30/06/2026
Raporto pri la Landa Kongreso de Esperanto en Tanzanio 2026
De la 17-a ĝis la 19-a de junio 2026 okazis la Landa Kongreso de Esperanto en Tanzanio en la konferenca centro de KKKT Nyakato Nation, en la regiono Mwanza. La kongreso havis la temon "Lingvo kaj Kulturo: Ponto de Unueco kaj Paco" kaj kunvenigis esperantistojn el Tanzanio kaj eksterlando por kunsidi, lerni, interŝanĝi spertojn kaj plifortigi la landan movadon.
Entute ĉeestis 49 partoprenantoj, inter ili 38 el Tanzanio, 5 el Belgio, 1 el Svislando, 1 el Demokratia Respubliko Kongo, kaj 4 infanoj, kiuj akompanis siajn gepatrojn. La internacia ĉeesto donis al la kongreso aparte amikan kaj tutmondan etoson.
La kongreso estis solene malfermita de la prezidanto de Tanzania Esperanto-Asocio, kiu bonvenigis ĉiujn ĉeestantojn kaj substrekis la gravecon de la renkontiĝo por daŭrigi la pozitivan evoluon de la Esperanto-movado post la historia 109-a Universala Kongreso okazinta en Aruŝo en 2024.
Dum la tri kongresaj tagoj okazis riĉa programo, enhavanta prelegojn, diskutojn, lingvajn atelierojn, kulturajn prezentojn kaj raportojn pri la agado de Esperanto en diversaj regionoj de Tanzanio. Partoprenantoj interŝanĝis spertojn pri instruado de Esperanto, organizado de kluboj, varbado de novaj membroj kaj la uzo de modernaj teknologioj por disvastigi la lingvon.
Specialan intereson vekis la diskutoj pri la estonteco de la Esperanto-movado en Tanzanio. Oni emfazis la neceson plifortigi instruadon en lernejoj kaj universitatoj, instigi junulojn aktive partopreni en la movado, fondi novajn klubojn en regionoj kie ankoraŭ ne ekzistas organizita agado, kaj utiligi la interreton kaj artefaritan inteligentecon por lernado, informado kaj internacia kunlaboro.
La kongreso finiĝis en etoso de ĝojo, amikeco kaj espero. La partoprenantoj esprimis sian deziron plu labori por fortigi la Esperanto-movadon en Tanzanio kaj en Afriko, kun pli proksima kunlaboro inter lokaj kluboj kaj internaciaj partneroj. Ili ankaŭ alvokis ĉiujn esperantistojn aktive kontribui al la kresko de la movado per instruado, organizado kaj diskonigado de Esperanto.
La Landa Kongreso en Mwanza fariĝis grava mejloŝtono en la historio de Tanzania Esperanto-Asocio kaj montris, ke la movado en Tanzanio daŭre kreskas kaj havas bonajn perspektivojn por la estonteco.
Ni bonvenigas vin al la venontjara kongreso kiu okazos en la Urbo Mŭanza de la 18a ĝis 13a de junio 2027
John Magessa
Junio 2026
