10/10/2026
NIPI NAUTANG SAWMNI LEH GIETNA – A K*M
28th, Sunday in Ordinary Time
Lai Siengtho Masa Isaiah 25:6-10a
Kamsang Isaiah Laibu sung pan simna
Vanglien T**a Pasien in tam muol tungah, lengga zu niing ciaa leh an tuui an-al pen te tawh mi zosie adingin pawi a bawl ding hi. Tualeh ama in mi zosie tung a kikhu dana puon te-le minam zosie tung a kizah puon te susie ding hi. T**a in kumtawn si-na val tum ding a, mai-tang zosie panin hlituite anul sieng pieh ding hi. Leitung mun zosie panin a mite min dai nate alah mang pieh ding hi, azieh pen T**a in agen zo hi. Khum ni ciengin, En un, tami eite Pasien ahi hi; eite ei hotdam nadingin ama i ngah uhi. Tami khu i nganga uh T**a ahi hi; a hotdamna sungah lungdamin kipah vai, a ci ding uhi.
Pasien kammal ahi hi.
T**a Pasien tungah i lungdam hi.
Lapite Dawngtawina Lapite 23:1-3a, 3b-4, 5, 6 (6cd)
Dawngtawina: T**a inn sungah kumtawnin ka teng ding hi.
1. T**a pen ka Tuucingpa hi a, bangma kisap ka nei sih ding hi. Lo dawn na mun-ah kei ei lumh sah in; tuidam gei ah ei pui hi; Aman ka hlagau tha ei dip pieh hi.
2. A min adingin thuman lampi-ah ei pui hi. Khuomiel kuompi zui in pei nanleng, sietna ka ging sih hi. Azieh pen nang in kei nei op-pi a, na phohbol leh na ciengkhut in kei ei lungmuong sah hi.
3. Ka galte omna mun, ka mai ah an nei lui hi. Ka lu sathau nei nupieh a, ka hai zong a dimlet hi.
4.Hoina leh khuotuona in ka khan tawntungin ei zui pelmaw ding a, T**a' inn sungah kumtawnin ka tenng ding hi.
Lai Siengtho Nina Philippi-te 4:12-14, 19-20
Philippi-te tungah Misiengtho Paul Laihlah sung pan simna
Sanggamte aw: Tasap ici in bang hi a, kicing ici in bang ahei ci thu zong ka thei ta a, gilkiel na leh gil va na, hauna leh zawn na thu siim, na zosie-ah, mun khat popo panin ka sin zo hi. Keima ei tha hat sah pa tung tawn in na zosie ka bawl thei hi. Hinanleh, ka ham sat na ei thuoh pi nahi ziehun na thu siem mama uhi. Tua ahi ciengin, ka Pasien in Christu Jesu sunga a minthang, Ama hauna tawh kizui-in na ki sap na zosie uh ang sih ding hi. Eihaw Pa leh Pasien tungah a tawntungin minthanna omden ta heh! Amen.
Pasien kammal ahi hi.
T**a Pasien tungah i lungdam hi.
Alleluia Ephesus-te 1:17-18
Alleluia, Alleluia.
Eite T**a Jesu Christu Pasien in, ama vanglietna thuphate i theithei nadingin i lungsim mitte ah va sah hi. Tuazie in eite in, i ngah a thuthuh lametna i thei ding hi.
Alleluia, Alleluia.
Lungdamna Lai Siengtho Matthew 22:1-14
(Tomlahna: Matthew 22:1-10)
Misiengtho Matthew giel Lungdamna Lai Siengtho sung pan simna ahi hi.
T**a Pasien aw, na tungah minthanna om ta heh.
[[Tualeh Jesu’n thugen-tena tawh a kung vuah thu agenkia a, Vantung gam pen a tapa ding molop guolva na a bawl kumpipa tawh kibang hi. Ama'n molop guolva na a ang haw dingte han dingin a sawltahte a sawl a; hinanleh amahaw ang pei nuom sih uhi. Tualeh ama'n a kicielte kungah, Ka bawng-tal leh ka bawng vaah-thaute kigo zo a, na zosie a mansa in om ta hi. Molop guolva na-ah ang pei ta un,' ci-a gen dingin a sawltah dangte a sawl kia hi. Hinanleh amahaw’n thudon loin, pawlkhatte lo a kikuon uh a, adangte a na sepna mun vuah pei in, tuaci’n, adang te'n a sawlhtahte man in bawlsie uh a, athat ta uhi. Kumpipa lungthah in, tua tuol thatte su-mang a, akhuopi uh ahal tum dingin, a galkapte a sawl ta hi. Tua zawin, kumpipa'n a na semte kungah, Molop guolva na abaih sa-in om zo a, hinanleh ka cielte an-ne dingin a kilawm nawn sih uhi. Tua ziehin nohaw va pei unlen lampi dung teng ah pang in, na mu popo uh molop guol va na ankuong imm dingin ang ciel ta un,' ci’n a sawl hi. A na semte lampi ah pei-in, mihoih leh mihoih lo, a mu popo ahan uh a, mo lopna inn sungah pawi siim mi a dim ta hi.]]
Mopawi siimte en dingin kumpipa anglut ciengin, molopna puon silh lo pasal khat a mu ta hi. Khumin a kungah, Lawm aw, mo lopna puon silh lopi-in ta sungah ang bangci lut na hei? aci ciengin, tuapa’n a gen ding a theih ta sih hi. Tua zaw ciengin kumpipa'n nasemte kungah, a khut leh a keng ia unlen pulam khuomiel lahah paih ta un. Tua ah kaana leh hagawina a om ding hi, a ci hi. Jesu'n a thu zawhna ah, a kiciel mi atam vangin, a kitel mi atawm ding hi, a ci hi.
T**a Lungdamna Lai Siengtho ahi hi.
Christu T**a aw, nang tungah phatna om ta heh.
