08/30/2024
أفضل المصادر لاجتياز البورد الأمريكي 📕📕
إذا عندك الفكرة تمتحن البورد، أو حاليا شغال بتجهز ليو، نحن جبنا ليك لستة من المصادر اللي ح تساعدك جدا إن شاء الله تجتاز الإمتحان 😎
ح نقسم المصادر دي لقسمين، مصادر تقرأ منها وتتذكر ال basic وتنفض الغبار، ومصادر للمراجعة👌
1️⃣ مصادر للدراسة:
🔴Cards
إسمو كده لأنو بديك المعلومات في شكل flashcards، جداول صغيرة كده تقرأ وتبقى مارق سريع، وبحافظ على تركيزك وما بشتتك بمعلومات فرعية، ده ممتاز لشخص عندو basic كويس وعايز يتذكر الحاجات بسرعة ويربطها مع بعض 👌
🔴Approach:
المرجع جميل جدا والقراية منو ساهلة وممتعة، بلخص ليك كل شي في جداول أو فقرات صغيرة، وبديك زيت الزيت، ما فيهو أي حشو، وأظرف شي كمان إنو في Mnemonics، ودي عبارة عن حاجات بتساعدك تتذكر المعلومة، متذكرين (كل ظالم جاتو داهية) بس دي Mnemonics، باختصار مرجع القراية منو سريعة وممتعة وحتى فيو رسومات مضحكة عشان تذكرك، وفي نهاية كل سكشن في شوية أسئلة ممكن تراجع بيها، عزة صح 😎
🔴Success
ده مرجع بتاع قراية عدييييل، يمسك ليك ال topic يشرحو ليك حتة حتة، ف صراحة مرجع عايز زول يقعد ليو برواقة، تحسو مرجع ما بتاع مجاملات زي approach و cards، تحسو بقول ليك لو إنت ما زول قراية ما تجي علي ههههههههه😂، لكن الظابط فيو جدا هو أسئلتو، نهاية كل سكشن في كمية كبيرة من الأسئلة والحل بتاعها في نهاية الكتاب، صراحة أسئلة عميقة ومفيدة جدا، حتى الحل بتاعها معاه تفسير للحل، ودي أظرف حاجة فيو 💁♂️
🔴Quick compendium
ده مرجع شامل كامل، بتناول كل ال topics في المختبرات الطبية، بالإضافة لمواضيع تانية زي ال lab operation اللي مرات بتجي منو أسئلة في الإمتحان والناس بتشتكي انها ما قدرت تحلها، لأنو أغلب الناس بتهمل ال lab operation لما تكون بتجهز للإمتحان بتاع البورد، ف من هسي أمشي أقرأ الجزئية دي من المرجع ده، تمام ونمش قدام؟ 🤗
2️⃣مصادر للمراجعة:
بعد ما نفضت الغبار ومليت راسك معلومات من المراجع الفوق دي، بعد كده تجي تختبر نفسك وتراجع معلوماتك 👌
🔴 BOC
طبعا ده مُوصى به من موقع ال ASCP، عبارة عن سلسلة كتب، كل كتاب لتخصص معين، clinical chemistry, hematology، etc، المرجع عبارة عن أسئلة محلولة، كل كتاب مقسم لتلاتة أقسام، قسم فيو الأسئلة فقط، قسم فيو الأجوبة فقط، وقسم فيو تفسير الأجوبة، لو في سؤال ما عرفت إجابتو، تنزل لقسم الأجوبة ح تلقى الحل، لو ما فهمت ليه الحل كده، تنزل لجزئية تفسير الحل ح تلقى التفسير، صراحة أنا شايف ده شي متعب، يعني لو ح تعمل كده في كل مرة ما فهمت فيها الإجابة، أصبعك ح يتعب من تقليب الصفحات😪، لكن بغض النظر عن العيب ده، هو مرجع ممتاز خالص 👌
🔴HARR
أسهل مرجع عشان تراجع بسرعة، الأسئلة على يدك الشمال، في نفس الصفحة على يدك اليمين الإجابة ومعاها تفسيرها، ف دي ميزة كويسة جدا و ح تريحك من تقليب الصفحات، و ح توفر عليك زمن، أسئلتو أسئلة عميقة جدا وحتى تفسير الإجابة ممتاز خالص، ح تكون مستمتع وإنت بتقرأ وما ح تحس بالزمن 💆♂️
🔴QUIZLET
هو عبارة عن موقع وفي منو نسخة تطبيق موبايل، فيو ال recalls، أو التجميعات بتاعة الأسئلة حقة الناس الإمتحنت قبل كده، شفت الإمتحان البنزلوه بالليل في قروب الدفعة وبكرة الصباح تخش الإمتحان تلقى إنو في تشابه كبير بينهم، بس ده نفس الفهم، ال recalls دي أهم مصدر للمراجعة لأنها أسئلة من نفس الإمتحان اللي إنت ح تمتحنو، وكمان محلولة، ف لازم تقراها 👌👌
كسرة: الموقع بتاع quizlet في السودان محظور 🙂، جربوا بال vpn احتمال يفتح 🤷♂️
🔴 LABCE
أول شي ده موقع paid، يعني ح تدفع قروش عشان تشترك فيو وتشوف الأسئلة حقتو، عبارة عن simulation أو محاكاة لإمتحان البورد، بس من ملاحظات الناس إنو أسئلتو ساهلة، فممكن تعتبرو موقع بتاع warm up، تبدأ بيهو عشان تحل أسئلتو وترفع معنوياتك، وبعدها تمشي للمصادر التانية بتاعة المراجعة 👌
🔴Recalls
زي ما قلنا دي تجميعات أسئلة لناس إمتحنوا قبل كده، ممكن تلقاها في موقع quizlet محلولة، أو تبحث عنها في قوقل، في مواقع تانية بتوفرها محلولة، ودي مهمة جدا، وأغلب الناس الإمتحنوا قالوا إنها أفادتهم كتير.
في نهاية البوست نقول إنو، دي أفضل المصادر بناء على توصيات أشخاص إمتحنوا ونجحوا الحمد لله، ومدة التجهيز بتعتمد على ال basic بتاعكم، كل ما كنتوا متذكرين كويس كلام الجامعة وفاهمين، ما ح تتعبوا كتير و ح تاخدوا زمن أقل، الموضوع ما صعب أبدا ولا تخلعكم كلمة بورد أمريكي، إنتوا اجتهدوا بس ونحن سهلنا عليكم وجبنا ليكم أفضل المصادر، وإن شاء الله موفقييييين 😎
كسرة: كل المراجع دي موجودة في تلغرام، بس أكتب اسم المرجع في البحث وأدخل على files
تخريمة: هسي لو بدونا جنسيات أمريكية بعد النجاح في البورد، والله نقرأ تحت أضواء القذائف 😂
-MLS
