa’aaogāina o le laulaufaiva e fa’aali ai le fia sili ma le fia p**e, a ia fa’aali ai le lotomaulalo i luma o le Atua; auā o le laulaufaiva fa’asausili e i’u i le fa’alumaina; a o le laulaufaiva ua p**ea e le Atua, e avea ma puna o le ola ma fa’amanuiaga.

Fa’atatauga
Le pa’ia o le Ekālesia ma le au faitau, o la tatou gagana Samoa, o le fa’avae lea o tu ma aga fa’aaloalo. O le vā fealoa’i e teu ma fa’amatagofie i upu o le gagana. E ave’esea ai le fa’asausili, ma fausia ai le fealofaniga. Peita’i, aua ne i avea le atamai ma le poto o le laulaufaiva i le gagana, ma a’upega e fa’aeaina ai i tatou lava, ae ta’u fa’atauva’aina ai o tatou uso a tagata. O le gagana, e le o se mea faigaluega a le tagata, a o le meaalofa pa’ia mai le Atua, e tatau ona fa’au’u e lona Agaga Pa’ia.

E masani fo’i ona fa’alogoina upu o le laulaufaiva fa’asausili, i totonu o fonotaga a o tatou nu’u ma Ekālesia, e o’o lava i le mālō. E afeifei mai i saunoaga ma fetalaiga e foliga mālū ma atamai, ae fa’atupuina ai le masalosalo ma fevaevaea’iga. E pei lava o le laulaufaiva o Toeka na avea ma mailei i le maota o Saulo. O le laulaufaiva e lē p**ea e le Atua, o le afi lea e susunuina ai le filemū o tatou āiga, nu’u, mālō ma Ekālesia. E moni le upu a le atunu’u; e iloa le tagata i lana gagana. O le lu’i mo tatou uma; ia avea o tatou laulaufaiva ma puna o le vai ola, e sufi ai loto mafatia, ae aua ne i avea ma a’upega e fa’aleaga ai le vā lelei.

O Keriso o le fa’ata’ita’iga sili. E ui o IA o le Atua moni e mamana ana fetalaiga, ae na te lē i fa’aaogāina upu fa’asausili e fa’aeaina ai IA lava. Ina ua fa’aosoosoina e le ti’āpolo, na tali atu o IA i upu lotomaulalo mai Afioga a le Atua. E o’o lava i luma o Pilato ina ua tu’ua’ia e laulaufaiva pepelo, na tumau lona to’afilemū; o le filemū na sili atu lona malosi na i lo upu. A o tautau i le satauro, na feagai ai o IA ma upu fa’atauemu ma fa’amaualuga, ae na IA tali atu i le tatalo o le alofa: “Lo’u Tamā e, ia e fa’amagalo ia te i latou.” O lona maliu na tauave ai le mamafa o a tatou agasala, e aofia ai ma le o’ona o a tatou upu. O lona toetū mamalu, o le fa’ailoga lea o le manumālō: e fa’amasinoina ai le laulaufaiva fa’asausili, ae fa’aeaina ai le lotomaulalo.

O le vala’au mo tatou a o fa’aauau le malaga o lenei tausaga, ia avea o tatou laulaufaiva ma fata faitaulaga mo le Atua, e ofo atu ai le vi’iga ma le fa’afetai ia te IA. Ia tatou soso ese mai le gagana fa’alotolotolua, le fia sili, ma le fa’atupu tala. Afai o Iesu Keriso lo tatou Ali’i, e tatau ona p**ea e IA o tatou laulaufaiva ma a tatou upu. Ia avea o tatou laulaufaiva e fa’aleo mai ai le gagana alofa, gagana fa’atupu filemu, gagana e fa’aeaina ai le Atua, ma gagana e ta’ita’iina ai isi uso i le fa’aolataga. Ia tatou manatua, o le gagana e mafai ona avea ma molimau malosi i le lalolagi, pe a fa’aogāina ma le loto maulalo ma le alofa. Amene.

Address

Lalomalava

Telephone

+6857207748

Website

Alerts

Be the first to know and let us send you an email when EFKS Lalomalava, Savai'i/CCCS Lalomalava posts news and promotions. Your email address will not be used for any other purpose, and you can unsubscribe at any time.

Contact The Organization

Send a message to EFKS Lalomalava, Savai'i/CCCS Lalomalava:

Shortcuts

Share

Category