09/29/2026
🇬🇪
27 სექტემბერს, სოხუმის დაცემის დღეს Ekaterine’s Art Studio -ში კულტურულ-საგანმანათლებლო ღონისძიება “ჩვენ ვართ ხიდი“ გაიმართა, რომელსაც ორგანიზება ქალთა კლუბის კულტურისა და განათლების მიმართულებებმა და Ekaterine’s Art Studio-მ გაუწიეს.
საღამო, რომელმაც თაობები, მოგონებები და ხელოვნება გააერთიანა სწორედ ამ იდეას ემსახურებოდა - ჩვენ ვართ ხიდი წარსულსა და მომავალს შორის.
33 წელი გავიდა სოხუმის დაცემიდან, მაგრამ ისტორიას დრო ვერ აქრობს. არსებობს მეხსიერება, რომელიც თაობიდან თაობას უნდა გადავცეთ — არა მხოლოდ ტკივილით, არამედ სიყვარულით, ხელოვნებით, მუსიკითა და სიტყვით.
ეს იყო საოცრად ემოციური, თბილი
საღამო, სადაც ერთმანეთთან გადაიკვეთა ისტორია, ხელოვნება, მუსიკა, პოეზია და მოგონებები.
შეხვედრა გახსნა „ქალთა კლუბი ნიუ-იორკში“-ს თავმჯდომარემ, ქალბატონმა ეკატერინე კახიძემ, რომელმაც დამსწრე საზოგადოებას მიესალმა და ღონისძიების მნიშვნელობაზე ისაუბრა.
საქართველოდან, ონლაინ ჩართვით, მონაწილეებს მიესალმა ქალთა კლუბის პრეზიდენტი, ქალბატონი მაკა ხეცურიანი, რომელმაც თბილი სიტყვებით მიმართა შეკრებილ საზოგადოებას და ღონისძიების მონაწილეებს წარმატება უსურვა.
ღონისძიებაზე მოეწყო საღამოს სულისჩამდგმელის, ეკა ტუჩაშვილის, მიერ წარმოდგენილი Ekaterine’s Art Studio-ს ნიჭიერი მოსწავლეების ნამუშევრების გამოფენა.
პატარა და ახალგაზრდა ხელოვანების ნახატებში აფხაზეთი გაცოცხლდა მათი თვალით — ფერებით, ემოციებით, მონატრებით, იმედითა და სიყვარულით. მათ კიდევ ერთხელ დაგვანახეს, რამდენად მნიშვნელოვანია, ახალმა თაობამ იცოდეს საკუთარი ქვეყნის ისტორია და შეინარჩუნოს კავშირი საკუთარ ფესვებთან.
ქალბატონმა მანანა კოპალიანმა ისაუბრა სოხუმისა და აფხაზეთის ისტორიულ წარსულზე, მის კულტურულ მემკვიდრეობასა და მნიშვნელობაზე. მან განსაკუთრებული ყურადღება გაამახვილა ისტორიული მეხსიერების შენარჩუნებასა და მისი მომავალი თაობებისთვის გადაცემის აუცილებლობაზე.
საღამოს განსაკუთრებული სითბო შემატეს კლუბის მეგობარმა მუსიკოსებმა, რომლებმაც მუსიკის ენით გააგრძელეს ის სათქმელი, რასაც ზოგჯერ სიტყვები ვერ იტევს.
ღონისძიებაზე მოწვეული იყო პოეტი ქალბატონი მაყვალა ბოჭორიშვილი. სტუდიის მოსწავლემ, ანა ცაგარეიშვილმა, ლუკა დონდუამ წაიკითხეს ემოციური ლექსები, მათ შორის ქალბატონი მაყვალას ავტორობით.
შეხვედრაზე ფერწერა, მუსიკა, პოეზია, ისტორია და მოგონებები ერთ სივრცეში გაერთიანდა — და თითოეულმა მათგანმა თავისი სათქმელი მოგვიტანა.
გულითად მადლობას ვუხდით თითოეულ მონაწილეს, მოწვეულ სტუმარს, მშობელს, ახალგაზრდა ხელოვანს, მუსიკოსსა და მეგობარს, ვინც ამ მნიშვნელოვანი დღის შექმნაში თავისი წვლილი შეიტანა:
გიორგი მარგველაშვილი, ირმა დვალიშვილი, თამთა ნამიჭეიშვილი, ზვიად ბილანიშვილი, ვანო გოდერძიშვილი, მაყვალა ბოჭორიშვილი, ხათუნა ჟორჟოლიანი, ტატა თევდორაძე.
მადლობა ყველას, ვინც მოვიდა, მოგვისმინა, გაიზიარა ჩვენი ემოცია და კიდევ ერთხელ შეგვახსენა, რომ ისტორიული მეხსიერების შენარჩუნება ჩვენი საერთო პასუხისმგებლობაა.
ჩვენ ვართ თაობა, რომელსაც შეუძლია გახდეს ხიდი —
ხიდი წარსულსა და მომავალს შორის,
ხიდი ისტორიასა და ახალ თაობას შორის,
ხიდი ტკივილსა და იმედს შორის.
ჩვენ ვართ ხიდი. 🇬🇪
