11/07/2026
SKAUTI VYUO VIKUU WATAKIWA KULIPA ADA KULINDA USTAWI WA CHAMA
DAR ES SALAAM:
Kamishna Mkuu Msaidizi wa Chama cha Skauti Tanzania anayeshughulikia Vyuo Vikuu, Zainab Mbetu, amewataka Skauti wote waliopo katika taasisi za elimu ya juu nchini kuhakikisha wanazingatia ulipaji wa ada zao za uanachama kwa wakati huku akisisitiza kuwa ukamilishaji wa michango hiyo ni nguzo muhimu itakayosaidia kuleta ustawi, kukuza ufanisi na kuendesha shughuli mbalimbali za chama hicho kwa mafanikio makubwa.
Wito huo umetolewa Julai 7, 2026, alipofanya ziara rasmi katika Chuo cha Kumbukumbu cha Mwalimu Nyerere kilichopo Kigamboni, mkoani Dar es Salaam. Lengo kuu la ziara hiyo lilikuwa ni kuhamasisha, kuamsha ari na kuimarisha utendaji kazi wa skauti katika vyuo vikuu, ili vijana wasomi waendelee kuwa mstari wa mbele katika kutoa huduma kwa jamii na kujenga uzalendo.
Katika ziara hiyo, Kamishna Mbetu alifanya mazungumzo na viongozi pamoja na wanachama wa skauti wa chuoni hapo, ambapo alieleza mikakati ya chama hicho katika kuboresha mifumo ya vyuo vikuu. Alihitimisha kwa kuwakumbusha umuhimu wa nidhamu, maadili na uwajibikaji kuwa ni sehemu ya viapo na misingi ya Skauti duniani kote.
