04/22/2026
🇺🇸🇲🇳 АНУ-ын нийслэл дэх Монгол сургуулийн 20 жилийн ойн хүндэтгэлийн арга хэмжээ 2026 оны 4 дүгээр сарын 19-ний өдөр өргөн дэлгэр, амжилттай зохион байгуулагдлаа. Хилийн чанадад байгуулагдсан анхны Монгол сургуулиудын нэг болох энэхүү эрхэм байгууллага нь хорин жилийн турш эх хэл, соёл, өв уламжлалаа түгээн дэлгэрүүлэх их үйлсийг нэр төртэй авч явж ирсэн билээ.
👏🏻АНУ дахь Монгол Улсын Элчин сайдын яамны хамт олон Монгол сургуулийн үйл ажиллагааг тасралтгүй дэмжиж ирсэнд талархал илэрхийлье. Монгол Улсаас АНУ-д суугаа Онц бөгөөд Бүрэн эрхт Элчин сайд Ө.Батбаяр танд чин сэтгэлийн талархал дэвшүүлж байна. Хилийн чанад дахь Монгол сургуулиудаас анх удаа манай сургуульд Монгол Улсын Засгийн газраас хандив, дэмжлэгийн гараа сунган тусламж үзүүлж өгсөн нь бидний үйл ажиллагаанд үнэтэй хувь нэмэр оруулсан билээ.
👏🏻 АНУ дахь Монгол Улсын Соёлын Элч Н.Ганхуяг танаа, 2006 онд байгуулагдсан цагаас эхлэн манай байгууллагын бүхий л үйл ажиллагаанд бие сэтгэлээрээ байнга дэмжин, үнэтэй хувь нэмрээ оруулж ирсэнд талархал илэрхийлье. Соёлын Элчийн хүндэт өргөмжлөлийг бидэнд гардуулан, шагнаж урамшуулсанд бид үнэхээр их баяртай байна.
👏🏻 Монголчуудын холбооны тэргүүн М.Дэлгэрцогт танд бидний эхэлсэн цэгээс өнөөдрийг хүртэл зүрх сэтгэл, халуун гараараа байнга дэмжиж, хамтран ажиллаж ирсэнд маш их баярлаж талархаж байна.
👏🏻 “Анура Мюзик” төвийн хамт олон, захирал У.Хатанболд танд биднийг үргэлж дэмжиж, морин хуурын гайхамшигт аялгуугаар сэтгэлийг маань хөглөж, энэхүү баярын уур амьсгалыг улам чимж өгдөгт маш баярлаж байна.
👏🏻 Энэхүү бахархалт түүхийг бүтээлцсэн үүсгэн байгуулагчид, санаачлагчид, үе үеийн захирлууд, анхны арван багш нар, Арлингтон хотын боловсролын газар, төлөөлөн удирдах зөвлөл, үе үеийн багш сурган хүмүүжүүлэгчид, сайн дурын ажилчид, хүүхэд багачууд, шавь нар, эцэг эхчүүд, хамтран ажилладаг байгууллагууд болон үргэлж дэмжиж, түшиг тулгуур болж ирсэн эрхэм ивээн тэтгэгч та бүхэндээ талархал илэрхийлье. Та бүхний хичээл зүтгэл, итгэл сэтгэл, нэгдмэл зорилго энэ сургуулийн өнөөгийн амжилтын бат бөх үндэс болж байна.
👏🏻“Монгол хонх” хэмээх бидний Монгол сургуулийн сүлд дуу нь үе үеийн шавь нарын сэтгэлд хоногшин, үе дамжин эгшиглэсээр ирсэн эрхэм бүтээл билээ. Энэхүү дууны аяыг хөгжмийн зохиолч С.Сансаргэрэлтэх, шүлгийг яруу найрагч Л.Батбаяр нар туурвисан бөгөөд та хоёртоо маш их баярлалаа.
👏🏻Бүх хүний нэрийг дурдаж дурдаж чадахгүй ч биднийг үргэлж дэмжиж, хамтдаа энэ 20 жилийн түүхийг бүтээлцсэн та бүхэндээ талархая.
💯Өнгөрсөн он жилүүдэд тус сургуулийн үйл ажиллагаа тасралтгүй, тууштай хэрэгжсэний үр дүнд 2000 гаруй хүүхэд багачуудыг сурган хүмүүжүүлж, эх хэл соёлынх нь дархлааг бататган төлөвшүүлжээ. Тэдгээр төгсөгчдийн олонх нь өнөөдөр АНУ-д төрөл бүрийн салбарт амжилттай ажиллаж, Монгол Улс болон Америкийн Нэгдсэн Улсын хооронд соёл, боловсролын үнэт гүүр болон өсөн хөгжиж байна.
🌍 Дэлхийн хилийн чанад дахь анхны Монгол Сургуулийн 20 жилийн ойн баярын мэндийг хүргэе.
